38 വര്ഷം അവധിയെടുക്കാതെ ജോലി; വിരമിക്കാനിരിക്കെ വിയോഗം
കണ്ണൂര് ഇരിട്ടി ആറളം ഫാം ബ്ലോക്ക് 4-ല് തൊഴിലാളി ബന്ദപ്പാലന് നാരായണനെ ആന ചവിട്ടിക്കൊലപ്പെടുത്തിയതിനെ തുടര്ന്നുണ്ടായ പ്രതിഷേധത്തില് സുരക്ഷ ഒരുക്കാതെ ഇനി ജോലിക്കിറങ്ങിലെന്ന നിലപാടില് സഹപ്രവര്ത്തകര്. മാനേജുമെന്റ് ജീവനക്കാരും ഇതേ നിലപാട് സ്വീകരിച്ചതോടെ വയനാട്ടില് അവധിയിലായിരുന്ന ആറളം വൈല്ഡ് ലൈഫ് വാര്ഡന് എ.ഷജ്ന സ്ഥലത്ത് എത്തി.സുരക്ഷ ഉറപ്പു നല്കുകയും നാരായണന്റെ കുടുംബത്തിന് നഷ്ടപരിഹാരവും ഫാമിലോ വനം വകുപ്പിലോ ആശ്രിത നിയമനം നല്കാന് ഇടപെടുമെന്ന് അറിയിക്കുകയും ചെയ്തതോടെയാണ് തൊഴിലാളികള് പ്രതിഷേധത്തില് നിന്ന് പിന്മാറിയത്. ആറളം ഫാമില് 8 പേര് വന്യജീവി ആക്രമങ്ങളില് കൊല്ലപ്പെട്ടിട്ടുണ്ടെങ്കിലും തൊഴിലാളി ദുരന്തത്തിനിരയാകുന്നത് ആദ്യമാണ്.
പന്നിമൂല സ്വദേശിയായ ബന്ദപ്പാലന് നാരായണന് 38 വര്ഷത്തെ സേവനത്തിനു ശേഷം ഈ വര്ഷം ഡിസംബര് 31-ന് വിരമിക്കേണ്ടിയിരുന്നതാണ്. മികച്ച തൊഴിലാളിയായിരുന്നെന്നാണ് ഫാം ജീവനക്കാരുടെ സാക്ഷ്യം. ജോലി ഭാരം കൊണ്ടും മറ്റ് പ്രയാസങ്ങള് മൂലവും നല്ലൊരു ശതമാനവും സ്വയം വിരമിക്കുമ്പോള് പലപ്പോഴും അവധി പോലുമെടുക്കാത്ത ജീവനക്കാരനായിരുന്നിവത്രേ നാരായണന്. കൃഷിയാണു ജോലിയെങ്കിലും ഞായറാഴ്ചകളില് സുരക്ഷാ ജോലിയാണു ചെയ്യുക. വാഹനത്തില് വരണമെങ്കില് കിലോമീറ്ററുകള് വളഞ്ഞു ചുറ്റണം. അതിനാല് കൊക്കോട് പുഴ വഴി 3 കിലോമീറ്റര് നടന്ന് ബ്ലോക്ക് 4-ല് എത്തും.
ബ്ലോക്ക് 4-ലെ കേന്ദ്രത്തില് ഇന്നലെ പതിവു സമയം കഴിഞ്ഞും ഒപ്പിടാന് എത്താത്തതു കൊണ്ട് സൂപ്പര്വൈസര് വി.എസ്.സായി നാരായണന് റോഡില് തിരഞ്ഞപ്പോള് മണ്പാതയില് തോര്ത്ത് കിടക്കുന്നതു കണ്ടു. 10 മീറ്റര് മാറി തോട്ടത്തില് മൃതദേഹവും. ആനയെ കണ്ട് രക്ഷപ്പെടാന് ശ്രമിക്കുന്നതിനിടയില് പിടിച്ചിട്ട് ചവിട്ടിക്കൊന്നതാണെന്നു സംശയിക്കുന്നു. പോസ്റ്റ്മോര്ട്ടത്തിലും ഇക്കാര്യം വ്യക്തമാണ്.
