ബോളിവുഡില്‍ ആരാധകര്‍ ഏറെ കാത്തിരുന്ന ദിവസമായിരുന്നു പ്രിയങ്ക-നിക്ക് വിവാഹദിനം. ദീര്‍ഘനാളുകളായി പ്രണയത്തിലായിരുന്ന ഇവര്‍ രാജസ്ഥാനിലെ ജോധ്പൂരില്‍ വെച്ചാണ് വിവാഹിതരായത്. ഉമൈദ് ഭവന്‍ കൊട്ടാരത്തില്‍ ക്രിസ്തീയ ആചാരപ്രകാരമായിരുന്നു വിവാഹം.

ബോളിവുഡ് ഉറ്റുനോക്കിയ ഈ വിവാഹത്തിനു ശേഷം ശ്രദ്ധാകേന്ദ്രമാകുകയാണ് പ്രിയങ്കയുടെ ഭാവി പ്രവചിച ന്യുമറോളജിസ്റ്റ് സഞ്ജയ് ബി ജുമാനി. 36-ാം വയസില്‍ പ്രിയങ്ക വിവാഹിതയാകുമെന്ന് പതിമൂന്ന് വര്‍ഷങ്ങള്‍ക്കു മുന്‍പേ തന്നെ താന്‍ പ്രവചിച്ചിരുന്നുവെന്ന് ഇയാള്‍ അവകാശപ്പെടുന്നു. 45-ാം വയസില്‍ രാഷ്ട്രീയ പ്രവേശനം നടത്തുമെന്നാണ് ജൂമാനിയുടെ അടുത്ത പ്രവചനം.

ന്യൂമറോളജി പ്രകാരം പ്രിയങ്കയുടെ ഭാഗ്യ നമ്പര്‍ ഒമ്പത് ആണത്രേ. ഒമ്പത് പ്രിയങ്കയ്ക്ക് ഭാഗ്യം കൊണ്ടു വരുമെന്നും ജുമാനി പറഞ്ഞു. ദാമ്പത്യ ഐക്യത്തിനായി പ്രിയങ്കയുടെ പേരിനൊപ്പം ജോനാസ് എന്ന് ചേര്‍ക്കണമെന്നും ജുമാനി പറയുന്നു. ചൊവ്വയാണ് അധിപനെന്നതിനാല്‍ ഇവര്‍ ജീവിതത്തിന്റെ മുന്‍പന്തിയില്‍ തന്നെ എത്തുമെന്നും നേതൃനിരയില്‍ എത്തുമെന്നും ജുമാനി പറയുന്നു.

ന്യൂമറോളജി അനുസരിച്ച് ആധിപത്യ മനോഭാവവും എടുത്തുചാട്ടവും ഉളള പ്രകൃതമായതിനാല്‍ നിക്ക് ജാഗ്രത പുലര്‍ത്തണമെന്നും പഞ്ചഭൂതങ്ങളില്‍ ജലവും ഭൂമിയുമാണ് ഇവരുടെ ചിഹ്നങ്ങള്‍ എന്നതിനാല്‍ ഇരുവരും മികച്ച പങ്കാളികളായിരിക്കുമെന്നും ജുമാനി പറയുന്നു. നിക്കിന്റെ പേരില്‍ നിന്ന് ലഭിക്കുന്ന സംഖ്യ 2 ആണെന്നും പ്രിയങ്കയുടെ ചെല്ലപേരായ പീസിയില്‍ നിന്നും ലഭിക്കുന്നതും രണ്ടാണെന്ന് ജുമാനി പറയുന്നു.

ശാന്തയാകാന്‍ പ്രിയങ്കയ്ക്ക് യോഗയും വ്യായാമവും ജുമാനി നിര്‍ദ്ദേശിക്കുന്നു. പ്രിയങ്ക ചോപ്ര എന്ന പേര് കൂട്ടുമ്പോള്‍ ലഭിക്കുന്ന നമ്പറുകള്‍ വഞ്ചനയേയും ചതിയേയും കുറിക്കുന്നത് കൊണ്ടാണ് പ്രിയങ്ക ജോനാസ് എന്ന പേര് താന്‍ നിര്‍ദ്ദേശിക്കുന്നതെന്നും അത് ഭാഗ്യം കൊണ്ടു വരുമെന്നു ജുമാനി പ്രവചിക്കുന്നു. ജുമാനിയുടെ പ്രവചനത്തെ എതിര്‍ത്തും അനുകൂലിച്ചും സമൂഹമാധ്യമങ്ങളില്‍ ചര്‍ച്ചകളും സജീവമാണ്.