കുവൈറ്റില്‍ സ്വദേശി വത്ക്കരണ നടപടികള്‍ ആരംഭിച്ചതോടെ പൊതു മേഖലയിൽ പ്രവർത്തിക്കുന്ന വിദേശികളെ പിരിച്ചുവിടുന്നതിനുള്ള പഞ്ചവത്സര പദ്ധതിയിൽ ആദ്യവർഷം 2,799 പേരെ പിരിച്ചുവിട്ടു. 2017-2018 മുതൽ അഞ്ച് വർഷത്തിനിടെ 41,000 വിദേശികളെ പിരിച്ചുവിട്ട് പകരം സ്വദേശികൾക്ക് നിയമനം നൽകുക എന്നതാണ് പദ്ധതി.വിദ്യാഭ്യാസ മന്ത്രാലയത്തിൽ നിന്നാണ് ഭൂരിഭാഗം പേരെയും പിരിച്ചു വിട്ടത്. ആദ്യ വര്‍ഷം തന്നെ 1507 പ്രവാസികളെയാണ്കുവൈറ്റ് വിദ്യാഭ്യാസ മന്ത്രാലയത്തില്‍ നിന്നും പിരിച്ചു വിട്ടത്.

ഈ മേഖലയില്‍ ജോലി ചെയ്യുന്ന ആകെ 2799 പ്രവാസികളില്‍ 54 ശതമാനം വരും ഇത്. 2018 ജൂലൈ 1 മുതല്‍ ഔഖാഫ് മന്ത്രാലയത്തില്‍ നിന്നും 436 പ്രവാസികളെയാണ് പിരിച്ചുവിട്ടത്. മന്ത്രാലയത്തില്‍ ജോലി ചെയ്യുന്ന പ്രവാസികളില്‍ 16 ശതമാനം വരും ഇത്.

ഇവരെ കൂടാതെ, ആരോഗ്യമന്ത്രാലയത്തിൽനിന്ന് 273പേരെയും ജല-വൈദ്യുതി മന്ത്രാലയം 158 പേരെയും ആഭ്യന്തരമന്ത്രാലയം 155 പേരെയും നീതിന്യായ മന്ത്രാലയം 62പേരെയും തൊഴിൽ മന്ത്രാലയം 40 പേരെയും വാർത്താവിതരണ മന്ത്രാലയം 35 പേരെയും ധനമന്ത്രാലയവും വിദേശമന്ത്രാലയവും ആറുപേരെ വീതവും പ്രതിരോധമന്ത്രാലയം 6 പേരെയും സേവനമന്ത്രാലയം 3 പേരെയും യുവജനകാര്യമന്ത്രാലയം 2 പേരെയും പിരിച്ചുവിട്ടു.

അതേസമയം രാജ്യത്ത് തൊഴിലന്വേഷകരായ സ്വദേശികളുടെ എണ്ണം 13,253 ആയതായി സിവിൽ സർവീസ് കമ്മിഷൻ വ്യക്തമാക്കി. 3540 പുരുഷന്മാരും 9,983 വനിതകളുമാണ് തൊഴിൽ രഹിതരായി ഉള്ളത്. അവരിൽ 12 മാസത്തിലേറെയായി തൊഴിൽ ഇല്ലാത്തവർ 45.66%വരും.

ആറ് മാസത്തിലേറെയായി തൊഴിലന്വേഷകരായി കഴിയുന്നവർ 10.31% ആണ്. കഴിഞ്ഞ സാമ്പത്തിക വർഷവുമായി തുലനം ചെയ്‌താൽ തൊഴിലന്വേഷകരുടെ നിരക്ക് കുറവാണെന്നും സിവിൽ സർവീസ് കമ്മിഷന്റെ സ്ഥിതിവിവര കണക്ക് വെളിപ്പെടുത്തുന്നു. സർക്കാർ ജീവനക്കാരുടെ പെൻ‌ഷൻ പ്രായം കുറച്ചത് തൊഴിലന്വേഷകരായ ചെറുപ്പക്കാർക്ക് ഗുണം ചെയ്യുമെന്ന പ്രതീക്ഷയുണ്ട്. ആറ് മാസത്തിനകം മിക്കവർക്കും തൊഴിൽ ലഭിക്കുമെന്നാണ് കണക്കാക്കുന്നത്.