സര്ക്കാരിന് പി.ആര്‍ എജന്‍സി വേണം; നേട്ടങ്ങള്‍ ജനങ്ങളില്‍ എത്തിക്കണം; സര്‍ക്കാര്‍ നീക്കം തെരഞ്ഞെടുപ്പ് മുന്നില്‍ കണ്ട്; ധൂര്‍ത്ത് എന്നാല്‍ പിണറായി സര്‍ക്കാര്‍; കോടികളുടെ അധിക ബാധ്യത ഖജനാവിന്; ഒപ്പം കണ്‍സള്‍ട്ടെന്‍സിയുടെ മറവില്‍ എന്ന പോലെ പി.ആര്‍ എജന്‍സിയുടെ മറവില്‍ പിന്‍വാതില്‍ നിയമനവും
സര്‍ക്കാരിനെ സംബന്ധിച്ചുള്ള വിവരങ്ങള്‍ ജനങ്ങളെയും മാധ്യമങ്ങളെയും അറിയിക്കാനാണ് സര്ക്കാരിന് കീഴില്‍ പബ്ലിക് റിലേഷന്‍ വകുപ്പ് പ്രവര്‍ത്തിക്കുന്നത്. കൂടാതെ ഓരോ മന്ത്രിമാര്‍ക്കും വകുപ്പിനും പബ്ലിക് റിലേഷന്‍ ഓഫീസര്‍മാരുമുണ്ട്. ഇതിന് പുറമേ പി.ആര്‍.ഡി റേഡിയോ, ഓരോ മന്ത്രിമാര്‍ക്കും സോഷ്യല്‍ മീഡിയ ടീം എന്നിങ്ങനെ പബ്ലിക് സിറ്റിക്ക് വേണ്ടി സര്‍ക്കാര്‍ ഖജനാവില്‍ നിന്നും ചിലവാക്കുന്നത് കോടികളാണ്. സര്‍ക്കാര്‍ പി.ആര്‍.ഡി. വഴി മാധ്യമങ്ങള്‍ക്ക് നല്‍കുന്ന പരസ്യത്തിനും സര്‍ക്കാര്‍ സ്‌പോണ്‍സേഡ് ടിവി പ്രോഗാമിനും പുറമേയാണ് ഇതെല്ലാമെന്ന് ഓര്‍ക്കണം. അതിനൊപ്പമാണ് തെരഞ്ഞെടുപ്പ് മുന്നില്‍ കണ്ട് സര്‍ക്കാരിന്റെ നേട്ടങ്ങള്‍ ജനങ്ങളിലെത്തിക്കാന്‍ പി.ആര്‍ എജന്‍സികളെ സര്‍ക്കാര്‍ തേടുന്നത്. സര്‍ക്കാരിന്റെ വികസനക്ഷേമ പ്രവര്‍ത്തനങ്ങള്‍ സാമൂഹിക മാധ്യമങ്ങള്‍ വഴി പ്രചരിപ്പിക്കാന്‍ ദേശീയ ഏജന്‍സികളെയാണ് തേടുന്നത്. വൈദഗ്ധ്യവും അനുഭവസമ്പത്തുമുള്ള ഏജന്‍സിയെ കണ്ടെത്താന്‍ ഉദ്യോഗസ്ഥതല സമിതിക്ക് രൂപംനല്‍കി. ഇതോടെ തദ്ദേശ, നിയമസഭാ തിരഞ്ഞെടുപ്പുകള്‍ മുന്നില്‍ക്കണ്ട് കോവിഡ് പ്രതിസന്ധിയില്‍ സര്‍ക്കാര്‍ നടത്തുന്ന മറ്റൊരു ധൂര്‍ത്താണിതെന്ന് ആരോപണമുയര്‍ന്നുകഴിഞ്ഞു.
നിലവില്‍ സര്‍ക്കാര്‍ പ്രവര്‍ത്തനങ്ങളുടെ പ്രചാരണത്തിന് പി.ആര്‍.ഡി.യെക്കൂടാതെ മുഖ്യമന്ത്രിക്ക് അച്ചടി, ദൃശ്യ മാധ്യമങ്ങള്‍ക്കായി പ്രത്യേക സംവിധാനവും വിപുലമായ സാമൂഹിക മാധ്യമ വിഭാഗവുമുണ്ട്. പി.ആര്‍.ഡി.യും സാമൂഹിക മാധ്യമ ഇടപടലുകള്‍ നടത്തുന്നുണ്ട്. എന്നാല്‍, പി.ആര്‍.ഡി. വഴിയുള്ള സാമൂഹിക മാധ്യമ വിഭാഗത്തിന്റെ ഇടപെടല്‍ ഫലപ്രദമാകുന്നില്ലെന്ന വിലയിരുത്തലിന്റെ അടിസ്ഥാനത്തിലാണ് പുറത്തുനിന്നുള്ള ഏജന്‍സിയെ നിയോഗിക്കുന്നത്. ആവശ്യമായ സോഷ്യല്‍ മീഡിയ സേവനം ലഭ്യമാക്കുകയാണ് ലക്ഷ്യമെന്ന് ഉത്തരവില്‍ വ്യക്തമാക്കുന്നു. അപേക്ഷകള്‍ പരിശോധിച്ച് സുതാര്യമായ തിരഞ്ഞെടുപ്പ് നടത്താനാണ് ഉദ്യോഗസ്ഥതല സമിതി രൂപവത്കരിച്ചത്. പി.ആര്‍.ഡി. സെക്രട്ടറി അധ്യക്ഷനായ സമിതിയില്‍ ധന എക്‌സ്പന്‍ഡിച്ചര്‍ സെക്രട്ടറി, ഐ.ടി. സെക്രട്ടറി, കിഫ്ബി സി.ഇ.ഒ. അല്ലെങ്കില്‍ പ്രതിനിധി എന്നിവര്‍ അംഗങ്ങളും പി.ആര്‍.ഡി. ഡയറക്ടര്‍ കണ്‍വീനറുമാണ്.
സാമൂഹമാധ്യമ സംഘത്തെ നവീകരിക്കാനും ദേശീയ ഏജന്‍സിയുടെ സേവനം പ്രയോജനപ്പെടുത്തും. കണ്‍ന്റ്ുകളുടെ നിര്‍മാണം, രൂപകല്‍പന, ഡിജിറ്റല്‍ പ്രമോഷന്‍ എന്നിവയാണ് എജന്‍സിയുടെ മുഖ്യ ചുമതല. സംസ്ഥാന സര്‍ക്കാര്‍ നേരിട്ടും കിഴ്ബി വഴിയും നാലര വര്‍ഷം നടപ്പാക്കിയ പദ്ധതികള്‍ ദേശീയ തലത്തില്‍ അടക്കം പരമാവധി പ്രചരിപ്പിക്കാന്‍ കഴിഞ്ഞ മാസം മുഖ്യമന്ത്രിയുടെ അധ്യക്ഷതയില്‍ യോഗം തീരുമാനിച്ചിരുന്നു. ഇതിന്റെ അടിസ്ഥാനത്തിലാണ് ഏജന്‍സിയെ നിയോഗിക്കുന്നത്. പ്രതിഫലം പിന്നീടു തീരുമാനിക്കും. കഴിഞ്ഞ ഏപ്രില്‍ മുതല്‍ ജൂലൈവരെ നാസുമാത്തേക്കുമാത്രം 28.47 ലക്ഷം രൂപയാണു മുഖ്യമന്ത്രിയുടെ ഔദ്യോഗിക വെബ്‌സൈറ്റും സാമൂഹിക മാധ്യമ അക്കൗണ്ടുകളും പരിപാലിക്കാന്‍ സര്‍ക്കാര്‍ ചെലവിട്ടത്. എജന്‍സികളെ നിയോഗിക്കുന്നതോടെ ചിലവ് വീണ്ടും ഉയരുമെന്ന കാര്യത്തില്‍ സംശയമില്ല. ഇതിന് പുറമേ ഇതുമറയാക്കി കൂടുതല്‍ കണ്‍സെള്‍ട്ടെന്‍സി നിയമനങ്ങളും സര്ക്കാരിന് നടത്താന്‍ സാധിക്കും. ഇതോടെ വന്‍ക്രമക്കേടിന് വീണ്ടും വഴിയൊരുങ്ങുകയാണ്.
സര്‍ക്കാരിന്റെ വികസനക്ഷേമ പ്രവര്‍ത്തനങ്ങള്‍ സാമൂഹിക മാധ്യമങ്ങള്‍ വഴി ജനങ്ങളിലെത്തിക്കാനുള്ള മാര്‍ഗങ്ങള്‍ ചര്‍ച്ചചെയ്യാന്‍ മുഖ്യമന്ത്രിയുടെ അധ്യക്ഷതയില്‍ എട്ടിന് പ്രത്യേക യോഗം ചേര്‍ന്നിരുന്നു. ഇതിന്റെകൂടി അടിസ്ഥാനത്തിലാണ് പുറത്തുനിന്നുള്ള ഏജന്‍സിയുടെ സഹായം തേടുന്നത്. സാമൂഹിക മാധ്യമ ഇടപെടലിനൊപ്പം മീഡിയ ട്രാക്കിങ് ആന്‍ഡ് റിപ്പോര്‍ട്ടിങ്, മീഡിയ റിലേഷന്‍സ് പ്രവര്‍ത്തനങ്ങള്‍ തുടങ്ങി വിപുലമായ പദ്ധതികളാണ് ഏജന്‍സിയെക്കൊണ്ട് നിര്‍വഹിപ്പിക്കാന്‍ ലക്ഷ്യമിട്ടിട്ടുള്ളത്. തിരഞ്ഞെടുപ്പ് ലക്ഷ്യമിട്ടുള്ള പ്രചാരണത്തിന് സര്‍ക്കാര്‍ പണം ചെലവിടുന്നതു രാഷ്ട്രീയമായി ചോദ്യം ചെയ്യപ്പെടുകയും ചെയ്യും. പോണപോക്കിന് സര്‍ക്കാര്‍ ഖനാവ് തന്നെ കൊള്ളയടിക്കാനാനുള്ള പിണറായി സര്‍ക്കാരിന്റെ ഗൂഢനീക്കമാണ് ഇതിന് പിന്നിലെന്ന ആക്ഷേപം പ്രതിപക്ഷത്തിന്റെ ഭാഗത്തു നിന്നും ഉയരുമെന്ന കാര്യത്തില്‍ സംശയമില്ല.
https://www.facebook.com/Malayalivartha
