മൂന്നു മത്സരങ്ങളില് മാത്രം ദേശീയ ജഴ്സിയില് ഒരുമിച്ചു കളിച്ചതിന്റെ പരിചയത്തില് ധോണിയെ വിവാഹത്തിനു ക്ഷണിച്ചു, വരാന് അസൗകര്യം ഉണ്ടെന്നു മറുപടി, ഒടുവില് ധോണിയുടെ സര്പ്രൈസ് 'എന്ട്രി'!
ജീവിതത്തിലൊരിക്കലും മറക്കാനാകാത്ത ഒരു സര്പ്രൈസിന്റെ കഥ പറഞ്ഞു പഞ്ചാബില്നിന്നുള്ള ഇന്ത്യന് ക്രിക്കറ്റ് താരം മന്ദീപ് സിങ്. ഇന്ത്യന് ജഴ്സിയേക്കാള് ഐപിഎല്ലില് കിങ്സ് ഇലവന് പഞ്ചാബ് ജഴ്സിയിലാകും ഇരുപത്തെട്ടുകാരനായ മന്ദീപിനെ ആരാധകര്ക്ക് കൂടുതല് പരിചയം. ഇന്ത്യയ്ക്കായി മൂന്നു ട്വന്റി20 മത്സരങ്ങളില് മാത്രം കളിച്ചിട്ടുള്ള താരമാണ് മന്ദീപ്. 2016-ലെ സിംബാബ്വെ പര്യടനത്തിലായിരുന്നു ഇത്. മൂന്നു മത്സരങ്ങളില്നിന്ന് ഒരു അര്ധസെഞ്ചുറി സഹിതം 43.50 ശരാശരിയില് 87 റണ്സ് നേടിയെങ്കിലും പിന്നീട് അവസരം ലഭിച്ചില്ല.
2016 ഡിസംബര് 26-നായിരുന്നു മന്ദീപിന്റെ വിവാഹം. വെറും മൂന്നു മത്സരങ്ങളില് മാത്രം ദേശീയ ജഴ്സിയില് ഒരുമിച്ചു കളിച്ചതിന്റെ പരിചയത്തില് ഇന്ത്യന് ക്രിക്കറ്റിലെ തിരക്കുള്ള താരവും ക്യാപ്റ്റനുമായ ധോണിയെ വിവാഹത്തിനു ക്ഷണിച്ചു. അതേകുറിച്ച് മന്ദീപ് പറയുന്നത് ഇങ്ങനെ:
മേക്കപ്പ് ആര്ട്ടിസ്റ്റായ ജഗ്ദീപ് ജസ്വാളിനെയാണ് ഞാന് വിവാഹം കഴിച്ചത്. മഹി ഭായിയെ (എം.എസ്. ധോണി) ഞാന് പ്രത്യേകം ക്ഷണിച്ചിരുന്നു. പക്ഷേ, അദ്ദേഹം വിവാഹത്തിനു വരുന്ന കാര്യമൊന്നും പറഞ്ഞില്ല. അതേ സമയത്ത് ന്യൂയോര്ക്കില് പോകേണ്ട അത്യാവശ്യമുണ്ടെന്നു മാത്രം പറഞ്ഞു. പക്ഷേ, അദ്ദേഹം എന്റെ വിവാഹത്തിനു വന്നു. അതും തീര്ത്തും അപ്രതീക്ഷിതമായി. ഇന്ത്യന് ക്രിക്കറ്റിലെ തിരക്കുള്ള താരവും ക്യാപ്റ്റനുമായിരിക്കെ അദ്ദേഹം വിവാഹത്തിനു വന്നത് ഒരിക്കലും മറക്കാനാകാത്ത അനുഭവമായി' - മന്ദീപ് വിശദീകരിച്ചു.
'റാഞ്ചിയില്നിന്ന് ഡല്ഹി വഴി അമൃത്സറിലെത്തണമെങ്കില് മൂന്നു വിമാനങ്ങളില് കയറണം. അവിടുന്ന് വീട്ടിലെത്താന് രണ്ടു മണിക്കൂര് ഡ്രൈവ് വേറെ. ഡിസംബറിലെ കൊടും തണുപ്പും മഞ്ഞും സൃഷ്ടിക്കുന്ന പ്രയാസങ്ങള്ക്കിടെ വേണം ഈ ഡ്രൈവ്. അത്രയ്ക്ക് ബുദ്ധിമുട്ടിയാണ് അന്ന് അദ്ദേഹം എന്റെ വിവാഹത്തിന് വന്നത്. വളരെ കുറച്ചു മത്സരം മാത്രമാണ് അദ്ദേഹത്തിനൊപ്പം ഞാന് കളിച്ചിട്ടുള്ളത്. എന്നിട്ടും അത്രയേറെ ബുദ്ധിമുട്ടുകള് സഹിച്ചുവന്നു. അതാണ് അദ്ദേഹത്തിന്റെ ലാളിത്യം, മഹത്വവും' - മന്ദീപ് ചൂണ്ടിക്കാട്ടി.
ഇന്ത്യന് ടീമിലേക്ക് ആദ്യമായി വിളി ലഭിച്ചത് ദീര്ഘകാലം കണ്ട സ്വപ്നത്തിന്റെ സഫലീകരണമായിരുന്നുവെന്ന് മന്ദീപ് വിശദീകരിച്ചു. ധോണിയോടൊത്ത് ഒരേ ടീമില് കളിച്ചതിന്റെ അനുഭവവും മന്ദീപ് പങ്കുവച്ചു.
'ധോണിക്കൊപ്പം കളിച്ച നിമിഷങ്ങള് വാക്കുകള്കൊണ്ട് വിവരിക്കാനാകില്ല. അതൊരു സ്വപ്നസാഫല്യമായിരുന്നു. വളരെ ലാളിത്യമുള്ള വ്യക്തിയാണ് അദ്ദേഹം. ഇന്ത്യന് ക്രിക്കറ്റിലെ ഇതിഹാസമാണെങ്കിലും അതിന്റെ ഗര്വൊന്നും നമ്മളോടുള്ള ഇടപെടലിലില്ല. ഭക്ഷണം കഴിക്കുമ്പോഴൊക്കെ എപ്പോഴും ഞങ്ങള്ക്കൊപ്പമാണ് ഇരിക്കുക. അദ്ദേഹത്തോടൊപ്പം ചെലവഴിച്ച നിമിഷങ്ങള് എന്നും ഓര്ത്തിരിക്കും' മന്ദീപ് പറഞ്ഞു.
ഇഷാന്ത് ശര്മ, സുരേഷ് റെയ്ന എന്നിവരുടെ വിവാഹങ്ങള്ക്കും ഇത്തരത്തില് അപ്രതീക്ഷിതമായി എത്തി സര്പ്രൈസ് കൊടുത്തിട്ടുള്ള കാര്യം അന്ന് ധോണി വെളിപ്പെടുത്തിയതായി മന്ദീപ് പറഞ്ഞു.
https://www.facebook.com/Malayalivartha