അലങ്കാരമത്സ്യങ്ങളെ വളര്‍ത്തുന്നതിനും വില്‍ക്കുന്നതിനും നിയന്ത്രണമേര്‍പ്പെടുത്തിക്കൊണ്ട് കേന്ദ്രസര്‍ക്കാര്‍ മുന്നോട്ടു വച്ച മൃഗങ്ങള്‍ക്കെതിരേയുള്ള ക്രൂരത (അക്വേറിയം ആന്‍ഡ് ഫിഷ് ടാങ്ക് ആനിമല്‍സ് ഷോപ്പ്) നിയമം 2017 പിന്‍വലിച്ചു. കേന്ദ്ര വനംപരിസ്ഥിതി മന്ത്രാലയം മുന്നോട്ടുവച്ച 395-ാം ഗസറ്റാണ് പിന്‍വലിച്ചതെന്ന് തമിഴ്‌നാട് കോലത്തൂര്‍ ഫിഷ് ഫാര്‍മര്‍ കോഓപ്പറേറ്റീവ് സൊസൈറ്റി പ്രസിഡന്റ് (കോഫ്‌കോസ്) എന്‍്.യു.എസ്. വീരമൈന്ദന്‍ അറിയിച്ചു. ഇതു സംബന്ധിച്ചുള്ള ഉത്തരവ് സര്‍ക്കാര്‍ വൈകാതെ പുറത്തിറക്കുമെന്നും അദ്ദേഹം പറഞ്ഞു.

അലങ്കാരമത്സ്യമേഖലയില്‍ പ്രതിസന്ധിയുയര്‍ത്തി മുന്നോട്ടുവച്ച നിര്‍ദേശത്തെത്തുടര്‍ന്ന് രാജ്യവ്യാപകമായി പ്രതിഷേധമുയര്‍ന്നിരുന്നു. ഉത്തരവ് പ്രാബല്യത്തിലായാല്‍ കേരളം, തമിഴ്‌നാട്, ആന്ധ്രപ്രദേശ്, പശ്ചിമബംഗാള്‍ തുടങ്ങിയ സംസ്ഥാനങ്ങളിലെ ലക്ഷക്കണക്കിന് അലങ്കാരമത്സ്യ കര്‍ഷകരെയും വ്യാപാരികളെയും പ്രതികൂലമായി ബാധിക്കുമായിരുന്നു.

ഇന്ത്യന്‍ കൗണ്‍സില്‍ ഓഫ് അഗ്രിക്കള്‍ച്ചറല്‍ റിസര്ച്ച് (ഐസിഎആര്‍), വിവിധ സംസ്ഥാനങ്ങളിലെ കര്‍ഷകര്‍, കര്‍ഷക സംഘടനകള്‍ എന്നിവരുടെ ശക്തമായ ഇടപെടലുകളാണ് നിയന്ത്രണം പിന്‍വലിക്കാന്‍ സര്‍ക്കാരിനെ പ്രേരിപ്പിച്ചതെന്നും അദ്ദേഹം പറഞ്ഞു.

ചെന്നൈ ആസ്ഥാനമായി പ്രവര്‍ത്തിക്കുന്ന കോഫ്‌കോസില്‍ പതിനായിരക്കണക്കിന് കര്‍ഷകര്‍ അംഗങ്ങളാണ്. ഇവരുടെയൊക്കെ ഉപജീവനമാര്‍ഗം ഇല്ലാതാവുന്നതു മുന്നില്‍ക്കണ്ടാണ് നിയന്ത്രണത്തിനെതിരേ കോഫ്‌കോസ് രംഗത്തിറങ്ങിയത്. രാജ്യത്തെ പ്രധാന അലങ്കാരവളര്‍ത്തുമത്സ്യ ഹബ്ബുകളാണ് ചെന്നൈയും കൊല്‍ക്കത്തയും.

അലങ്കാരമത്സ്യമേഖലയില്‍ കേന്ദ്രസര്‍ക്കാര്‍ നിയന്ത്രണം കൊണ്ടുവരുന്നെന്ന വാര്‍ത്ത പ്രചരിച്ചതോടെ കേരളത്തിലെ അലങ്കാരമത്സ്യമേഖലയുടെ പ്രവര്‍ത്തനങ്ങള്‍ താറുമാറായിരുന്നു. വില്‍പനയില്‍ ഗണ്യമായ കുറവുണ്ടായതായി കര്‍ഷകരും വ്യാപാരികളും സാക്ഷ്യപ്പെടുത്തുന്നു. പല കര്‍ഷകരുടെയും വിതരണത്തിനു തയാറായ മത്സ്യക്കുഞ്ഞുങ്ങള്‍ കെട്ടിക്കിടക്കുന്ന സ്ഥിതിയുണ്ടായി.