ഇന്ത്യയുടെ മുഖ്യ തെരഞ്ഞെടുപ്പ് കമ്മീഷണറായി അചല്‍ കുമാര്‍ ജ്യോതിയെ കേന്ദ്രസര്‍ക്കാര്‍ നിയമിച്ചു. ജൂലൈ ആറിന് അചല്‍ കുമാര്‍ സത്യപ്രതിജ്ഞ ചെയ്ത് അധികാരമേല്‍ക്കും. മുഖ്യ തെരഞ്ഞെടുപ്പ് കമ്മീഷണര്‍ നസീം സെയ്ദി വിരമിച്ച ഒഴിവിലാണ് ജ്യോതിയുടെ നിയമനം. 2015 ഏപ്രില്‍ 19-നാണ് സെയ്ദി രാജ്യത്തിന്റെ 20-ാമത് മുഖ്യ തെരഞ്ഞെടുപ്പ് കമീഷണറായി നിയമിതനായത്.

ഗുജറാത്ത് മുന്‍ ചീഫ് സെക്രട്ടറിയായ അചല്‍ കുമാറിനെ 2015 മേയ് ഏഴിനാണ് തെരഞ്ഞെടുപ്പ് കമീഷണറായി നിയമിച്ചത്. 1999-2004 വരെ ഗുജറാത്തിലെ കാണ്ട്‌ല പോര്‍ട്ട് ട്രസ്റ്റ് ചെയര്‍മാന്‍, സര്‍ദാര്‍ സരോവര്‍ നര്‍മദ നിഗം ലിമിറ്റഡ് ചെയര്‍മാന്‍ എന്നീ പദവികള്‍ വഹിച്ചിട്ടുണ്ട്. 1975 സിവില്‍ സര്‍വീസ് ബാച്ചുകാരനായ അചല്‍ കുമാര്‍ 2013 ജനുവരിയിലാണ് സര്‍വീസില്‍ നിന്ന് വിരമിച്ചത്. 

64-കാരനായ അചല്‍ കുമാറിന് മുഖ്യ തെരഞ്ഞെടുപ്പ് കമ്മീഷണര്‍ പദവിയില്‍ ഒരു വര്‍ഷം തുടരാം. മുഖ്യ തെരഞ്ഞെടുപ്പ് കമ്മീഷണര്‍ പദവിയില്‍ 65 വയസ് വരെയോ ആറു വര്‍ഷമോ ഇതില്‍ ആദ്യം ഏതാണോ അതാണ് കാലപരിധി.