മൊറോക്കോയിലെ മരം കയറുന്ന ആടുകള്!
വടക്കന് ആഫ്രിക്കയിലെ മൊറോക്കോയിലെത്തിയാല് ഒരു അസാധാരണ കാഴ്ച കാണാം. അണ്ണാറക്കണ്ണന്മാരെ പോലെ വലിയ മരങ്ങളുടെ ശിഖരങ്ങളില് കയറി നിന്നു സുഖമായി പഴങ്ങള് ഭക്ഷിക്കുന്ന ആടുകളെ കാണാം. ഒന്നും രണ്ടുമല്ല കൂട്ടമായാണ് ആടുകളുടെ ഈ മരംകയറ്റം.
ഒരേയൊരു മരത്തിലേ ഇവ ഇങ്ങനെ കൂട്ടമായി കയറാറുള്ളൂ. അര്ഗന് എന്നറിയപ്പെടുന്ന അര്ഗനിയാ സ്പിനോസ എന്ന മരത്തിലാണ് ഇത്തരത്തില് ആടുകള് കൂട്ടമായി കയറുന്നത് ഈ മരത്തിലെ പഴങ്ങള് ആടുകള്ക്ക് ഏറെ ഇഷ്ടമാണ്.
താഴെനിന്ന് എത്തിപ്പിടിച്ച് പഴങ്ങള് കഴിച്ച് അതിന്റെ സ്വാദു പിടിച്ചതോടെയാണ് പഴങ്ങള് തേടി അവ മരം കയറാന് തുടങ്ങിയത്. എന്നാല് ഈ പഴങ്ങള് മനുഷ്യര് ഭക്ഷിക്കാറുമില്ല. 30 അടി പൊക്കമുള്ള അര്ഗന് മരങ്ങളില് വരെ, മൊറോക്കോയിലെ ആടുകള് കയറും. പിളര്ന്ന രീതിയിലുള്ള കുളമ്പുകളാണ് അവയെ മരം കയറാന് സഹായിക്കുന്നത്.
അര്ഗന് മരത്തിലെ പഴങ്ങളുടെ കുരുക്കളില് നിന്നും ഉല്പാദിപ്പിക്കുന്ന അര്ഗന് ഓയിലിന് ലോകമൊട്ടാകെ ഏറെ ആവശ്യക്കാരാണുള്ളത്. ഈ എണ്ണ പാചകത്തിനും സൗന്ദര്യ വര്ധക വസ്തുക്കളിലും ധാരാളമായി ഉപയോഗിക്കാറുണ്ട്.
അര്ഗന് പഴങ്ങളുടെ കുരുക്കള് ആടുകളുടെ വിസര്ജ്യത്തില് നിന്നും ശേഖരിച്ച് അവ കഴുകി ഉണക്കിയെടുത്താണ് മിക്ക കര്ഷകരും അര്ഗന് ഓയില് ഉണ്ടാക്കുന്നത്. തന്മൂലം ആടുകളുടെ മരം കയറ്റം രാജ്യത്തിലെ ഏറ്റവും വലിയ ഒരു വ്യവസായത്തെ സഹായിക്കുന്നുമുണ്ട്.
ഇതിനുപുറമേ മൊറോക്കോയുടെ ടൂറിസം മേഖലയിലും ആടുകളുടെ മരംകയറ്റം സ്വാധീനം ചെലുത്തുന്നുണ്ട്. ഈ അപൂര്വമായ കാഴ്ച കാണാനായി മാത്രം മൊറോക്കോയിലേക്കെത്തുന്ന സന്ദര്ശകരും കുറവല്ല.
https://www.facebook.com/Malayalivartha
