ഉപയോക്‌താക്കള്‍ക്ക് ഇഷ്‌ടമുള്ള ചാനലുകള്‍ തെരഞ്ഞെടുക്കാനുള്ള സംവിധാനം അടുത്തമാസം ഒന്നിന്‌ നിലവില്‍വരുമെന്നു ടെലികോം റെഗുലേറ്ററി അതോറിട്ടി ഓഫ്‌ ഇന്ത്യ(ട്രായ്‌). നൂറ്‌ സൗജന്യ/പേ ചാനലുകള്‍ക്ക്‌ നികുതി ഉള്‍പ്പെടെ പ്രതിമാസം 153.40 രൂപ ഈടാക്കാമെന്നും ട്രായ്‌ ഉത്തരവിട്ടു. ഈ മാസം 31-നു മുമ്പ്‌ ചാനലുകള്‍ ഏതൊക്കെയെന്ന്‌ ഉപയോക്‌താക്കള്‍ തീരുമാനിക്കണമെന്നും ട്രായ്‌ അറിയിച്ചു. 

അതേസമയം, അടിസ്‌ഥാന പാക്കേജില്‍ ഹൈ ഡെഫനിഷന്‍(എച്ച്‌.ഡി) ചാനലുകള്‍ ഉള്‍പ്പെടുന്നില്ല. എന്നാല്‍, ഒരു എച്ച്‌.ഡി. ചാനല്‍ രണ്ട്‌ സാധാരണ ചാനലുകള്‍ക്ക്‌ തുല്യമാണെന്നും അതിനാല്‍ എച്ച്‌.ഡി ചാനല്‍ തെരഞ്ഞെടുക്കാനാകുമെന്നും റിപ്പോര്‍ട്ടുകളുണ്ട്‌. എന്നാല്‍, ഇക്കാര്യത്തില്‍ വ്യക്‌തത വന്നിട്ടില്ല. സേവനദാതാക്കളുമായി ബന്ധപ്പെട്ടാല്‍ മാത്രമേ ഇക്കാര്യം അറിയാന്‍ കഴിയൂ. സംശയങ്ങള്‍ക്കും വിശദവിവരങ്ങള്‍ക്കുമായി 011-23237922, 011-23220209 എന്നീ ഫോണ്‍ നമ്പരുകളില്‍ ബന്ധപ്പെടാവുന്നതാണെന്ന്‌ ട്രായ്‌ അറിയിച്ചു.

avdbcs-2@trai.gov.in, arvin@dgov.inഎന്നീ ഇ-മെയില്‍ വിലാസങ്ങളിലേക്ക്‌ ഇ-മെയില്‍ സന്ദേശം അയച്ചും സംശയങ്ങള്‍ അകറ്റാം. ട്രായ്‌ വെബ്‌സൈറ്റിലും സേവനദാതാക്കളുടെ വെബ്‌സൈറ്റിലും എച്ച്‌.ഡി/പേ ചാനലുകളുടെ വില ഉള്‍പ്പെടെയുള്ള വിവരങ്ങള്‍ ലഭിക്കും. അതേസമയം, ഒരു ചാനലിന്റെ പരമാവധി വില പ്രതിമാസം 19 രൂപയായി നിജപ്പെടുത്തിയിട്ടുണ്ട്‌. പേ ചാനലുകളുടെയും ഫ്രീ ടു എയര്‍ ചാനലുകളുടെയും പട്ടികയില്‍നിന്ന്‌ ഉപയോക്‌താക്കള്‍ക്ക്‌ ജനുവരി 31 വരെ ഇഷ്‌ടചാനലുകള്‍ തെരഞ്ഞെടുക്കാം. ഫെബ്രുവരി 1ന്‌ പുതിയ വരിസംഖ്യാനിരക്ക്‌ പ്രാബല്യത്തിലാകും.

