ബസ് യാത്രക്കിടെ അറിയാതെ ബാഗ് മാറി എടുത്തു എന്ന തെറ്റേ വീട്ടമ്മ ചെയ്തുള്ളൂ. ബാഗിലുണ്ടായിരുന്ന പണം പോലീസ് സ്റ്റേഷനില്‍ ഏല്‍പ്പിച്ച് വീട്ടമ്മ മാതൃകയായി. എന്നാല്‍ ബാഗ് അതിന്റെ യഥാര്‍ത്ഥ ഉടമയ്ക്കായി ആറു മാസമായി കാത്തിരിക്കുന്നു. ബാഗിലെ പണം തിരിച്ചെടുക്കാന്‍ ആരും വരാത്തതിനാല്‍ എന്തുചെയ്യണമെന്നറിയാതെ വിഷമഘട്ടത്തിലാണ് പേരൂര്‍ക്കട പോലീസ്. കഴിഞ്ഞ വര്‍ഷം സെപ്റ്റംബര്‍ 15 നാണ് മാറിയെടുത്ത ബാഗ് വീട്ടമ്മ പോലീസ് സ്‌റ്റേഷനിലെത്തിച്ചത്. അന്നുമുതല്‍ ഇന്നുവരെ പോലീസ് ബാഗിന്റെ ഉടമയെ അന്വേഷിച്ച് നടക്കുകയാണ്.
മുക്കോല കുശവര്‍ക്കല്‍ സ്വദേശിനിയായ വീട്ടമ്മയ്ക്കാണ് യാത്രയ്ക്കിടെ 50,000 ഓളം രൂപയടങ്ങിയ ബാഗ് ലഭിച്ചത്. പാലക്കാടുനിന്ന് വരുന്ന തന്റെ രണ്ടു ബന്ധുക്കളെ കൂട്ടാന്‍ തമ്പാനൂര്‍ റെയില്‍വേ സ്റ്റേഷനിലെത്തിയതായിരുന്നു വീട്ടമ്മ. അവിടെനിന്ന് ബസ്സ്റ്റാന്റിലെത്തുകയും പാലോട്ടേക്ക് പോകുന്ന ബസ്സില്‍ മൂവരും കയറുകയും ചെയ്തു. പേരൂര്‍ക്കടയിലെത്തിയപ്പോള്‍ ബന്ധുക്കള്‍ക്കൊപ്പം വീട്ടമ്മയും ബസ്സിറങ്ങി. ബന്ധുക്കളുടേതാണെന്ന ധാരണയില്‍ ഒരു ബാഗുമെടുത്ത് ഇവര്‍ ഇറങ്ങുകയും ചെയ്തു. പിന്നീടാണ് മനസ്സിലായത് താന്‍ എടുത്ത ബാഗ് മറ്റാരുടേതോ ആണെന്ന്. അബദ്ധം മനസ്സിലാക്കിയ വീട്ടമ്മ ഉടന്‍തന്നെ പോലീസിന് ബാഗ് കൈമാറുകയും ചെയ്തു.
ബസ്സില്‍ ഇവരുടെ സമീപത്തായി ഒരു സ്ത്രീകൂടി ഇരുന്നതായും ഇവര്‍ മൊഴി നല്‍കി. പക്ഷെ ബാഗിനുള്ളില്‍ ഒരു രേഖയുമില്ലാതിരുന്നത് പോലീസിനു തലവേദനയായി. ബാഗിന്റെ ഉടമയെ കണ്ടെത്താന്‍ പോലീസ് പത്രങ്ങളില്‍ വാര്‍ത്ത നല്‍കിയിരുന്നുവെങ്കിലും ആരും വരാത്തത് ദുരൂഹത സൃഷ്ടിക്കുകയായിരുന്നു. ലഭിച്ചത് കള്ളപ്പണമാണോയെന്ന സംശയത്തിലാണ് പോലീസ്.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha