വാവ സുരേഷ് പാമ്പുകളില്‍നിന്നുമാത്രമല്ല, കടന്നലുകളില്‍ നിന്നും രക്ഷപ്പെടുത്തും. തിരുവനന്തപുരത്ത് കുഴിവിള ബൈപ്പാസിനു സമീപമുള്ള വീട്ടില്‍ നിന്നും ഉഗ്രവിഷമുള്ള കടന്നലുകളെ ചാക്കിലാക്കിയാണ് സുരേഷ് വീണ്ടും ജനപ്രിയനായത്. മൂന്നുമാസമായി വീട്ടിലെ കിടപ്പുമുറിയില്‍ പറ്റിക്കൂടിയ പത്തായ കടന്നലിന്റെ ശല്യത്താല്‍ പൊറുതി മുട്ടിയ ബേബിയെന്ന വീട്ടമ്മയാണ് വാവ സുരേഷിന്റെ സഹായം തേടിയത്.
മണ്‍വിള കരിമണല്‍ പുല്ലുകാട് സെറ്റില്‍മെന്റ് കോളനിയില്‍ ഒറ്റയ്ക്കു താമസിക്കുകയാണ് ബേബി. വര്‍ഷങ്ങള്‍ക്ക് മുമ്പ് കുഴിവിള ഓട്ടോ സ്റ്റാന്‍ഡിലെ ഏക വനിതാ ഓട്ടോറിക്ഷാ തൊഴിലാളിയായിരുന്നു ഇവര്‍. അപകടത്തില്‍ പരുക്കേറ്റ് മെഡിക്കല്‍ കോളജ് ആശുപത്രിയില്‍ മാസങ്ങളോളം ചികിത്സയിലായിരുന്ന ബേബി വീട്ടില്‍ തിരിച്ചെത്തിയപ്പോഴാണ് കിടപ്പുമുറിയിലെ റാക്ക് സ്ലാബില്‍ പത്തായ കടന്നല്‍ കൂട് കണ്ടത്.
പുറമേക്ക് കുഴപ്പമില്ലാതിരുന്നതിനാല്‍ കൂട് നശിപ്പിച്ചില്ല. എന്നാല്‍ വീട്ടിലെത്തിയവര്‍ കിടപ്പുമുറിയിലെ കടന്നല്‍കൂട് കണ്ട് അമ്പരന്നു. ബേബിയുടെ വീട്ടിലേക്കു പോകാന്‍ അയല്‍വാസികള്‍ പോലും ഭയപ്പെട്ടു. അംഗന്‍വാടി ജീവനക്കാരിയായ ബേബി രാവിലെ ജോലിക്കു പോകുമ്പോള്‍ കടന്നലുകള്‍ കൂട്ടത്തോടെ പുറത്തിറങ്ങി അയല്‍വീട്ടുകാര്‍ക്ക് ശല്യം ഉണ്ടാക്കിയതിനാലാണ് നാട്ടുകാരും രംഗത്തെത്തിയത്. തുടര്‍ന്ന് ബേബി വാവ സുരേഷിനെ വിളിച്ചു വരുത്തുകയായിരുന്നു. ഒരാഴ്ചയായി വീട്ടില്‍ ലൈറ്റിടാന്‍ കഴിഞ്ഞിരുന്നില്ല.
വെളിച്ചമില്ലാത്ത മുറിയില്‍ കടന്ന വാവ സുരേഷ് ഏറെ പണിപ്പെട്ട് കടന്നല്‍ കൂട് മൊത്തമായി ചാക്കിനകത്താക്കി. എന്നാല്‍ കടന്നലുകളെ കൊല്ലാതെ ആള്‍പ്പാര്‍പ്പില്ലാത്ത സ്ഥലത്ത് ഉപേക്ഷിക്കുകയായിരുന്നു.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha