യുകെയിലെ ഗ്ലൗസെസ്റ്ററിലുള്ള ലൂസിയേയും മരിയയേയും കണ്ടാല്‍ ആത്മാര്‍ത്ഥ സുഹൃത്തുക്കളാണെന്ന് ആര്‍ക്കും തോന്നും. എപ്പോഴും ഒന്നിച്ചായിരിക്കും. ഇടയ്ക്കിടെ ഒരു പോലെയുള്ള വേഷവും ധരിച്ചെത്തുന്ന ഇവര്‍ അത്ര ഇഴയടുപ്പമുള്ള സുഹൃത്തുക്കളാണെന്ന് സമ്മതിക്കാന്‍ ആര്‍ക്കും മടിയുണ്ടാവില്ല.

നീലക്കണ്ണും സ്വര്‍ണ്ണത്തലമുടിയുമുള്ള വെള്ളക്കാരിയായ ലൂസിയും, കറുത്തു ചുരുണ്ട മുടികളുള്ള കറുത്ത വംശജയായ മരിയയും തമ്മില്‍ വെറും സുഹൃദ്ബന്ധം മാത്രമല്ല ഉള്ളതെന്ന് അവര്‍ സ്‌കൂളില്‍ പഠിച്ചിരുന്ന കാലത്ത് സുഹൃത്തുക്കളോട് പറഞ്ഞപ്പോള്‍, കൂട്ടുകാര്‍ ചോദിച്ചു. അതില്‍ കൂടുതലെന്തു ബന്ധമാണ് നിങ്ങള്‍ക്കിടയിലുള്ളതെന്ന് . അതിന് അവര്‍ കൊടുത്ത ഉത്തരം കേട്ട് കൂട്ടുകാര്‍ ഞെട്ടി. ഞങ്ങള്‍ ഇരട്ടകളായ സഹോദരിമാരാണെന്നാണ് ലൂസിയും മരിയയും പറഞ്ഞത്.

ഒരേ കുടുംബത്തിലെ സഹോദരിമാര്‍ തമ്മിലുള്ള പരസ്പര സാദൃശ്യം പോലുമില്ലാത്ത ഇവര്‍, ഇരട്ടകളാണെന്നു പറഞ്ഞാല്‍ ക്ലാസിലെ സുഹൃത്തുക്കള്‍ എളുപ്പത്തിലങ്ങ് സമ്മതിച്ചു കൊടുക്കാന്‍ തയ്യാറാവുമോ? ജനന സര്‍ട്ടിഫിക്കറ്റ് കൊണ്ടു വന്നു കാണിച്ചാല്‍ വിശ്വസിക്കാമെന്നായി കൂട്ടുകാര്‍. ഒടുവില്‍ ലൂസിയും, മരിയയും ജനനസര്‍ട്ടിഫിക്കറ്റ് കൊണ്ടു ചെന്ന് കാണിച്ചപ്പോഴാണ്, വിന്‍സ് അയ്ല്‍മെറിന്റെയും, ഡോണയുടേയും മക്കളാണ് ലൂസിയും മരിയയുമെന്ന് കൂട്ടുകാര്‍ അംഗീകരിച്ചത്.

ഇവരുടെ അച്ഛനായ വിന്‍സ് അയ്ല്‍മെര്‍ വെള്ളക്കാരനാണ്, ജമൈക്കയില്‍ നിന്നുള്ള അമ്മ ഡോണയുടെ അച്ഛനമ്മമാര്‍ കറുപ്പും വെളുപ്പും വംശജരാണ്. ലൂസിയും മരിയയും വിന്‍സിന്റേയും ഡോണയുടെയും അഞ്ചാമത്തെ മക്കളാണ്. അവര്‍ക്ക് മുമ്പുള്ള ജോര്‍ഡനും, ജോര്‍ജ്ജിനും , ചെയ്‌നയ്ക്കുമെല്ലാം കറുപ്പിനും വെളുപ്പിനും ഇടയ്ക്കുള്ള നിറമാണ് കിട്ടിയിരിക്കുന്നത്.

കുടുംബത്തില്‍ ഇപ്രകാരം സങ്കരജീനുകള്‍ ഉണ്ടെങ്കിലും ഇരട്ട കുഞ്ഞുങ്ങളുണ്ടാകുമ്പോള്‍ ഇപ്രകാരം രണ്ടു വംശത്തില്‍പ്പെടുന്ന കുട്ടികളുണ്ടാകാന്‍ വളരെ വിദൂര സാധ്യതകളേ ഉള്ളൂവെന്നാണ് മെഡിക്കല്‍സയന്‍സ് പറയുന്നത്. കാഴ്ചയിലുള്ള വ്യത്യസ്തത ഇവരുടെ അഭിരുചികളിലുമുണ്ട്. ഇപ്പോള്‍ 18 വയസ്സുകാരായ ഇവരില്‍ ലൂസി ആര്‍ട്ടും ഡിസൈനും പഠിക്കുമ്പോള്‍ മരിയ നിയമമാണു പഠിക്കുന്നത്.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha