ലിന്‍സ അധ്യാപികയായി എത്തിയത് നേരത്തേ ശുചീകരണ ജോലി ചെയ്ത വിദ്യാലയത്തില്‍! വിജയകഥ അറിഞ്ഞ ഗവര്‍ണര്‍ വിളിച്ച് സ്‌നേഹവിരുന്നു നല്‍കി!
കഴിഞ്ഞ ദിവസം വൈകിട്ട് കാഞ്ഞങ്ങാട് ഇക്ബാല്‍ ഹയര്‍സെക്കന്‍ഡറി സ്‌കൂളിലെ യുപി വിഭാഗം അധ്യാപികയും ചെറുവത്തൂര്‍ കാട്ടുതലയിലെ സുധീരന്റെ ഭാര്യയുമായ ആര്‍.ജെ.ലിന്‍സയും കുടുംബവും ഗവര്‍ണര്‍ ആരിഫ് മുഹമ്മദ് ഖാന്റെ അതിഥിയായി തിരുവനന്തപുരത്ത് രാജ്ഭവനില്‍ എത്തി.
ലിന്‍സയുടെ വിജയ കഥ അറിഞ്ഞപ്പോഴാണ് ഗവര്‍ണര്‍ രാജ്ഭവനിലേക്ക് ക്ഷണിച്ച് സ്‌നേഹവിരുന്ന് നല്‍കിയത്. ഇക്ബാല്‍ ഹയര്‍സെക്കന്‍ഡറി സ്‌കൂളില്‍ കഴിഞ്ഞ 12 വര്‍ഷം ശുചീകരണ ജോലി ചെയ്ത ലിന്‍സയാണ് സ്വന്തപരിശ്രമത്താല്‍ ആ വിദ്യാലയത്തില്‍ അധ്യാപികയായി ജോലിയിലെത്തിയത്.
മെട്രോ മനോരമ ഇത് വാര്‍ത്തയാക്കിയിരുന്നു. ഇതു ഗവര്‍ണറുടെ ശ്രദ്ധയില്‍പെട്ട ഉടന്‍ തന്നെ അദ്ദേഹം ലിന്‍സയെ രാജ്ഭവനിലേക്കു ക്ഷണിക്കുകയായിരുന്നു.
ലിന്‍സയും ഭര്‍ത്താവും 2 കുട്ടികളും അടങ്ങുന്ന കുടുംബം കഴിഞ്ഞ ദിവസം രാജ്ഭവനില്‍ എത്തി. ഇവരെ ഗവര്‍ണര്‍ ആരിഫ് മുഹമ്മദ് ഖാനും ഭാര്യ രേഷ്മയും ചേര്‍ന്നു സ്വീകരിച്ചു. ഒരു മണിക്കുറോളം രാജ്ഭവനില്‍ ചെലവഴിച്ച ലിന്‍സയ്ക്കും കുടുംബത്തിനും ഗവര്‍ണര്‍ ഓണക്കോടിയും സമ്മാനിച്ചു.
https://www.facebook.com/Malayalivartha
