ചിറ്റാര്‍ നിവാസികള്‍ക്ക് ലോക്ഡൗണ്‍ കാലത്ത് സൗജന്യ യാത്രയൊരുക്കുന്നു ഒരു ഓട്ടോ ഡ്രൈവര്‍. പന്നിയാര്‍ കോളനിയില്‍ പുളിനില്‍ക്കും കാലായില്‍ സാംകുട്ടിയാണ് തന്റെ ഓട്ടോ സൗജന്യ സേവനത്തിനായി ഓടുന്നത്. ചിറ്റാര്‍ മാര്‍ക്കറ്റില്‍ രാവിലെ ഒമ്പതുമണിയാകുമ്പോഴേ സാംകുട്ടി ഓട്ടോയുമായി എത്തും.

കഴിഞ്ഞ പത്തുവര്‍ഷമായി സ്വന്തം ഉപജീവിതത്തിനായി ചിറ്റാര്‍ മാര്‍ക്കറ്റില്‍ ഓട്ടോ ഓടിക്കുന്ന ആളാണ് 52കാരനായ സാംകുട്ടി. ലോക്ഡൗണ്‍ സമയത്ത് വാഹനം ഒതുക്കി വീട്ടില്‍ ഇരിപ്പായിരുന്നു. അപ്പോഴാണ് ഒരുദിവസം മാര്‍ക്കറ്റില്‍നിന്ന് സാധനങ്ങള്‍ വാങ്ങി പ്രായമായവര്‍ തലച്ചുമടായി കിലോമീറ്ററുകള്‍ താണ്ടി വീടുകളിലേക്ക് പോകുന്ന കാഴ്ച കണ്ടത്. ആ കാഴ്ച സാംകുട്ടിയുടെ മനസ്സിനെ വേദനിപ്പിച്ചു.

തുടര്‍ന്ന് ചിറ്റാര്‍ പൊലീസ് സ്‌റ്റേഷനില്‍ ചെന്ന് നിര്‍ധനര്‍ക്കായി സൗജന്യ സേവനം ചെയ്യാന്‍ അനുമതിവാങ്ങി. ദിവസം 250 രൂപയുടെ ഇന്ധനം നിറച്ചാണ് രാവിലെ ഒമ്പതു മണിക്ക് മാര്‍ക്കറ്റില്‍ എത്തുന്നത്. പുളിനില്‍ക്കുംകാലായില്‍ എന്ന സ്വന്തം ഓട്ടോയുടെ മുന്‍വശത്ത് ഗ്ലാസില്‍ സ്വന്തം കൈപ്പടയില്‍ 'സൗജന്യ സവാരി' കൈയെഴുത്ത് പോസ്റ്ററും പതിച്ചാണ് ഓടുന്നത്.

വാഹനം ആവശ്യമുള്ളവര്‍ മാര്‍ക്കറ്റില്‍ ഡ്യൂട്ടിയിലുള്ള പൊലീസിന്റെ അടുത്തുവന്ന് വിവരം പറയും. പൊലീസിന്റെ നിര്‍ദേശപ്രകാരം ആളുകളെ സൗജന്യമായി വീടുകളില്‍ സുരക്ഷിതമായി സാംകുട്ടി എത്തിക്കും. 16 ദിവസമായി സൗജന്യ ഓട്ടം തുടങ്ങിയിട്ട്. വൈകീട്ട് അഞ്ചുമണിക്കേ മാര്‍ക്കറ്റില്‍നിന്ന് ഓട്ടോയുമായി സാംകുട്ടി വീട്ടിലേക്ക് പോകൂ. ദിവസവും ശരാശരി 800 രൂപയുടെ ഓട്ടമാണ് സൗജന്യമായി ഓടുന്നത്. ഫോണ്‍: 9495032851.