അടുത്തിടെ ട്രാഫിക് ബോധവല്‍ക്കരണത്തിന്റെ ഭാഗമായി ഒട്ടേറെ രസകരമായ ട്രോളുകള്‍ പൊലീസ് പങ്കുവച്ചിരുന്നു. ഇതിന് താഴെ ഇട്ട ഒരു കമന്റാണ് ഇപ്പോള്‍ ട്രോളുകളേക്കാള്‍ ഹിറ്റ്.

'ഞങ്ങള്‍ ഹെല്‍മെറ്റ് വയ്ക്കാതെ വന്നാല്‍ അതിന്റെ ഫൈന്‍ കേരള പൊലീസിലേക്കല്ലേ പോകുന്നത്. ഉണ്ണുന്ന ചോറിന് നന്ദി എങ്കിലും കാണിക്ക് അണ്ണാ..' എന്നായിരുന്നു ഒരാളുടെ കമന്റ്.

ഉരുളയ്ക്ക് ഉപ്പേരിപോലെ മറുപടി കൊടുക്കാറുള്ള പൊലീസ് ഇത്തവണ ചിരിപ്പിച്ചില്ല. ആരുടെയും ഉള്ളുലയ്ക്കുന്ന മറുപടിയാണ് കൊടുത്തത്. ചിതറിയ ജീവനുകള്‍ റോഡില്‍ നിന്നും വാരിയെടുക്കേണ്ടി വരുമ്പോള്‍ പലദിനവും ആ ഓര്‍മയില്‍ ഉണ്ണാന്‍ പോലും കഴിയാറില്ല ബ്രോ..' ഈ മറുപടിക്ക് അപ്പുറം ഒരു കമന്റും ഒരു ബോധവല്‍ക്കരണവും നല്‍കാനില്ലെന്നാണ് സമൂഹമാധ്യമങ്ങളിലെ ഇപ്പോഴത്തെ ചര്‍ച്ച.

ട്രോളായും ചിരിയായും മാത്രമല്ല. നല്ല ഉള്ളുലയ്ക്കുന്ന മറുപടിയും നല്‍കാനറിയാം നമ്മുടെ പൊലീസിന് എന്ന് തെളിയിക്കുകയാണ് ഈ മറുപടി.