മാതൃസ്നേഹം മഹത്തരം എന്നത് കേട്ടറിവ് മാത്രമല്ല നമ്മളിൽ പലരും അനുഭവസ്ഥരാണ്. പെറ്റമ്മയ്ക്കു തന്റെ കുഞ്ഞിനെ പിരിയുന്നതിനോളം വേദന മറ്റൊന്നില്ല .കഥകളിൽ മാത്രമല്ല ജീവിതത്തിലും തന്റെ കുഞ്ഞിനെ നഷ്ടപ്പെടുത്തുന്ന അമ്മയുടെ മനോവേദന മരണംവരെ അവരെ വേട്ടയാടും എന്നതാണ് യാഥാർഥ്യം. മാനുഷനിലായാലും മൃഗങ്ങളിലായാലും ഈ നഷ്ട്ടപ്പെടലിന്റെ വേദനയുടെ തീവ്രത ഒന്നുതന്നെ .

എന്നാൽ സോഷ്യൽമീഡിയയെ കണ്ണീരണിയിക്കുകയാണ് അത്തരമൊരു കാഴ്ച്ച. ഓരുകോടിയിലധികം ഹൃദയങ്ങളെ വേദനിപ്പിച്ച ആ അമ്മ ഒരു തെരുവ് നായയാണ്. പ്രസവിച്ച കുഞ്ഞിനെ വളർത്താനായി ഒരുയുവതി കൊണ്ടുപോകുന്നിടത്താണ് വീഡിയോ ആരംഭിക്കുന്നത്. തന്റെ കുഞ്ഞിനെ കൊണ്ടുപോകുന്നവരോടൊപ്പം ആ അമ്മയും പിന്തുടരുന്നു . നിർത്തിയിട്ടിരിക്കുന്ന സ്‌കൂട്ടറിന്റെ സമീപത്തു
എത്തുന്നതോടെ തന്റെ കുഞ്ഞിനെ അവസാനമായി ഒന്ന് ചുംബിക്കാൻ യുവതിയോട് ആവശ്യപ്പെടുന്നതായി പ്രേക്ഷകർക്ക് തോന്നും വിധത്തിൽ യുവതിക്കുനേരെ മുഖമുയതി നോക്കുന്നു ആ അമ്മ. ആ അമ്മയുടെ അപേക്ഷ മനസ്സിലാക്കിയ യുവതി നായയ്ക്ക് നേരെ അതിന്റെ കുഞ്ഞിനെ നീട്ടുന്നു. നിറകണ്ണുകളോടെ ഹൃദയം നുറുങ്ങുന്ന വേദനയോടെ തന്റെ കുഞ്ഞിനെ നക്കിത്തുടയ്ക്കുന്ന നായ കുറച്ചുനേരം കൂടി തന്റെ കുഞ്ഞിനെ തന്റെ മുഖത്തോട് ചേർത്തുനിർത്തുന്നതായി നമുക്ക് വീഡിയോയിൽ കാണാം. നായയുടെ സമീപത്തുനിന്നും കുഞ്ഞിനെ കൊണ്ടുപോകുന്നതിന് മുമ്പായി ആ അമ്മയ്ക്ക് മുന്നിലേക്ക് ഒരിക്കൽക്കൂടി യുവതി അതിന്റെ കുഞ്ഞിനെ നീട്ടുന്നു. ചെവിയിൽ എന്തോ പറയുന്നതുപോലെ തന്റെ മുഖത്തെ ചേർത്ത് ചുംബിച്ച ശേഷം പെട്ടന്ന് നായ തിരിഞ്ഞ് നടക്കുന്നു പ്രേക്ഷകരെ കണ്ണീരണിയിക്കുന്ന ആ മടക്കയാത്രയിൽ തിരിച്ചുവരും എന്ന് തോന്നുംപോലെ തന്റെ മുഖം കുഞ്ഞിനു നേരെ തിരിക്കുന്നെങ്കിലും എന്തോ തീരുമാനിച്ചുറപ്പിച്ചപോലെ ആ അമ്മ നടന്നകലുന്നു.

തന്റെ കുഞ്ഞിന്റെ നല്ല ഭാവിക്കായി വേദനയോടെ നടന്നകലുന്ന മാതാവിന്റെ വീഡിയോ ഒരുകോടിലധികം പേരാണ് ഇതുവരെ കണ്ടത്.