രോഗത്തില്‍ നിന്നും മുക്തി നേടുവാനായി വെസ്റ്റ് ബംഗാള്‍ സ്വദേശിനിയായ ഒരു അറുപത്തിയഞ്ചുകാരി ദിവസം മുഴുവനും വെള്ളത്തില്‍ കിടക്കുന്നു.

കഴിഞ്ഞ ഇരുപതു വര്‍ഷങ്ങളായി പകല്‍ സമയം മുഴുവന്‍ വീടിനു സമീപമുള്ള നദിയിലാണ് ഇവര്‍ മുങ്ങി കിടക്കുന്നത്. ഇവര്‍ താമസിക്കുന്ന ഗ്രാമത്തിന്റെ പേര് വ്യക്തമല്ല. എല്ലാ ദിവസവും സൂര്യന്‍ ഉദിക്കുന്നതിനു മുന്‍പേ തന്നെ എഴുന്നേല്‍ക്കുന്ന ഇവര്‍ തലയില്‍ തുണിയിട്ടു മൂടി കഴുത്തറ്റം വെള്ളത്തില്‍ മുങ്ങിക്കിടക്കുകയാണ് പതിവ്.

1998 മുതലാണ്, അതായത് ഇരുപത് വര്‍ഷങ്ങള്‍ക്കു മുന്‍പാണ് ഇവര്‍ ഈ ശീലം ആരംഭിച്ചത്. സൂര്യ പ്രകാശം ശരീരത്തില്‍ വീഴുമ്പോള്‍ ഇവര്‍ക്ക് അസഹനീയമായ വേദനയും പൊള്ളലും അനുഭവപ്പെടും. ഇതില്‍ നിന്നും മുക്തി നേടുവാനായാണ് ഇവര്‍ വെള്ളത്തില്‍ മുങ്ങി കിടക്കുന്നത്. എല്ലാ ദിവസവും 12 മുതല്‍ 14 മണിക്കൂര്‍ വരെയാണ് ഇവര്‍ വെള്ളത്തില്‍ കിടക്കുന്നത്.

സാമ്പത്തികമായി വളരെ പിന്നോക്കാവസ്ഥയിലുള്ള ഇവരുടെ കുടുംബത്തിന് ആശുപത്രിയില്‍ പോയി ചികിത്സ തേടുന്നതിനുള്ള ബുദ്ധിമുട്ടുകൊണ്ടാണ് ഇത്തരത്തില്‍ പ്രശ്‌നത്തിനുള്ള പരിഹാരം ഇവര്‍ കണ്ടെത്തുന്നത്. അരിയും കുറച്ചു പച്ചക്കറികളും വെള്ളവുമാണ് ഇവര്‍ ദിവസേന ഭക്ഷിക്കുന്നത്. ഇവര്‍ വെള്ളത്തില്‍ കിടക്കുമ്പോള്‍ കുടുംബാംഗങ്ങളാണ് ഭക്ഷണം നദിക്കരയില്‍ എത്തിച്ചു നല്‍കുന്നത്.

വെള്ളത്തില്‍ കിടക്കുന്ന സമയം ഇവരെ കാണുവാനായി എല്ലാ ദിവസവും ബന്ധുക്കളും മറ്റ് ഗ്രാമവാസികളും എത്താറുണ്ട്. ഇവരുടെ ആരോഗ്യത്തെക്കുറിച്ചോര്‍ത്ത് എല്ലാവര്‍ക്കും ആശങ്കയുണ്ടെങ്കിലും സഹായിക്കുവാനായി ആരും എത്തുന്നില്ലെന്നുള്ളതാണ് പ്രധാനപ്രശ്‌നം.