ആലപ്പുഴയില്‍ പാതിരപ്പള്ളിയിലെ വിശക്കുന്നവര്‍ക്കു മുന്നില്‍ മന്ത്രി തോമസ് ഐസകിന്റെ നേതൃത്വത്തില്‍ ഒരു സ്‌നേഹജാലകം തുറന്നിട്ടിട്ട് രണ്ടുവര്‍ഷമായി. 2018 മാര്‍ച്ച് മൂന്നിനാണ് അദ്ദേഹത്തിന്റെ നേതൃത്വത്തില്‍ ഇവിടെ ഒരു ജനകീയ ഭക്ഷണശാല പ്രവര്‍ത്തനം ആരംഭിച്ചത്.

ദിവസവും 4 നേരം സൗജന്യമായി ഭക്ഷണം വിളമ്പുന്ന ഇവിടെ കാഷ് കൗണ്ടറിനു പകരം സംഭാവനപ്പെട്ടിയാണ് വച്ചിട്ടുള്ളത്. ഭക്ഷണം കഴിച്ചശേഷം പണം ഇതില്‍ ഇടാം. ഇട്ടില്ലെങ്കിലും ആരും ചോദിക്കില്ല.

സ്റ്റീം കിച്ചണും വിപുലവും ശാസ്ത്രീയവുമായ മാലിന്യ സംസ്‌കരണ സംവിധാനവുമായി ഏതൊരു മുന്തിയ ഭക്ഷണശാലയോടും കിടപിടിക്കുന്ന സൗകര്യത്തോടെയാണ് ജനകീയ ഭക്ഷണശാല പ്രവര്‍ത്തിക്കുന്നത്.

വിവാഹം, ജന്മദിനങ്ങള്‍, വിട്ടിലെ പ്രിയപ്പെട്ടവരുടെ സ്മരണ ദിനങ്ങള്‍ തുടങ്ങിയ മുഹൂര്‍ത്തങ്ങളില്‍ സ്‌നേഹജാലകം ഭക്ഷണ ശാലയില്‍ സ്‌പോണ്‍സര്‍ഷിപ്പ് നടത്തുന്നവരുടെ എണ്ണം ഏറിവരുന്നുണ്ടെന്നു ഭാരവാഹികള്‍ പറയുന്നു.

എഴുന്നൂറോളം പേരാണു പ്രതിദിനം ഇവിടെ ഭക്ഷണം കഴിക്കുന്നത്. നടത്തിപ്പിന് 12 ജോലിക്കാരും. കിടപ്പു രോഗികള്‍ക്ക് വീടുകളില്‍ നേരിട്ടു ഭക്ഷണം എത്തിക്കുന്നുണ്ട്. രണ്ട് വര്‍ഷം കൊണ്ടു 2.26 കോടി രൂപ ഭക്ഷണശാലയ്ക്കായി ചെലവഴിക്കപ്പെട്ടപ്പോള്‍ 2.18 കോടിയാണ് വരവ്.

ആര്യാട് ബ്ലോക്ക് പഞ്ചായത്ത് സ്ഥിരം സമിതി അധ്യക്ഷന്‍ ജയന്‍ തോമസ് പ്രസിഡന്റായും സജിത് രാജ് സെക്രട്ടറിയുമായ സ്‌നേഹജാലകം കമ്മിറ്റിയാണ് കാര്യങ്ങള്‍ നോക്കിനടത്തുന്നത്.