 ടെലികോം അതോറിറ്റി ഓഫ് ഇന്ത്യയുടെ പുതിയ കേബിൾ, ഡിടിഎച്ച് പരിഷ്കാരങ്ങൾ നടപ്പിൽ വരുന്നതോടെ നിലവിലെ കണക്ഷനുകൾക്ക് എന്തു സംഭവിക്കുമെന്ന സംശയം ഇപ്പോഴും നിലനിൽക്കുന്നുണ്ട്. പുതിയ സ്കീമിലേക്ക് മാറാനുള്ള സമയം ഡിസംബർ 29 എന്നുള്ളത് ജനുവരി 31 ലേക്ക് മാറ്റിയിരുന്നു. എന്നാൽ നിലവിലെ കണക്‌ഷനുകൾക്ക് എന്തു സംഭവിക്കുമെന്നാണ് മിക്ക ഉപയോക്താക്കളും ചോദിക്കുന്നത്.

പുതിയ ഉത്തരവ് പ്രകാരം ജനുവരി 31 നു മുൻപ് നിലവിലെ ഉപയോക്താക്കൾ ചാനലുകൾ തിരഞ്ഞെടുക്കേണ്ടതുണ്ട്. എന്നാൽ ജനുവരി 31 നു മുൻപ് ചാനലുകൾ തിരഞ്ഞെടുത്തില്ലെങ്കിലും പഴയ സ്കീം പ്രകാരം കണക്‌ഷൻ ലഭിക്കുമെന്നാണ് ട്രായി അറിയിച്ചിരിക്കുന്നത്. പുതിയ പ്ലാനിലേക്ക് മാറുന്നില്ലെങ്കിൽ പഴയ നിരക്ക് തന്നെ നൽകിയ കേബിളും ഡിടിഎച്ചും ഉപയോഗിക്കാം. എന്നാൽ അധികം വരുന്ന പേ ചാനലുകൾക്ക് ഓരോന്നിനും പ്രത്യേകം പണം നൽകേണ്ടി വരും.

ഡിടിഎച്ച്, കേബിൾ ഓപ്പറേറ്റർമാരെല്ലാം പുതുക്കിയ ചാനൽ നിരക്കുകൾ ഔദ്യോഗിക വെബ്സൈറ്റുകളിൽ ലിസ്റ്റ് ചെയ്തിട്ടുണ്ട്. എയർടെൽ ഡിജിറ്റൽ ടിവി, ഡിഷ് ടിവി, സിതി കേബിൾ, ഡെൻ നെറ്റ്‌വർക്ക് എന്നിവരെല്ലാം പുതിയ നിരക്കുകൾ പ്രഖ്യാപിച്ചു.

പുതിയ നിർദേശമനുസരിച്ച് ടിവി ചാനലുകൾ ലഭ്യമാക്കാൻ കേബിൾ ഓപ്പറേറ്റർമാർക്കും ഡയറക്ട് ടു ഹോം (ഡിടിഎച്ച്) സർവീസുകൾക്കും ടെലികോം നിയന്ത്രണ അതോറിറ്റി (ട്രായ്) ഒരു മാസം കൂടി അനുവദിച്ചു. പേ ചാനലുകളുടെയും ഫ്രീ ടു എയർ ചാനലുകളുടെയും പട്ടികയിൽ നിന്ന് ഉപയോക്താക്കൾക്ക് ജനുവരി 31 വരെ ഇഷ്ടചാനലുകൾ തിരഞ്ഞെടുക്കാനുള്ള അവസരം ലഭിക്കും. ഫെബ്രുവരി 1ന് പുതിയ വരിസംഖ്യാനിരക്ക് പ്രാബല്യത്തിലെത്തും. ചാനലുകൾ സംബന്ധിച്ചു കൃത്യമായ വിവരങ്ങൾ ലഭിക്കാത്തതിനാലും മറ്റും ഒട്ടേറെ കുപ്രചാരണങ്ങൾ നടക്കുന്നതിനാൽ ഉപയോക്താക്കളുടെ തെറ്റിദ്ധാരണകൾ മാറാനാണു കൂടുതൽ സമയം അനുവദിക്കുന്നതെന്ന് ട്രായ് സെക്രട്ടറി എസ്.കെ. ഗുപ്ത പറഞ്ഞു.