നാട്ടുകാരുടെ പ്രതിഷേധത്തെത്തുടര്ന്നു വൈല്ഡ് ലൈഫ് വാര്ഡന്റെ സാന്നിധ്യത്തില് ഫാം ഓഫിസില് ചേര്ന്ന യോഗത്തില് ആറളം പഞ്ചായത്ത് സ്ഥിരം സമിതി അധ്യക്ഷരായ ജോഷി പാലമറ്റം, അംഗങ്ങളായ അരവിന്ദന് അക്കാനശ്ശേരി, ജിമ്മി അന്തിനാട്ട്, പി.റോസ, പി.കെ.കരുണാകരന്, ഡപ്യൂട്ടി തഹസില്ദാര് എ.വി.പത്മാവതി, ആറളം സിഐ കെ.സുധീര് കല്ലന്, ആറളം ഫാം സെക്യൂരിറ്റി ഓഫിസര് ആര്.ശ്രീകുമാര്, അഡ്മിനിസ്ട്രേറ്റീവ് ഓഫിസര് ടി.പി.പ്രേമരാജന്, സൂപ്രണ്ട് വി.പി.മോഹന്ദാസ്, ഡപ്യൂട്ടി റേഞ്ചര് ജയേഷ് ജോസഫ്, ആര്ആര്ടി ഡപ്യൂട്ടി റേഞ്ചര് ഹരിദാസന്, സിപിഎം ഏരിയാ സെക്രട്ടറി ബിനോയി കുര്യന്, വൈ.വൈ.മത്തായി, ബേബി ജോണ് പൈനാപ്പള്ളി, കോണ്ഗ്രസ് ആറളം മണ്ഡലം പ്രസിഡന്റ് അരവിന്ദന് ആറളം, സിപിഐ മണ്ഡലം സെക്രട്ടറി ശങ്കര് സ്റ്റാലിന്, കെ.ബി.ഉത്തമന് തുടങ്ങിയവര് പങ്കെടുത്തു.
കാട്ടാനശല്യത്തിന് ശാശ്വത പരിഹാരം കാണാന് മുഖ്യമന്ത്രി മുന്കൈ എടുക്കണമെന്നും ആറളം ഫാമില് കാട്ടാന അക്രമം മൂലമുണ്ടാകുന്ന തുടര്ച്ചയായ ദുരന്തങ്ങള് സര്ക്കാര് അനാസ്ഥയുടെ ബാക്കി പത്രമാണെന്നും കെപിസിസി ജനറല് സെക്രട്ടറി സജീവ് ജോസഫ് ആരോപിച്ചു. ഓരോ മനുഷ്യ ജീവന് പൊലിയുമ്പോഴും പ്രതിരോധ നടപടികളെക്കുറിച്ച് വനം വകുപ്പ് പല പദ്ധതികളും പറയുന്നുണ്ടെങ്കിലും ഒന്നും നടപ്പിലായിട്ടില്ല. കാട്ടാന അക്രമത്തില് കൊല്ലപ്പെട്ട തൊഴിലാളി നാരായണന്റെ കുടുംബത്തിനെ കെപിസിസിയുടെ അനുശോചനം അറിയിച്ചു. കുടുംബത്തിന് അര്ഹമായ നഷ്ടപരിഹാരം നല്കണമെന്നും അദ്ദേഹം മുഖ്യമന്ത്രിയോടാവശ്യപ്പെട്ടു.
ആറളം ഫാമില് കാട്ടാനയുടെ ആക്രമണത്തില് ഒരു തൊഴിലാളി കൊല്ലപ്പെടാനുണ്ടായ സാഹചര്യത്തിന്റെ പൂര്ണ ഉത്തരവാദി വനം വകുപ്പ് ആണെന്ന് വിപ്ലവ ജനകീയ മുന്നണി കണ്ണര് ജില്ലാ സെക്രട്ടറി ലുക്മാന് പള്ളിക്കണ്ടി ആരോപിച്ചു.
https://www.facebook.com/Malayalivartha