കല്യാണ സാരിയില്ലെന്ന സങ്കടം തീര്‍ത്തുകൊടുത്തു പൊലീസ് !
ഈ വരുന്ന മേയ് 3-ന് തളിപ്പറമ്പ്, പട്ടുവം പഞ്ചായത്ത് ഓഫിസിന് സമീപം മുറിയാത്തോട് താമസിക്കുന്ന കല്ലിങ്കില്‍ വനജയുടെ വിവാഹം നടത്താന്‍ നിശ്ചയിച്ചിരിക്കയാണ്. പൂമംഗലം സ്വദേശിയാണ് വരന്‍. കടകളൊക്കെ അടഞ്ഞിരിക്കുമ്പോള്‍ കല്യാണത്തിന് ഉടുക്കാനുള്ള സാരി എങ്ങിനെ സംഘടിപ്പിക്കുമെന്ന ആശങ്കയിലായിരുന്നു വനജ. വനജയുടെ കൂട്ടുകാരിയായ കൊളച്ചേരി പഞ്ചായത്തിലെ കോവിഡ് 19 വൊളന്റിയര്‍ കരിങ്കല്‍കുഴി സ്വദേശി സുവര്‍ണ കുമാരിയോട് വനജ ഫോണില്‍ ഈ സങ്കടം പങ്കുവച്ചു.
തനിക്ക് പരിചയമുള്ള ചക്കരക്കല്‍ പൊലീസ് സ്റ്റേഷനിലെ ഉദ്യോഗസ്ഥന്‍ ശ്രീയേഷ് കണിയാരത്തിനെ,സുവര്‍ണ ഇക്കാര്യം അറിയിച്ചു. അദ്ദേഹം ഉടന്‍ തന്നെ സാരി സംഘടിപ്പിച്ചു മയ്യില്‍ പൊലീസ് സ്റ്റേഷനിലെ ദേവന്‍ ബാബുവിനെ ഏല്‍പ്പിക്കുകയും അദ്ദേഹം അത് തളിപ്പറമ്പ് സ്റ്റേഷനില്‍ എത്തിക്കുകയും ചെയ്തു.
കഴിഞ്ഞ ദിവസം രാവിലെ തളിപ്പറമ്പ് പൊലീസ് സ്റ്റേഷനില്‍ നിന്ന് വനജക്ക് ഒരു ഫോണ്‍കോളെത്തി. ഉടന്‍ പട്ടുവം പഞ്ചായത്ത് ഓഫിസില്‍ എത്താനായിരുന്നു നിര്‍ദേശം. പരിഭ്രമത്തോടെ പഞ്ചായത്ത് ഓഫിസിലേക്ക് ഓടിയെത്തിയപ്പോള്‍ ഒരു പൊലീസ് വാഹനവും പൊലീസുകാരും പഞ്ചായത്ത് പ്രസിഡന്റ് ആനക്കീല്‍ ചന്ദ്രനും കാത്ത് നില്‍ക്കുന്നതാണ് കണ്ടത്.
പിന്നീട്, വനജക്ക് തരാനുള്ള പുത്തന്‍ വിവാഹ സാരിയുമായാണ് ജനമൈത്രി പൊലീസുകാര്‍ വന്നതെന്ന് പഞ്ചായത്ത് പ്രസിഡന്റ് പറഞ്ഞപ്പോഴാണ് പരിഭ്രമം വിസ്മയത്തിനും സന്തോഷത്തിനും വഴിമാറിയത്.
തളിപ്പറമ്പ് ജനമൈത്രി പൊലീസിലെ ഉദ്യോഗസ്ഥരായ എഎസ്‌ഐ എ. സുരേഷ്, സീനിയര്‍ സിവില്‍ ഓഫിസര്‍ പി.പി.സെയ്ദ് എന്നിവരാണ് പുതു പുത്തന്‍ സാരിയുമായി പട്ടുവം പഞ്ചായത്ത് ഓഫിസില്‍ എത്തി പ്രസിഡന്റ് ആനക്കീല്‍ ചന്ദ്രനുമായി ബന്ധപ്പെട്ട് സാരി കൈമാറിയത്. കല്യാണത്തിന് ചാര്‍ത്താനുള്ള പുഷ്പ മാലയും സുവര്‍ണയുടെ ഏര്‍പ്പാട് തന്നെ. അങ്ങനെ ലോക്ഡൗണ്‍ കാലത്ത് കല്യാണസാരി കൊടുത്തും പൊലീസ് ജനമൈത്രി തെളിയിച്ചു.
https://www.facebook.com/Malayalivartha
