ഹണിപ്രീതിനെ പ്രഖ്യാപിത കുറ്റവാളിയാക്കുമെന്ന് ഹരിയാന പോലീസ്
ബലാത്സംഗക്കേസില്‍ ജയിലില്‍ അടയ്ക്കപ്പെട്ട ദേര സച്ച സൗദ നേതാവ് ഗുര്‍മീതിന്റെ വളര്‍ത്തുമകളെന്ന് അവകാശപ്പെടുന്ന ഹണിപ്രീത് സിംഗിനെ പ്രഖ്യാപിത കുറ്റവാളിയായി പ്രഖ്യാപിക്കാന്‍ ഹരിയാന പോലീസ് ശ്രമം ആരംഭിച്ചു. കൂടാതെ, ഹണിപ്രീത്, ദേര നടത്തിപ്പു ചുമതലയിലുള്ള ആദിത്യ ഇന്‍സാന്‍, പവന്‍ ഇന്‍സാന്‍ എന്നിവരുടെ പേരിലുള്ള സ്വത്തുക്കള്‍ കണ്ടുകെട്ടാനും ശ്രമം തുടങ്ങി. ഇവരെ ഇതുവരെ കണ്ടെത്താന്‍ പോലീസിനു കഴിഞ്ഞിട്ടില്ല. ഹണിപ്രീതിനെതിരേ ഹരിയാന പോലീസ് കഴിഞ്ഞദിവസം എഫ്‌ഐആര്‍ രജിസ്റ്റര്‍ ചെയ്തിരുന്നു. പഞ്ച്കുളയിലെ സെക്ടര്‍ 5 പോലീസ് സ്‌റ്റേഷനിലാണ് ഹണീപ്രീതിനെതിരേ കേസ് രജിസ്റ്റര്‍ ചെയ്തിട്ടുള്ളത്.
മുമ്പ് രജിസ്റ്റര്‍ ചെയ്ത എഫ്‌ഐആറില്‍ ഹണിപ്രീതിന്റെ പേര് ഉള്‍പ്പെടുത്തുകയായിരുന്നെന്നു പഞ്ച്കുള പോലീസ് കമ്മിഷണര്‍ എ.എസ്.ചൗള അറിയിച്ചു. ദേരയുമായി ബന്ധപ്പെട്ട് പ്രവര്‍ത്തിച്ചിരുന്ന ആദിത്യ ഇന്‍സാന്‍, സുരീന്ദര്‍ ദിമാന്‍ എന്നിവര്‍ക്കെതിരേയും കേസ് രജിസ്റ്റര്‍ ചെയ്്തിട്ടുണ്ട്. ഹണിപ്രീതിനും കൂട്ടാളികള്‍ക്കുമെതിരേ ഹരിയാന പോലീസ് സെപ്റ്റംബര്‍ ഒന്നിന് ഇവര്‍ക്കെതിരേ ലുക്ക് ഔട്ട് നോട്ടീസ് പുറപ്പെടുവിച്ചിരുന്നു. ജയിലിലേക്കു കൊണ്ടുപോകും വഴി ഗുര്‍മീതിനെ രക്ഷപ്പെടുത്താന്‍ ഗൂഢാലോചന നടത്തിയെന്ന കേസിലാണ് ലുക്ക് ഔട്ട് നോട്ടീസ്.
നേപ്പാള്‍ അതിര്‍ത്തിയിലെ കപിലവസ്തു, മൊഹാന, ഷോഹ്രത്ഗഡ്, ദേബറുവ പോലീസ് സ്‌റ്റേഷനുകളില്‍ ഹണിപ്രീതിന്റെ ചിത്രങ്ങള്‍ പതിപ്പിച്ചു. നേപ്പാളുമായി അതിര്‍ത്തി പങ്കിടുന്ന മഹാരാജ്ഗഞ്ച്, ലഖിംപുര്‍, ബഹ്‌റായിച്ച് ജില്ലകളില്‍ പോലീസ് അതീവ ജാഗ്രതയിലാണ്. വിധിക്കുശേഷം കോടതിക്കു പുറത്തിറങ്ങിയ ഗുര്‍മീതിനെ രക്ഷപ്പെടുത്താന്‍ ശ്രമം നടന്നിരുന്നതായി പോലീസ് അറിയിച്ചിരുന്നു. വിധി എതിരായാല്‍ കോടതിയുടെ പുറത്തുകാത്തു നില്‍ക്കുന്ന അനുയായികള്‍ക്കു കലാപം തുടങ്ങാന്‍ ആഹ്വാനം നല്‍കുന്ന സന്ദേശം കൈമാറാനും പദ്ധതി തയ്യാറാക്കിയിരുന്നു.
ചുവന്ന ബാഗ് ഉയര്‍ത്തി കലാപത്തിന് ആഹ്വാനം നല്‍കാനായിരുന്നു പദ്ധതി. തന്റെ അംഗരക്ഷകരുടെ സഹായത്താല്‍ മറ്റൊരു കാറില്‍ കയറി രഹസ്യ കേന്ദ്രത്തിലേക്കു മാറാനായിരുന്നു ശ്രമം. എന്നാല്‍, പോലീസ് ഈ നീക്കങ്ങളെല്ലാം അവസരോചിത ഇടപെടലിലൂടെ തകര്‍ക്കുകയായിരുന്നു. കഴിഞ്ഞ മാസം 25നാണ് ഗുര്‍മീതിനു കോടതി 20 വര്‍ഷം തടവുശിക്ഷ വിധിച്ചത്.
അനുയായികളായ രണ്ടു സ്ത്രീകളെ ബലാത്സംഗം ചെയ്ത കേസിലാണ് വിധി. ഗുര്‍മീത് കുറ്റക്കാരനെന്നു കണ്ടെത്തിയതിനെ തുടര്‍ന്ന് ഉത്തരേന്ത്യന്‍ സംസ്ഥാനങ്ങളില്‍ പൊട്ടിപ്പുറപ്പെട്ട കലാപത്തില്‍ 38 പേര് മരിച്ചിരുന്നു.
https://www.facebook.com/Malayalivartha