ഇഷ്ടപ്പെട്ട ചാനലുകൾ തിരഞ്ഞെടുക്കാനുള്ള സ്വാതന്ത്ര്യം പുതിയ സംവിധാനത്തിലൂടെ ട്രായ് നൽകുന്നതിനാൽ വീട്ടിലെ കേബിൾ\ഡിടിഎച്ച് കണക്‌ഷനുകളിൽ ഏതൊക്കെ ചാനലുകൾ ഉൾപ്പെടുത്തണമെന്നു തീരുമാനിക്കുന്നത് ഉപയോക്താവായിരിക്കും. 100 ചാനലുകളാണ് അടിസ്ഥാന പാക്കേജിൽ 153.40 രൂപയ്ക്കു ലഭിക്കുക. ഇതിൽ 26 ചാനലുകൾ ദൂരദർശന്റെ ചാനലുകളായിരിക്കും. സൗജന്യ (ഫ്രീ ടു എയർ) ചാനലുകൾ, പേചാനലുകളുടെ പട്ടികയിൽനിന്ന് ബാക്കി 74 എണ്ണം ഉപയോക്താക്കൾ തിരഞ്ഞെടുക്കണം. ഇതിനും പുറമെയുള്ള ഇഷ്ടചാനലുകൾ പേ ചാനലുകളാണെങ്കിൽ അവയുടെ കൂടി വരിക്കാരാകണം. ഇതിനായി ചാനൽ ഉടമകൾ ട്രായ് വെബ്സൈറ്റിൽ പ്രസിദ്ധീകരിച്ചിരിക്കുന്ന വിലകൾ നോക്കാം. പേ ചാനലിന്റെ ഏറ്റവും ഉയർന്ന വില 19 രൂപയാണ്. ഒരു രൂപയിൽ താഴെ വിലയുള്ള ഒട്ടേറെ ചാനലുകളുണ്ട്. കമ്പനികൾ നിശ്ചയിക്കുന്ന ബൊക്കെകളിൽ (ചാനലുകളുടെ പ്രത്യേക പായ്ക്ക്)നിന്ന് ഇഷ്ടമുള്ളവ മാത്രംതിരഞ്ഞെടുക്കാനും സാധിക്കും.

74 സൗജന്യ ചാനലുകളും ആവശ്യമുള്ള അധിക ചാനലുകളും തീരുമാനിച്ചെങ്കിൽ സേവനദാതാക്കളുടെ കസ്റ്റമർ കെയർ നമ്പറിൽ ജനുവരി 31 വരെ വിളിച്ച് ചാനലുകളുടെ പട്ടിക പറയാം. ഫ്രീ ടു എയർ ചാനലുകളുടെ പട്ടികയോ, പേ ചാനലുകളുടെ പട്ടികയോ (വില ഉൾപ്പടെ) ആവശ്യമുണ്ടെങ്കിൽ ട്രായ് വെബ്സൈറ്റിനെ ആശ്രയിക്കാം. അല്ലെങ്കിൽ കേബിൾ– ഡി‍ടിഎച്ച് സേവനദാതാക്കളുടെ സ്വന്തം ചാനലിൽ, ഇവ സംബന്ധിച്ച വിവരങ്ങൾ ലഭ്യമാണ്.

മലയാളത്തിൽ 14 ചാനലുകൾക്കാണ് പ്രത്യേകം പണം കൊടുത്ത് വരിക്കാരാകേണ്ടത്. ഏഷ്യാനെറ്റ്, ഏഷ്യാനെറ്റ് എച്ച്ഡി, ഏഷ്യാനെറ്റ് പ്ലസ്, ഏഷ്യാനെറ്റ് മൂവീസ്, സൂര്യ, സൂര്യ മൂവീസ്, സൂര്യ എച്ച്ഡി, സൂര്യ കോമഡി, സൂര്യ മ്യൂസിക്, കൊച്ചുടിവി, ന്യൂസ് 18 കേരളം, സീ കേരളം, സീ കേരളം എച്ച്ഡി, രാജ് ന്യൂസ് എന്നിവയാണവ.  ഏഷ്യനെറ്റിന് 19 രൂപയാണു നിരക്കെങ്കിലും ഏഷ്യാനെറ്റ് മൂവീസും ഏഷ്യാനെറ്റ് പ്ലസും സ്റ്റാർ സ്പോർട്സും എല്ലാം ഉൾപ്പെടുന്ന സ്റ്റാർ മലയാളം പാക്കേജിനാകെ 39 രൂപയാണ് ഇപ്പോൾ പ്രഖ്യാപിച്ചിരിക്കുന്നത്.