സ്വന്തം പ്രണയിനിയുടെ ഇഷ്ടങ്ങള്‍ക്കനുസരിച്ച് എന്തെങ്കിലും ചെയ്യാന്‍ ശ്രമിക്കുന്ന പുരുഷന്‍മാരെക്കുറിച്ച് മലയാളിസുഹൃത്തുക്കള്‍ പെട്ടെന്നുപറയുന്ന ഒരുകാര്യമുണ്ട്; അവനൊരു പെണ്‍കോന്തനാണെന്ന്! അങ്ങനെ കഷ്ടപ്പെട്ടു പ്രണയിക്കാന്‍ പോകാതിരിക്കാന്‍ അവര്‍ പറയുന്ന ഒരു ന്യായവുമുണ്ട്. പിന്നേയ്..അവളു പോയാല്‍ അതിനേക്കാള്‍കൊള്ളാവുന്ന എത്ര എണ്ണത്തിനെ വേണമെങ്കിലും നിനക്കുകിട്ടുമെടാ എന്നൊക്കെ...!
എന്നാല്‍ ശരിക്കും റൊമാന്റിക്ക് ആയ ഒരു പുരുഷനെ സംബന്ധിച്ചിടത്തോളം തന്റെ വികാരവിചാരങ്ങളെല്ലാം പങ്കുവയ്ക്കാനാഗ്രഹിക്കുന്ന സ്ത്രീയുടെ സന്തോഷത്തിന് ഒന്നാം സ്ഥാനമായിരിക്കുമുള്ളത്. അത്തരം ഒരു പ്രണയിതാവ് തന്റെ പ്രണയിനിയുടെ പ്രണയം നഷ്ടപ്പെടുത്താതിരിക്കാന്‍ എന്തുചെയ്യുന്നതിനും തയ്യാറാവുകയും ചെയ്യും.തന്റെ പ്രണയിനി ആവശ്യപ്പെട്ട ചുവന്ന റോസാപ്പൂവ് നല്‍കാനാകാത്തതില്‍ ദു:ഖിച്ചിരിക്കുന്ന വിദ്യാര്‍ത്ഥിയെ സഹായിക്കാനായി, വെള്ള റോസാപ്പൂവിനെ സ്വന്തം ഹൃദയരക്തം നല്‍കി ചുവപ്പിക്കാന്‍ തയ്യാറായ, ഓസ്‌കാര്‍ വൈല്‍ഡിന്റെ കഥയിലെ നൈറ്റിംഗേല്‍ പക്ഷിയെപ്പോലെ പ്രണയത്തിന്റെ വില അറിയുന്നവരും ഉണ്ട്.അതുപോലൊരു പ്രണയിതാവിന്റെ കഥയിതാ!
യു.കെ.-യിലെ ആലി ഡേവിസ് തന്റെബോയ്ഫ്രണ്ടിനോടു പറഞ്ഞു, എന്റെ ഇഷ്ടങ്ങളെക്കുറിച്ച് എത്ര അറിവ് എന്റെ ബോയ്ഫ്രണ്ടിനുണ്ടെന്ന് എനിക്കറിയണം. എന്നാലല്ലേ എന്റെ ഇഷ്ടങ്ങളെ മാനിക്കുകയും അവഹേളിക്കുകയും ചെയ്യാതെ നമുക്ക് ഒത്തുപോകാനാവുമോ എന്നറിയാനാവുകയുള്ളൂ എന്നായിരുന്നു അവളുടെ വാദം.അതിനായി അവള്‍ ആരാധിക്കുന്ന പോപ്പ് ഗായികയായ ബിയോണ്‍സിനെക്കുറിച്ച് അവള്‍ നടത്തുന്ന എഴുത്തുപരീക്ഷയില്‍60% മാര്‍ക്ക് ബോയ്ഫ്രണ്ട് നേടുകയാണെങ്കില്‍, ഈ ബന്ധത്തില്‍ തുടരാമെന്നായിരുന്നു അവള്‍ പറഞ്ഞത്.
ആലി ഡേവിസിന്റെ ബോയ്ഫ്രണ്ട് പിന്നെ ബിയോണ്‍സിനെക്കുറിച്ചുള്ള എല്ലാവിവരങ്ങളും ശേഖരിച്ചു.ഒടുവില്‍ ആലി ഡേവിസ് നടത്തുന്ന പരീക്ഷാദിനമെത്തി.ബിയോണ്‍സിന്റെ ഏതെങ്കിലും 3 പാട്ടുകളുടെ പേരുപറയുക, (കൂടുതല്‍ എഴുതിയാല്‍ എക്‌സ്ട്രാ മാര്‍ക്കുണ്ട്), ബിയോണ്‍സിന്റെ ഫുള്‍നെയിം ഓപ്ഷനില്‍ നിന്നും തെരഞ്ഞെടുക്കുക,ബിയോണ്‍സിന്റെ പ്പോപ്പ് ഗാനമേള നടന്ന ഏതൊക്കെ സ്ഥലങ്ങളിലാണ് ആലി ഡേവിസ് പോയിട്ടുള്ളത്,ആലി ഡേവിസിന് ഇഷ്ടമുള്ള മറ്റു പുരുഷ- വനിതാ ഗായകരാരൊക്കെയാണ് എന്നിങ്ങനെയുള്ള ചോദ്യങ്ങളടങ്ങിയ പരീക്ഷയില്‍ 33-ല്‍ ഇരുപത്തിആറര മാര്‍ക്കുനേടി ബോയ്ഫ്രണ്ട് വിജയിച്ചു.
ഏതായാലും ആലിഡേവിസിന്റെ പ്രണയം വളരെ വിലപ്പെട്ടതായി ബോയ്ഫ്രണ്ട് കരുതുന്നുവെന്ന് സമ്മതിക്കാന്‍ ആര്‍ക്കും മടിയുണ്ടാവില്ലല്ലോ!