വിവാഹാഭ്യര്ത്ഥന നിരസിച്ചതിന് അന്യസംസ്ഥാന തൊഴിലാളി വീട് അഗ്നിക്കിരയാക്കി
വിവാഹാഭ്യര്ത്ഥന നിരസിച്ചതിന് അന്യസംസ്ഥാന തൊഴിലാളി വീട് അഗ്നിക്കിരയാക്കി. വീടിനകത്ത് ഉറങ്ങിക്കിടന്നിരുന്ന വീട്ടമ്മ തീപൊള്ളലേറ്റ് മരിച്ചു. മകളെ ഗുരുതര പരിക്കുകളോടെ ആശുപത്രിയില് പ്രവേശിപ്പിച്ചു. തൊയക്കാവ് കോഴിപറമ്പ് ക്ഷേത്രത്തിന് സമീപം പരേതനായ പുതുവച്ചോലയില് മുഹമ്മദിന്റെ ഭാര്യ കുഞ്ഞിപാത്തുമ്മയാണ് (58) മരിച്ചത്. മകള് സീനത്തിനാണ് (18) പൊള്ളലേറ്റത്. സംഭവമുമായി ബന്ധപ്പെട്ട് പശ്ചിമ ബംഗാള് സ്വദേശി മുജീബുള് അലി മണ്ഡലിനെയാണ് (23) ഗുരുവായൂര് സി.ഐ: കെ. സുദര്ശന്, പാവറട്ടി എസ്.ഐ: എം.കെ. രമേശ് എന്നിവരുടെ നേതൃത്വത്തിലുള്ള പൊലീസ് സംഘം അറസ്റ്റ് ചെയ്തത്. ഇന്നലെ പുലര്ച്ചെ രണ്ടരയോടെയായിരുന്നു സംഭവം. ഓടുകള് പൊട്ടിത്തെറിക്കുന്ന ശബദം കേട്ട് അയല്വാസികള് ഓടിയെത്തി മോട്ടോര് ഉപയോഗിച്ച് വെള്ളം പമ്പ് ചെയ്തെങ്കിലും തീയണക്കാനായില്ല. വിവരമറിഞ്ഞ് പാവറട്ടി പൊലീസും ഗുരുവായൂരില് നിന്ന് അഗ്നിശമനസേനയും സ്ഥലത്തെത്തി.
അകത്തും പുറത്തും പൂട്ടിയിട്ടിരുന്ന വാതിലുകള് ചവിട്ടിപൊളിച്ചാണ് ഉമ്മയേയും മകളേയും നാട്ടുകാര് പുറത്തെത്തിച്ചത്. കുഞ്ഞിപ്പാത്തുമ്മ കത്തിക്കരിഞ്ഞ നിലയിലായിരുന്നു.
തൊണ്ണൂറ് ശതമാനം പൊള്ളലേററ സീനത്തിനെ മെഡിക്കല്കോളേജ് ആശുപത്രിയില് പ്രവേശിപ്പിച്ചു. പൊലീസ് പറയുന്നത്: കുഞ്ഞിപ്പാത്തുമ്മയുടെ അയല്വാസിയുടെ വീട് നിര്മ്മാണത്തിന് ജോലിക്കെത്തിയതായിരുന്നു ബംഗാളി യുവാവ്. വീടിന് സമീപത്തുള്ള ഷെഡില് താമസിച്ചിരുന്ന യുവാവ് സീനത്തുമായി അടുപ്പത്തിലുമായി. കുഞ്ഞിപാത്തുമ്മയുടെ ചികിത്സാര്ത്ഥം യുവാവിന്റെ കൈയില് നിന്ന് സീനത്തിന്റെ വീട്ടുകാര് പണം വാങ്ങിയിരുന്നു. തുടര്ന്ന് യുവാവ് നടത്തിയ വിവാഹ അഭ്യര്ത്ഥനയെ പാത്തുമ്മയുടെ ബന്ധുക്കള് എതിര്ത്തു. ഇതിലുള്ള വൈരാഗ്യമാണ് വീട് തീവയ്ക്കാന് കാരണമത്രെ.
വീടിന് പുറത്തും അകത്തും മണ്ണെണ്ണയൊഴിച്ച് തീകൊളുത്തുകയായിരുന്നു. സംഭവ ശേഷം കേരളം വിടാന് തീരുമാനിച്ച് തൃശൂരില് നിന്ന് ട്രെയിന് കയറാനായി അന്നകരയിലെത്തിയപ്പോഴാണ് ഇയാള് പിടിയിലായത്.
അപ്പപ്പോഴുള്ള വാര്ത്തയറിയാന് ഞങ്ങളുടെഫേസ് ബുക്ക്Likeചെയ്യുക
https://www.facebook.com/Malayalivartha