ഉപതെരഞ്ഞെടുപ്പുകള്‍ മാറ്റി വയ്ക്കണമെന്ന് ആവശ്യം ഉയരുന്നുണ്ടെങ്കിലും ഉപതെരഞ്ഞെടുപ്പ് ഒരുക്കങ്ങളും മുന്നണികള്‍ പൂര്‍ത്തിയാക്കുകയാണ്. മത്സരിക്കാന്‍ യോഗ്യരായ ആളെ കണ്ടെത്തുകയെന്നാതാണ് ബി.ജി.പിക്ക് ഈ മണ്ഡലങ്ങളിലെ വെല്ലുവിളി. വിജയ സാധ്യത ഒട്ടുമില്ലാത്തത് തന്നെയാണ് എന്‍.ഡി.എ സംബന്ധിച്ച് സ്ഥാനാര്‍ഥികളെ കണ്ടെത്താനുള്ള ബുദ്ധിമുട്ടിന് കാരണം. ഇവിടങ്ങളില്‍ ബി.ജെപിക്ക് അധികം സ്വാധീനമില്ല. പക്ഷേ കുട്ടനാട് മണ്ഡലത്തെ സംബന്ധിച്ച് കഴിഞ്ഞ തവണത്തെ നിയമസഭാ തെരഞ്ഞെടുപ്പില്‍ വലിയ നേട്ടം കൈവരിക്കാന്‍ ബി.ജെ.പി നേതൃത്വം നല്‍കുന്ന എന്‍.ഡി.എ മുന്നണിക്ക് സാധിച്ചിരുന്നു. പരമാവധി 8000 മുതല്‍ 9000 വോട്ടുകള്‍ മാത്രം മണ്ഡലത്തില്‍ നേടിയിരുന്ന മുന്നണിക്ക് കഴിഞ്ഞ തവണ ബി.ജെ.ഡി.എസിന്റെ സുഭാഷ് വാസു സ്ഥാനാര്‍ത്ഥിയായി വന്നപ്പോള്‍ ലഭിച്ചത് മുപ്പത്തിമൂവായിരത്തിലധികം വോട്ടുകള്‍. അതുകൊണ്ടു തന്നെ ബി.ജെ.ഡി.എസ് സീറ്റു നല്‍കാന്‍ ബി.ജെ.പിക്ക് ഒരു മടിയുമില്ല. പക്ഷേ മത്സരത്തിന് തുഷാര്‍ വെള്ളാപ്പള്ളി തന്നെ ഇറങ്ങണമെന്നാണ് ബി.ജെ.പിയുടെ ആവശ്യം.

സാമുദായിക ഘടകങ്ങള്‍ തുണച്ചാല്‍ വിജയിച്ച് കയറാമെന്നാണ് ബിജെപി വിലയിരുത്തുന്നത്. എന്നാല്‍ മത്സരത്തിന് ഇല്ലെന്ന നിലപാടിലാണ് തുഷാറുള്ളത്. ബിഡിജെഎസ് വിമത വിഭാഗമായ സുഭാഷ് വാസുവും കൂട്ടരും ഉടന്‍ തന്നെ സ്ഥാനാര്‍ഥിയെ പ്രഖ്യാപിക്കും. ഈ സാഹചര്യത്തില്‍ തുഷാര്‍ മത്സരിക്കാനിറങ്ങിയാല്‍ വിമതനീക്കം അതിജീവിക്കാന്‍ കഴിയുമെന്ന് ബിജെപി വിലയിരുത്തുന്നുണ്ട്. 2016ല്‍ മണ്ഡലത്തില്‍ എന്‍ഡിഎയുടെ സുഭാഷ് വാസു മികച്ച മുന്നേറ്റമാണ് കാഴ്ചവെച്ചത്. തുഷാര്‍ മത്സരിക്കാനിറങ്ങിയാല്‍ നേട്ടമാകുമെന്ന പ്രതീക്ഷയിലാണ് എന്‍ഡിഎ. മത്സരിക്കാനില്ലെന്ന് വ്യക്തമാക്കുന്ന തുഷാര്‍ പ്രാദേശിക നേതാക്കളുടെ പേരുകളാണ് മുന്നോട്ട് വെക്കുന്നത്. ബിഡിജെഎസ് സംസ്ഥാന സെക്രട്ടറിമാരായ ടിപി മന്മദന്‍, സന്തോഷ് ശാന്തി, ജില്ലാ പ്രസിഡന്റ് ടി അനിയപ്പന്‍ എന്നിവരുടെ പേരുകളാണ് മുന്നോട്ട് വെക്കുന്നത്. അടുത്തയാഴ്ച തീരുമാനമുണ്ടാകുമെന്ന് സംസ്ഥാന നേതൃത്വം വ്യക്തമാക്കുന്നുണ്ട്.

