ഏറ്റവും പ്രായം കൂടിയ വ്യക്തി എന്ന ഗിന്നസ് റിക്കാര്‍ഡിന് അര്‍ഹയായ മിസാവോ ഒസാകാ അന്തരിച്ചു. 117 വയസായിരുന്നു. വാര്‍ധക്യസഹജമായ അസുഖത്തെ തുടര്‍ന്നായിരുന്നു അന്ത്യം. കഴിഞ്ഞ മാര്‍ച്ചിലാണ് 117-ാം ജന്മദിനം മിസാവോ ആഘോഷിച്ചത്. 1898 മാര്‍ച്ച് അഞ്ചിനാണ് ഒസാകായുടെ ജനനം. 2013 ല്‍ ആണു ലോകമുത്തശിയെന്ന ഗിന്നസ് റിക്കാര്‍ഡിന് ഒസാകാ അര്‍ഹയായത്. അന്നുമുതല്‍ ഒസാകാ ലോകത്തിന്റെ മുത്തശിയായി മാറി.
1919 ല്‍ ആണ് ഒസാകായുടെ വിവാഹം നടന്നത്. യുക്കിയോ എന്ന യുവാവുമായാണ് 21 കാരിയുടെ വിവാഹം നടന്നത്. രണ്ട് പെണ്‍കുട്ടികളും ഒരു ആണ്‍കുട്ടിയുമാണ് ഈ മുത്തശ്ശിയ്ക്കുള്ളത്. മക്കള്‍ മാത്രമല്ല നാലു കൊച്ചുമക്കളുടെയും അവരുടെ ആറു മക്കളുടെയും സ്‌നേഹത്തിനു പാത്രമാകാനുള്ള ഭാഗ്യവും ഈ മുത്തശിക്കു കഴിഞ്ഞു. 1931ലാണ് ഭര്‍ത്താവ് യുക്കിയോ ഒാസാകയുടെ ജീവിതത്തില്‍ നിന്നും വിടപറഞ്ഞത്.
പോഷക സമൃദ്ധമായ ഭക്ഷണവും ദിവസേനയുള്ള പകല്‍ മയക്കങ്ങള്‍ക്കു പുറമെ എട്ടു മണിക്കൂര്‍ സ്ഥിരം ഉറങ്ങുകയും ചെയ്യുന്നതാണ് തന്റെ ആയുസിന്റെയും ആരോഗ്യത്തിന്റെയും രഹസ്യമെന്നായിരുന്നു മുത്തശിയുടെ നിലപാട്. ആയുര്‍ദൈര്‍ഘ്യം കൂടുതലുള്ള ജപ്പാനില്‍ ജനസംഖ്യയുടെ കാല്‍ ഭാഗവും 65 വയസ്സോ അതിനു മുകളിലോ പ്രായമുള്ളവരാണ്. പ്രായം നൂറു കഴിഞ്ഞവരുടെ കാര്യത്തിലും ജപ്പാന്‍ ഏറെ മുന്നിലാണ്.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha