102-ല് എത്തിയ ഏലിക്കുട്ടിയമ്മയ്ക്ക് ഒരേ ഒരു നിര്ബന്ധമേയുള്ളൂ. എന്നും പത്രം വായിക്കണം!
'രാവിലെയും വൈകുന്നേരവും ഓരോ ഗ്ലാസ് കാപ്പി കുടിക്കണം, കാപ്പിയില് കുറവുവന്നാലും സഹിക്കാം പക്ഷേ, രാവിലെ ദീപിക പത്രം കിട്ടാതിരിക്കാനാകില്ല.' 102 പിന്നിട്ട് നാലു തലമുറകളുടെ അമ്മയായ ഏലിക്കുട്ടി പാലയ്ക്കല് തറവാട്ട് വീടിന്റെ പൂമുഖപ്പടിയിലിരുന്ന് ഇതു പറയുമ്പോള് മുഖത്തു തികഞ്ഞ ഗൗരവം.
കരിമരുന്നു കലാപ്രകടനരംഗത്തു ശ്രദ്ധേയരായ കുറവിലങ്ങാട് പാലയ്ക്കല് വീട്ടിലെ മുത്തശിയാണ് 102 പിന്നിട്ട ഏലിക്കുട്ടിയമ്മച്ചി. നാലു തലമുറകള് കണ്കുളിര്ക്കെ കണ്ട അമ്മച്ചിക്കു ജീവിത സായാഹ്നത്തിലും ഒറ്റവാശി മാത്രമേ ഉള്ളൂ, അതു പത്രം വായനയാണ്. ഏതെങ്കിലും പത്രം വായിച്ചാല് പോരാ, ദീപിക തന്നെ വായിക്കണം. രാവിലെ ദീപികയിലെ തലവാചകങ്ങള് മുഴുവന് വായിക്കും. അമ്മച്ചിയുടെ ഭാഷയില് പറഞ്ഞാല് വെയിലുറച്ചാലേ കുഞ്ഞക്ഷരങ്ങള് കാണാനാകൂ. ഇപ്പോഴും കണ്ണടയെ ആശ്രയിക്കാത്ത ഈ അമ്മച്ചിക്ക് ഒരു കാര്യത്തിനും ആരുടെയും സഹായം ആവശ്യമില്ല. വീട്ടിലുടുക്കുന്ന കൈലിമുണ്ടും ചട്ടയും അലക്കിയുണക്കുന്നതും തനിച്ചുതന്നെ.
ദീപികയുമായുള്ള അമ്മച്ചിയുടെ അടുപ്പം രക്തബന്ധം പോലെയാണ്. അതിനു കാരണമെന്തെന്നു ചോദിച്ചാല് അതങ്ങനെയാണെന്നു മറുപടി. ഇപ്പോഴും അത്യാവശ്യം ജോലികളില് സഹായിക്കുന്ന അമ്മച്ചിക്ക് മരുമകളെയും പേരക്കുട്ടികളെയും കൂടുതല് സഹായിക്കാനാകുന്നില്ലെന്ന വിഷമം മാത്രമേയുള്ളൂ.
മുട്ടുചിറ കുരിശുമൂട്ടില് കുടുംബാംഗമായ അമ്മച്ചി 14 വയസുള്ളപ്പോഴാണ് കുറവിലങ്ങാട് പാലയ്ക്കല് പി.ജെ. തോമസി(പാപ്പന്) ന്റെ വധുവായി പാലയ്ക്കല് തറവാട്ടിലേക്കു കടന്നെത്തിയത്. വിവാഹത്തെക്കുറിച്ചൊക്കെ ഇന്നലെ എന്നതുപോലെ ഓര്മ. 'ഇന്നത്തെപ്പോലെയെന്നുമല്ല മക്കളേ അന്ന്, മുട്ടുചിറയില് നിന്ന് നടന്നാണ് കുറവിലങ്ങാട് പള്ളിയിലേക്കു വന്നത്, കുറവിലങ്ങാട്ട് വന്നുകഴിഞ്ഞാണ് മണവാട്ടിയുടെ മുണ്ടും കവണിയുമൊക്കെ ധരിച്ചത്' പറഞ്ഞുനിര്ത്തുമ്പോള് പ്രായം ചുളിവുകള് സമ്മാനിച്ച മുഖത്തു തെല്ലു നാണം.നാലു വര്ഷം പിന്നിട്ടതോടയാണ് അവരുടെ ദാമ്പത്യവല്ലരി മൊട്ടിട്ടത്. സമ്മാനമായി ഒമ്പതു മക്കളെ ലഭിച്ചു. ഇവരില് മൂന്നുപേര് ബാല്യത്തില് തന്നെ മരിച്ചു. അമ്മച്ചിയുടെ ജീവിതപങ്കാളി പി.ജെ. തോമസ് 1997-ലും മക്കളില് പി.ടി. ജോസഫ് 2007-ലും യാത്ര പറഞ്ഞുപോയത് അമ്മച്ചിക്ക് ഇന്നും വലിയ വേദനയാണ്.
മക്കളില് പി.ടി. തോമസ് ദീപികയുടെ ഏജന്റായതിനാല് മുടക്കം കൂടാതെയും സമയത്തും പത്രം ലഭിക്കുമെന്നത് മകനുള്ള അമ്മച്ചിയുടെ അംഗീകാരംകൂടിയാണ്. അമ്മച്ചിയുടെ ഉച്ചത്തിലുള്ള പത്രവായന നാലാം തലമുറക്കാര്ക്കു വലിയ ആവേശമാണ്. പത്രം വായിക്കാനും വിശേഷങ്ങള് പങ്കുവയ്ക്കാനും അവര് അമ്മച്ചിക്കൊപ്പം കൂടും. വീട്ടുകാര്ക്കു മാത്രമല്ല, നാട്ടുകാര്ക്കു മുഴുവന് അമ്മച്ചി പ്രിയങ്കരിയാണ്.
https://www.facebook.com/Malayalivartha