കാബേജ് കൃഷി ചെയ്യം. ഇപ്പോഴാണ് ഇതിനു ഏറ്റവും പറ്റിയ സമയം. വിറ്റാമിൻ എ, കരോട്ടിൻ എന്നിവ ധാരാളം അടങ്ങിയ ഭക്ഷണമാണ് കാബേജ്. കേരളത്തിൽ ഒക്ടോബർ മുതൽ ജനുവരി വരെയുള്ള മാസങ്ങളാണ് കാബേജ് കൃഷിക്ക് ഏറ്റവും മികച്ചത്. ഈ സമയത്തെ തണുപ്പുള്ള രാത്രികൾ കാബേജിന് വളരാൻ അനുയോജ്യമായ കാലാവസ്ഥയാണ്.

കാബേജ് വിത്തുകൾ നേരിട്ട് നടുന്നതിനേക്കാൾ ആദ്യം തടങ്ങളിലോ പ്രോ-ട്രേകളിലോ പാകി മുളപ്പിക്കുന്നതാണ് നല്ലത്. വിത്ത് പാകി 25-30 ദിവസമാകുമ്പോൾ (നാല് ഇലകൾ വരുമ്പോൾ) മാറ്റി നടാം. വൈകുന്നേരങ്ങളിൽ തൈകൾ നടാൻ ശ്രദ്ധിക്കുക, നന്നായി വെയിൽ ലഭിക്കുന്ന സ്ഥലം വേണം തിരഞ്ഞെടുക്കാൻ. ഗ്രോബാഗിലാണ് കൃഷി ചെയ്യുന്നതെങ്കിൽ മണ്ണ്, ചാണകപ്പൊടി, ചകിരിച്ചോറ് എന്നിവ ചേർക്കുക.

കാബേജിനെ ബാധിക്കുന്ന പ്രധാന വില്ലൻ ഇല തിന്നുന്ന പുഴുക്കളാണ്. ഇതിനെ തടയാൻ ആഴ്ചയിലൊരിക്കൽ വേപ്പെണ്ണ-സോപ്പ് മിശ്രിതം അടിച്ചു കൊടുക്കാം. പുകയില കഷായവും കീടങ്ങളെ അകറ്റാൻ ഫലപ്രദമായിരിക്കും. തൈ നട്ട് ഏകദേശം 70 മുതൽ 90 ദിവസത്തിനുള്ളിൽ കാബേജ് വിളവെടുക്കാൻ പാകമാകും. കാബേജ് കൈകൊണ്ട് അമർത്തി നോക്കുമ്പോൾ നല്ല ഉറപ്പ് തോന്നുമ്പോൾ വിളവെടുക്കാവുന്നതാണ്.