ഹജ്ജിന്റെ സുപ്രധാന ചടങ്ങായ അറഫ സംഗമത്തിനായി തീര്‍ഥാടകര്‍ ഇന്ന് അറഫയിലെത്തും... തീര്‍ഥാടകര്‍ പ്രാര്‍ഥനയില്‍ മുഴുകുന്ന അറഫയിലെ നമിറ പള്ളിയില്‍ ഓരോ തീര്‍ഥാടകനും രണ്ടു മീറ്റര്‍ അകലം പാലിച്ചാണ് ഇരിപ്പിടം, ജംറകളിലെറിയാനുള്ള കല്ലുകള്‍ മുസ്ദലിഫയില്‍ നിന്നാണ് തീര്‍ഥാടകര്‍ മുമ്പ് ശേഖരിച്ചിരുന്നതെങ്കില്‍ ഇത്തവണ ഹജ്ജിന് പുറപ്പെടുന്നതിനുമുമ്പുതന്നെ അധികൃതര്‍ അണുമുക്തമാക്കി പാക്കറ്റുകളില്‍ നല്‍കിയതാണ് തീര്‍ഥാടകരുടെ കൈയിലുണ്ടാവുക
ഹജ്ജിന്റെ സുപ്രധാന ചടങ്ങായ അറഫ സംഗമത്തിനായി തീര്‍ഥാടകര്‍ വ്യാഴാഴ്ച അറഫയിലെത്തും. കോവിഡ് പശ്ചാത്തലത്തില്‍ കര്‍ശന മുന്‍കരുതലുകള്‍ പാലിച്ചാണ് മിനായില്‍നിന്ന് 10 കി.മീറ്റര്‍ അകലെ അറഫ മൈതാനത്ത് ഭക്തിസാന്ദ്രമായ അന്തരീക്ഷത്തില്‍ വിദേശികളും സ്വദേശികളുമായ തീര്‍ഥാടകര്‍ സംഗമിക്കുന്നത്. അറഫ പ്രസംഗത്തിനും നമസ്‌കാരത്തിനും മുതിര്‍ന്ന പണ്ഡിത സഭാംഗവും റോയല്‍ കോര്‍ട്ട് ഉപദേഷ്ടാവുമായ ശൈഖ് അബ്ദുല്ല ബിന്‍ സുലൈമാന്‍ അല്‍മനീഅ് നേതൃത്വം നല്‍കും. 10 ലോക ഭാഷകളിലേക്ക് ഇത്തവണ പ്രസംഗം വിവര്‍ത്തനം ചെയ്യും. 'ലബ്ബൈക്കല്ലാഹുമ്മ ലബ്ബൈക്...'എന്നുരുവിട്ട് രാവിലെ അറഫയിലെത്തുന്ന തീര്‍ഥാടകര്‍ സൂര്യാസ്തമയംവരെ ഖുര്‍ആന്‍ പാരായണത്തിലും പ്രാര്‍ഥനകളിലും മുഴുകി ഇവിടെ കഴിയും. പിന്നീട് മുസ്ദലിഫയിലേക്ക് നീങ്ങും. അവിടെ രാപ്പാര്‍ത്തശേഷം വീണ്ടും മിനായില്‍ തിരിച്ചെത്തും.
ജംറകളിലെറിയാനുള്ള കല്ലുകള്‍ മുസ്ദലിഫയില്‍ നിന്നാണ് തീര്‍ഥാടകര്‍ മുമ്പ് ശേഖരിച്ചിരുന്നതെങ്കില്‍ ഇത്തവണ ഹജ്ജിന് പുറപ്പെടുന്നതിനുമുമ്പുതന്നെ അധികൃതര്‍ അണുമുക്തമാക്കി പാക്കറ്റുകളില്‍ നല്‍കിയതാണ് തീര്‍ഥാടകരുടെ കൈയിലുണ്ടാവുക. ജംറയിലെ കല്ലേറിനുശേഷം ബലിയറുക്കലും തലമുണ്ഡനവും ത്വവാഫ് ഇഫാദയും പോലുള്ള കര്‍മങ്ങള്‍ പൂര്‍ത്തിയാക്കും. പിന്നീട് രണ്ടു ദിനങ്ങള്‍ കൂടി മിനായില്‍ തങ്ങും. ഇത്തവണ യാത്രക്ക് ട്രെയിനിനുപകരം ബസുകളിലാണ് പുണ്യസ്ഥലങ്ങള്‍ക്കിടയിലെ യാത്ര. കോവിഡ് പശ്ചാത്തലത്തില്‍ പരിമിതമായ തീര്‍ഥാടകരാണ് അറഫയിലെത്തുന്നതെങ്കിലും സുരക്ഷ, ആരോഗ്യരംഗത്ത് എല്ലാ സൗകര്യങ്ങളും സൗദി ഭരണകൂടം ഒരുക്കിയിട്ടുണ്ട്.
തീര്‍ഥാടകര്‍ പ്രാര്‍ഥനയില്‍ മുഴുകുന്ന അറഫയിലെ നമിറ പള്ളിയില്‍ ഓരോ തീര്‍ഥാടകനും രണ്ടു മീറ്റര്‍ അകലം പാലിച്ചാണ് ഇരിപ്പിടം.പുറത്ത് തമ്പുകളില്‍ സാമൂഹിക അകലം പാലിച്ചാണ് താമസ സൗകര്യവും.
"
https://www.facebook.com/Malayalivartha