കുട്ടനാട്ടില്‍ മത്സരിക്കുമെന്ന് വ്യക്തമാക്കിയ ബിഡിജെഎസ് വിമത വിഭാഗം ഈയാഴ്ച സ്ഥാനാര്‍ഥിയെ പ്രഖ്യാപിക്കും. മുന്‍ ഡിജിപി ടിപി സെന്‍കുമാറോ സുഭാഷ് വാസുവോ ആയിരിക്കും മത്സരിത്തിനുണ്ടാകുക. ബിഡിജെഎസിലെ പ്രശ്‌നങ്ങള്‍ തിരിച്ചടിയാകുമോ എന്ന ആശങ്ക ബിജെപിക്കുണ്ടെങ്കിലും അവരുടെ പ്രശ്‌നങ്ങള്‍ അവര്‍ തന്നെ പരിഹരിക്കട്ടെ എന്ന നിലപാടിലാണ് ബിജെപി. പക്ഷേ അങ്ങനെ അത്രവേഗം പരിഹരിക്കാപ്പെടാവുന്ന പ്രശ്‌നങ്ങളല്ല ബി.ജെ.ഡി.പിയിലും എസ്.എന്‍.ഡി.പിയിലുമുള്ളത്. കാരണം അടുത്ത കാലത്തായി നിരവധി ആരോപണമാണ് ബി.ജെ.ഡി.എസിനും എസ്.എന്‍.ഡി.പിക്കുമെതിരെ ഉയര്‍ന്നത്. ഒരിക്കന്‍ വിശ്വസ്തനായിരുന്ന സുഭാഷ് വാസു മറുകണ്ടം ചാടി എന്നതു മാത്രമല്ല യോഗത്തില്‍ ഇതിന് മുമ്പൊന്നും ഉണ്ടാക്കത്ത വിമതസ്വരമാണ് വെള്ളാപ്പള്ളി നടേശനെതിരെ ഉയര്‍ന്നത്. കണിച്ചുകുളങ്ങര എസ്.എന്‍.ഡി.പി യൂണിയന്‍ സെക്രട്ടറിയായിരുന്ന കെ.കെ മഹേശന്റെ ആത്മഹത്യയും അതുമായി ബന്ധപ്പെട്ട വിവാദങ്ങളും എസ്.എന്‍.ഡി.പി നേതൃത്വത്തെ പ്രതിരോധത്തിലാക്കിയിരുന്നു.

അതിനിടെ കുട്ടനാട്, ചവറ തെരഞ്ഞെടുപ്പുകള്‍ ഉപേക്ഷിക്കുന്നത് സംബന്ധിച്ച് ചര്‍ച്ചകള്‍ നടത്താന്‍ സംസ്ഥാന സര്‍ക്കാര്‍ സര്‍വ്വകക്ഷി യോഗം വിളിച്ചു. വെള്ളിയാഴ്ച രാവിലെ പത്ത് മണിക്കാണ് യോഗം. നാല് മാസത്തേക്ക് ജനപ്രതിനിധികളെ തെരഞ്ഞെടുക്കാന്‍ ഉപതെരഞ്ഞെടുപ്പ് വേണ്ടെന്നാണ് സര്‍ക്കാരിന്റെ നിലപാട്. 2021 മെയ് മാസം നിയമസഭാ തെരഞ്ഞെടുപ്പ് നടക്കാനിരിക്കുന്ന സാഹചര്യത്തിലാണ് സര്‍ക്കാര്‍ ഇത്തരമൊരു സമീപനം സ്വീകരിച്ചിരിക്കുന്നത്. ബി.ജെ.പി പ്രസിഡന്റ് കെ സുരേന്ദ്രനും ഉപതെരഞ്ഞെപ്പ് മാറ്റിവയ്ക്കണമെന്ന ആവശ്യം ഉയര്‍ത്തിട്ടുണ്ട്. എന്നാല്‍ തദ്ദേശ തെരഞ്ഞെടുപ്പ് മാറ്റി വയ്‌ക്കേണ്ടതില്ലെന്നും അദ്ദേഹം പറഞ്ഞു.