വന്ന വഴി മറക്കില്ല... മന്ത്രി വിവാഹം കഴിക്കുന്നത് നേരത്തെ ഉറപ്പിച്ചയാളെ; വിവാഹം മേയ് 10ന്
മന്ത്രിയായിരിക്കെ വിവാഹിതയാകുന്ന ആദ്യ വനിത എന്ന പദവി ഇനി പി.കെ. ജയലക്ഷ്മിക്ക് സ്വന്തം.
അടുത്ത മാസം മെയ് 10നാണ് വിവാഹം. വരന് വയനാട് കമ്പളക്കാട് പറളിക്കുന്ന് ചെറുവടി സി.എ. അനില്കുമാര്. കൃഷിതൊഴിലാക്കിയ അനില്കുമാര് ജയലക്ഷ്മിയുടെ മുറച്ചെറുക്കനാണ്. മാനന്തവാടി വാളാട് പാലോട്ട് കുറിച്യയ തറവാട്ടില് പരമ്പരാഗത ആചാരങ്ങളോടെയാവും വിവാഹം.
ലീലയുടേയും പരേതനായ അണ്ണന്റെയും മകനാണ് അനില് കുമാര്. സഹോദരന് അനീഷ്കുമാര്. മാനന്തവാടി പാലോട്ട് കുറിച്യ തറവാട്ടിലെ കുഞ്ഞാമന് അമ്മിണി ദമ്പതികളുടെ മകളാണ് 32കാരിയായ ജയലക്ഷ്മി.
മെയ് 10ന് പാലോട്ട് തറവാട്ടില് കല്യാണം നടക്കും. ഏറെ കാലം മുമ്പു തന്നെ നിശ്ചയിച്ച കല്യാണം കഴിഞ്ഞ മാസം നടക്കേണ്ടിയിരുന്നതാണ്. എന്നാല്, കുഞ്ഞാമന്റെ അച്ഛന്റെ പെങ്ങളുടെ മകന് ബാലകൃഷ്ണന്റെ നിര്യാണംമൂലം മാറ്റിവച്ചു.
ഏറെ മുന്പേ ആലോചിച്ചുവച്ച വിവാഹം ഇനിയും നീട്ടേണ്ടതില്ലെന്ന തീരുമാനത്തിലേക്ക് ഇരു കുടുംബങ്ങളും എത്തിയത് അടുത്തിടെയാണ്. മന്ത്രിയുടെ തറവാടായ വാളാട്ടെ പാലോട്ട് വീട്ടില് ആകും താലികെട്ട്.
വയനാട്ടിലെ തലയെടുപ്പുള്ള പാലോട്ട് കുറിച്യ തറവാട്ടിലെ അംഗമാണ് മന്ത്രി പി.കെ. ജയലക്ഷ്മി. പഴശ്ശിയുടെ പടയോട്ടങ്ങളില് പങ്കെടുത്ത് പോരാട്ട വീര്യം കാട്ടിയ കുറിച്യ പടയാളികളുടെ പിന്മുറക്കാരാണ് പാലോട്ടുകാര്. കൂട്ടുകുടുംബ രീതി നിലനില്ക്കുന്ന തറവാട്ടില് ഇന്നും ഇരുന്നൂറോളം അംഗങ്ങളുണ്ട്. കൃഷിയെയും അസ്ത്ര വിദ്യയെയും ഏറെ സ്നേഹിക്കുന്ന, നാലുകെട്ടും നടുമുറ്റവുമുള്ള തറവാട്ടില് മന്ത്രിയുടെ വിവാഹം ഗംഭീരമാക്കാനുള്ള ഒരുക്കങ്ങള് തുടങ്ങിക്കഴിഞ്ഞു. ആദിവാസി സമുദായത്തില് നിന്നും മന്ത്രിയാകുന്ന ആദ്യ വ്യക്തിയാണ് ജയലക്ഷ്മി. യുഡിഎഫ് സര്ക്കാര് 72 സീറ്റുമായി അധികാരത്തിലെത്തിയപ്പോള് ജയലക്ഷ്മി മാത്രമായിരുന്നു ഭരണപക്ഷത്ത് നിന്നും ജയിച്ചു കയറിയ ഏക വനിത.
വയനാട്ടില് നൂറോളം കുറിച്യ തറവാടുകളുണ്ടായിരുന്നതില് 56 തറവാടുകളാണ് ശേഷിക്കുന്നത്. ഇതില് പകുതിയോളം ബന്ധുകുലം എന്നറിയപ്പെടും. ബാക്കിയുള്ളവ പന്തികുലവും. ജയലക്ഷ്മിയുടെ അമ്മ വഴിയുള്ള കുടുംബങ്ങളാണ് ബന്ധുകുലത്തില്പെടുക. അച്ഛന് വഴിയുള്ളവര് പന്തികുലത്തിലും. കുറിച്യ ആചാരപ്രകാരം ബന്ധുകുലത്തിലുള്ളവര്ക്ക് അതേ കുലത്തിലുള്ളവരുമായി കല്യാണം പാടില്ല. ഇതിനാലാണ് പന്തികുലത്തില് വരുന്ന മുറച്ചെറുക്കന് അനില്കുമാറുമായി വര്ഷങ്ങള്ക്കുമുമ്പേ കല്യാണമുറപ്പിച്ചത്. ജയലക്ഷ്മി മന്ത്രിയായതോടെ വിവാഹം നീളുകയായിരുന്നു.
കുറിച്യ സമുദായത്തിന്റെ പാരമ്പര്യ ആയോധന കലയായ അമ്പെയ്ത്തില് ചെറുപ്പത്തില് തന്നെ പരിശീലനം നേടി. പഠനകാലം മുതല് വിവിധ അമ്പെയ്ത്ത് മത്സരങ്ങളില് പങ്കെടുക്കുകയും സംസ്ഥാനതലത്തില് വെള്ളി മെഡല് ഉള്പ്പെടെ നേടുകയും ചെയ്തു. മാനന്തവാടി ഗവ. കോളേജില് ഡിഗ്രി കോഴ്സിന് പഠിക്കുമ്പോള് കെ.എസ്.യു അംഗമായി. തവിഞ്ഞാല് ഗ്രാമ പഞ്ചായത്ത് മെമ്പറായി പ്രവര്ത്തിച്ചു കൊണ്ടിരിക്കുമ്പോഴാണ് നിയമസഭയിലേക്ക് മത്സരിച്ചത്. മാനന്തവാടി മണ്ഡലത്തില് നിന്ന് ജയിച്ച് എം. എല്.എ ആയി സത്യപ്രതിജ്ഞ ചെയ്ത ഉടന് മന്ത്രിയുമായി. ജയലക്ഷ്മി തിരുവനന്തപുരം നഗരം ആദ്യമായി കാണുന്നത് എംഎല്എ ആയി സത്യപ്രതിജ്ഞ ചെയ്യാനെത്തിയപ്പോഴാണ്.
അപ്പപ്പോഴുള്ള വാര്ത്തയറിയാന് ഞങ്ങളുടെഫേസ് ബുക്ക്Likeചെയ്യുക
https://www.facebook.com/Malayalivartha