ആദ്യം ആധാര്, പിന്നെ പാന്കാര്ഡ് ഇപ്പോഴിതാ രണ്ടും കൂടി ബന്ധിപ്പിക്കാനായി ജനങ്ങള് നെട്ടോട്ടമോടുന്നു
ആധാര് എടുക്കാനായിരുന്നു ആദ്യം ഓട്ടം അതിനുശേഷം പാന്കാര്ഡായി. ഇപ്പോഴിതാ രണ്ടും കൂടി ബന്ധിപ്പിക്കണമെന്ന നിര്ദ്ദേശം കൂടി ആയപ്പോള് ജനങ്ങള് നെട്ടോട്ടമോടുകയാണ്. അക്ഷയ ക്രേന്ദങ്ങള് കയറിയും ആദായനികുതി വകുപ്പ് നിര്ദേശിച്ച വെബ്സൈറ്റ് സന്ദര്ശിച്ചും ജനമാകെ ബുദ്ധിമുട്ടുകയാണ്. ഒന്നുകില് വെബ്സൈറ്റ് ജാം ആകും, അല്ലെങ്കില് കാര്ഡുകളിലെ പിശക്. ഏതായാലും ബന്ധിപ്പിക്കല് എളുപ്പമല്ല.
ആധാര് നമ്പര് പാന് കാര്ഡുമായി ജൂണ് 30ന് അകം നിര്ബന്ധമായും ബന്ധിപ്പിക്കണം എന്ന നിര്ദേശം വന്നതോടെ സാധ്യമാകാത്തവര് ആകെ അങ്കലാപ്പിലാണ്. ആധാര് കാര്ഡിലേയും പാന് കാര്ഡിലേയും പേരുകള് തമ്മിലുള്ള വ്യത്യാസം കാരണം പലര്ക്കും ഓണ്ലൈന് സേവനം വഴി ആധാര് നമ്പര് പാന് നമ്പറുമായി ബന്ധിപ്പിക്കാന് കഴിയുന്നില്ല എന്ന പരാതിയും വ്യാപകമാണ്.
ഉടമയുടെ പേരിന്റെ ഇനിഷ്യലോ ഒരു അക്ഷരത്തിന്റെ വ്യത്യാസമോ ഒഴികെയുള്ള പാന്, ആധാര് കാര്ഡുകള് ലിങ്ക് ചെയ്യാനാകില്ല. ജനനവര്ഷം വ്യത്യസ്തമായി രേഖപ്പെടുത്തിയാലും സ്ഥിതി ഭിന്നമല്ല. അതിനിടെ ആധാര് കാര്ഡ് എടുക്കുന്ന അക്ഷയകേന്ദ്രങ്ങളില് വന്തിരക്കാണ് അനുഭവപ്പെടുന്നത്. പരീക്ഷാഫലങ്ങളുടെ റിസല്ട്ടും വിദ്യാര്ഥികളുടെ തുടര്പഠനവുമായി ബന്ധപ്പെട്ട അപേക്ഷകളുടെ തിരക്കുമായതോടെ പല അക്ഷയകേന്ദ്രങ്ങളിലും നിന്നു തിരിയാന് ഇടമില്ലാത്ത അവസ്ഥയുമാണ്. വിലാസത്തിലെ മാറ്റങ്ങള് ആധാര് ബന്ധിപ്പിക്കലിനു തടസമാകില്ല. എന്നാല് തെറ്റുകള് കണ്ടെത്തി പരിഹരിക്കാനും അക്ഷയകേന്ദ്രങ്ങളെ ആശ്രയിക്കുന്നതിനാല് തിരക്ക് പിന്നെയും കൂടി.
ഓണ്ലൈന് വഴി ആധാര് നമ്പര് ബന്ധിപ്പിക്കാനായി ശ്രമിക്കുമ്പോള് നിര്ദിഷ്ട വെബ്സൈറ്റിലേക്കു പ്രവേശിക്കാന് പറ്റാത്തതാണ് ആളുകള് ചൂണ്ടിക്കാട്ടുന്ന പ്രധാനപ്രശ്നം. അക്ഷയകേന്ദ്രങ്ങളില് രാവിലെ മുതല് എത്തി ടോക്കണ് എടുത്തു കാത്തിരിക്കുന്നവര് തങ്ങളുടെ ഊഴമെത്തുമ്പോള് പേരിലെയും ഇനീഷ്യലിലെയും ജനനത്തീയതിയിലെയും പൊരുത്തക്കേടുകള് കാരണം ലിങ്ക് ചെയ്യാനാവാതെ ദിവസം മുഴുവന് പാഴാക്കി നിരാശയോടെയാണ് മടങ്ങുന്നത് . പലരും അവധിയെടുത്താണ് അക്ഷയകേന്ദ്രങ്ങളിലെത്തി കാത്തിരുന്നു കാര്യമുണ്ടാകാതെ മടങ്ങുന്നത്.
വിദേശത്തായതിനാല്, ആധാര് കാര്ഡ് എടുക്കാന് പറ്റാതിരുന്നവരെയും ഈ ലിങ്കിങ് നിര്ദേശം വെട്ടിലാക്കിയിട്ടുണ്ട്. ജൂണ് 30നകം പാന് കാര്ഡും ആധാര് കാര്ഡും ബന്ധിപ്പിക്കണമെന്ന ആദായ നികുതി വകുപ്പ് നിര്ദേശം മൂലം തങ്ങളുടെ ബാങ്ക് ഇടപാടുകള് പ്രതിസന്ധിയിലാകുമോയെന്ന ആശങ്കയിലാണ് ഉപയോക്താക്കള്.
പാന് നമ്പറും ആധാറും തമ്മില് ബന്ധിപ്പിക്കാന് ആദായനികുതിവകുപ്പിന്റെ വെബ്സൈറ്റിലാണ് സൗകര്യം. മൊബൈലിലൂടെയും സംയോജനം സാധ്യമാകുമെങ്കിലൂം സൈറ്റിലെ വന് തിരക്കുമൂലം പലപ്പോഴും കഴിയാറില്ല. പാന്കാര്ഡിലെ വിവരങ്ങള് ഓണ്ലൈനായി തിരുത്തി പുതിയ കാര്ഡ് എടുക്കാന് സാധിക്കും. ഇതിന് 112 രൂപയാണ് ഫീസ് അടയ്ക്കേണ്ടത്.
എന്നാല്, ഇതിനായി വിവരങ്ങള് നല്കുമ്പോള് ഇരുകാര്ഡുകളിലേയും പേരും ഇനീഷ്യലും ഒരുപോലെയല്ല എന്നതുപോലെയുള്ള കാരണങ്ങളാല് ഫീസ് ഇടാക്കിയശേഷം അപേക്ഷ തള്ളുന്നുണ്ട്. കഴിഞ്ഞമാസം അപ്ഡേറ്റ് ചെയ്ത ആധാറിന്റെ സോഫ്റ്റ്വേര് പണിമുടക്കിയതാണു കാരണം. സാങ്കേതികതടസം നേരിടുന്നതിനാല് ആധാര് സംബന്ധമായ മറ്റു ജോലികളും മുടങ്ങി.
https://www.facebook.com/Malayalivartha
