രാഷ്ട്രീയപാര്ട്ടികളുടെ പണമിടപാടുകളില് പിടിമുറുക്കാന് തെരഞ്ഞെടുപ്പ് കമ്മീഷന്
ലോക്സഭ തെരഞ്ഞെടുപ്പിന് മുന്നോടിയായി രാഷ്ട്രീയപാര്ട്ടികളുടെ പണമിടപാടുകള് നിരീക്ഷിക്കാന് തെരഞ്ഞെടുപ്പ് കമ്മീഷന് പഴുതടച്ചുള്ള സംവിധാനങ്ങള് ഏര്പ്പെടുത്തുന്നു. അനധികൃതമായി പണം കൊണ്ടുവരുന്നതും മറ്റും കണ്ടെത്തുന്നതിന് സംസ്ഥാന - കേന്ദ്ര സര്ക്കാറുകളുടെ നികുതി വകുപ്പുകള്ക്കും റവന്യു ഇന്റലിജന്റ്സ് വിഭാഗങ്ങള്ക്കും എന്ഫോഴ്സ്മെന്റ് ഡയരക്ടറേറ്റിനും കമ്മീഷന് നിര്ദേശം നല്കി.
വിമാനത്താവളങ്ങള്, ഹെലിപാഡുകള് തുടങ്ങിയ സ്ഥലങ്ങളിലൂടെയുള്ള പണത്തിന്റെ വരവ് തടയുന്നതിന് തെരഞ്ഞെടുപ്പ് കമ്മിഷനുമായി ആലോചിച്ച് ബ്യൂറോ ഓഫ് സിവില് ഏവിയേഷന്, കേന്ദ്ര വ്യവസായ സുരക്ഷാ സേന വഴി കര്ശനമായ പരിശോധനകള് നടത്തും. സംസ്ഥാനത്തെ മൂന്ന് വിമാനത്താവളങ്ങളില് പണത്തിന്റെ അനധികൃത കൈമാറ്റം തടയുന്നതിന് എയര് ഇന്റലിജന്റസ് യൂണിറ്റുകള്ക്കും കര്ശന നിര്ദേശം നല്കിയിട്ടുണ്ട്. തെരഞ്ഞെടുപ്പ് നടക്കുന്ന സംസ്ഥാനങ്ങളിലെ എല്ലാ വിമാനത്താവളങ്ങളിലെല്ലാം ഇത്തരം യൂണിറ്റുകള് സ്ഥാപിക്കാന് വ്യോമയാന മന്ത്രാലയത്തോട് തെരഞ്ഞെടുപ്പ് കമ്മീഷന് ആവശ്യപ്പെട്ടിട്ടുണ്ട്. ആദായ നികുതി, കസ്റ്റംസ്, സെന്ട്രല് എക്സൈസ് വകുപ്പുകളിലെ മുതിര്ന്ന ഉദ്യോഗസ്ഥരെ ചെലവു നിരീക്ഷകരായി ഓരോ ജില്ലയിലും നിയമിക്കും.
തെരഞ്ഞെടുപ്പിനു മുമ്പായി ഓരോ സ്ഥാനാര്ത്ഥിയും പ്രത്യേകം ബാങ്ക് അക്കൗണ്ട് ആരംഭിക്കണം. തെരഞ്ഞെടുപ്പിന് ചെലവാകുന്ന പണം ഈ അക്കൗണ്ട് മുഖേന ചെക്കുകളും ഡ്രാഫ്റ്റുകളുമായി മാത്രമേ നല്കാവു. ചെലവ് നിരീക്ഷകരെ സഹായിക്കാന് നിയോജകമണ്ഡലങ്ങള് തോറും അസിസ്റ്റന്റ് എക്സ്പെന്ഡിച്ചര് ഒബ്സര്വര്മാരെയും നിയമിക്കും. ഓരോ നിയോജകമണ്ഡലത്തിലും രഹസ്യ നിരീക്ഷണ റജിസ്റ്റര് സൂക്ഷിക്കും. ഓരോ സ്ഥാനാര്ത്ഥിയുടെയും ചെലവുകള് രേഖപ്പെടുത്തി വെക്കും. സ്ഥാനാര്ത്ഥികള് മണ്ഡലത്തില് നടത്തുന്ന പ്രചാരണപരിപാടികള് വിഡിയോ ക്യാമറയില് പകര്ത്തി സൂക്ഷിക്കും. രഹസ്യ നിരീക്ഷണ റജിസ്റ്റര് സൂക്ഷിക്കുന്നതിന് പ്രത്യേക അക്കൗണ്ടിംഗ് ഉദ്യോഗസ്ഥരെ നിയോഗിക്കും. സ്ഥാനാര്ത്ഥികള് അച്ചടി, ഇലക്ട്രോണിക് മാധ്യമങ്ങളിലൂടെ പരസ്യങ്ങളും പണം നല്കി വാര്ത്തകളും പ്രസിദ്ധീകരിക്കുന്നത് നിരീക്ഷിക്കാന് മീഡിയ സര്ട്ടിഫിക്കേഷന് ആന്ഡ് എക്സ്പന്റീച്ചര് കമ്മിറ്റികള് രൂപീകരിക്കും.
https://www.facebook.com/Malayalivartha
