ജഗതിക്ക് 5.9 കോടി നല്കിയപ്പോള് ഡ്രൈവര്ക്ക് അഞ്ചിന്റെ പൈസയില്ല... കണ്ണീരോടെ അനില്കുമാര്
ജഗതിക്ക് 5.9 കോടി കിട്ടിയപ്പോള് വേദനയോടെ വിങ്ങുന്ന ഒരാളുണ്ട് ജഗതിയുടെ കാര് ഓടിച്ചിരുന്ന ഡ്രൈവര് അനില്കുമാര്. അഞ്ചിന്റെ പൈസപോലും ഇന്ഷുറന്സ് കമ്പനി നല്കിയില്ല. എങ്കിലും അനില്കുമാര് ഇപ്പോഴും പ്രതീക്ഷയിലാണ്. ഇന്ഷുറന്സ് കമ്പനി കനിയുമെന്നും ജീവിത ദുരിതങ്ങളില് നിന്ന് കരകയറാന് സഹായിക്കുമെന്നുമാണു വിശ്വാസം.
അപകടത്തില് കാര് തകര്ന്ന വകയില് ഇന്ഷുറന്സ് കമ്പനിയില് നിന്ന് 4.30 ലക്ഷം രൂപ നഷ്ടപരിഹാരം കിട്ടി.
എന്നാല് ഗുരുതരമായി പരുക്കേറ്റ തനിക്ക് നഷ്ടപരിഹാരം നല്കാന് കഴിയില്ലെന്നാണ് ഇന്ഷുറന്സ് കമ്പനിയുടെ നിലപാടെന്ന് അനില്കുമാര് പറയുന്നു. ഉടമയും ഡ്രൈവറും ഒരാളായതിനാല് ഇതിന് വ്യവസ്ഥയില്ലത്രേ.
അപകടത്തില് അനിലിന്റെ വാരിയെല്ലിനു പരുക്കേല്ക്കുകയും കാല് മുറിഞ്ഞു പോകുകയും ചെയ്തു. ഒന്നര വര്ഷത്തെ ചികില്സയ്ക്ക് എട്ടു ലക്ഷം രൂപയോളം ചെലവായി. നഷ്ടപരിഹാരമായി ലഭിച്ച തുക ഉപയോഗിച്ചു വാങ്ങിയ വാഹനമാണ് ഇപ്പോള് വരുമാനമാര്ഗം. ഏതാനും മാസങ്ങളെ ആയുള്ളു വീണ്ടും വാഹനം ഓടിക്കാന് തുടങ്ങിയിട്ട്. അപകടശേഷം നടുവിനും വയറിനും വേദനയുള്ളതിനാല് ദീര്ഘദൂര ഓട്ടം പോകാനും കഴിയില്ല. മാസങ്ങളോളം വീട്ടില് കിടപ്പിലായിരുന്നു.
വരുമാനമില്ലാതായതോടെ കടം കൂടി. ഭാര്യയും രണ്ടു കുട്ടികളുമടങ്ങുന്ന കുടുംബത്തിന്റെ ഏക ആശ്രയമാണ് അനില്. ആറ് സെന്റ് സ്ഥലവും വീടും മാത്രമാണ് സ്വന്തമായുള്ളത്. ശാരീരിക അസ്വസ്ഥതകളുണ്ടെങ്കിലും ജോലിക്ക് പോകാതെ കടം വീട്ടാനാകാത്ത അവസ്ഥയാണ്. മക്കള് വിദ്യാര്ഥികളാണ്.
2012 മാര്ച്ച് പത്തിനു പുലര്ച്ചെ അഞ്ചു മണിക്കാണു നടന് ജഗതി സഞ്ചരിച്ചിരുന്ന ഇന്നോവ കാര് അപകടത്തില്പ്പെട്ടത്. അപകടത്തില് പരുക്കേറ്റ ജഗതിക്ക് 5.9 കോടി രൂപ തിരുവനന്തപുരം ലീഗല് സര്വിസ് അഥോറിറ്റി നഷ്ടപരിഹാരം വിധിച്ചിരുന്നു. തുക ജഗതിയ്ക്ക് കൈമാറുകയും ചെയ്തു.
പെരുമ്പാവൂര് ബോയ്സ് ഹയര് സെക്കന്ഡറി സ്കൂളിന് സമീപം ഭദ്രദീപത്തിലാണ് പി.പി. അനില്കുമാര് (49). താമസിക്കുന്നത്.
അപ്പപ്പോഴുള്ള വാര്ത്തയറിയാന് ഞങ്ങളുടെഫേസ് ബുക്ക്Likeചെയ്യുക
https://www.facebook.com/Malayalivartha