സ്വര്‍ണക്കടത്തുക്കേസുമായി ബന്ധപ്പെട്ട് മന്ത്രി കെ.ടി ജലീലിന് ക്ലീന്‍ ചിറ്റ് നല്‍കാതെ കേന്ദ്ര അന്വേഷണ ഏജന്‍സികള്‍. ഇ.ഡിക്ക് പിന്നാലെ മന്ത്രിയെ ചോദ്യം ചെയ്ത എന്‍.ഐ.എയും മന്ത്രിക്ക് ക്ലീന്‍ ചിറ്റ് നല്‍കിയില്ല. മന്ത്രിയെ വീണ്ടും ചോദ്യം ചെയ്യണമെന്നാണ് എന്‍.ഐ.എ പറയുന്നത്. സ്വര്‍ണക്കടത്ത് കേസിലെ മുഖ്യപ്രതി സ്വപ്‌നയെ കസ്റ്റഡിയില്‍ ചോദ്യം ചെയ്ത ശേഷമാകും ഇനി ജലീലിനെ ചോദ്യം ചെയ്യുക. 22നാണ് സ്വപ്‌നയെ കസ്റ്റഡിയില്‍ വാങ്ങുന്നത്. ഫോണ്‍ കോളുമായി ബന്ധപ്പെട്ടുള്ള വിശദ വിവരങ്ങള്‍ മന്ത്രിയില്‍ നിന്ന് ചോദിച്ചറിയും. മന്ത്രിയുടെ വിദേശ യാത്രകളെക്കുറിച്ച് എന്‍ഐഎ അന്വേഷിക്കും. വിദേശയാത്രകളില്‍ ഒപ്പം ആരൊക്കെയുണ്ടായിരുന്നു, അവിടെ ആരെയൊക്കെയാണ് മന്ത്രി സന്ദര്‍ശിച്ചത് തുടങ്ങിയ കാര്യങ്ങളെക്കുറിച്ചാണ് എന്‍ ഐഎ അന്വേഷിക്കുന്നത്.

സ്വപ്‌നയുമായും കോണ്‍സുലേറ്റുമായും തനിക്ക് ഔദ്യോഗിക ബന്ധം മാത്രമെയുള്ളുവെന്നാണ് മന്ത്രി നേരത്തെ അന്വേഷണ ഉദ്യോഗസ്ഥരോട് വെളിപ്പെടുത്തിയത്. എന്നാല്‍ ഇത് പൂര്‍ണമായി അന്വേഷണ സംഘം വിശ്വസിച്ചിട്ടില്ല. ഔദ്യോഗിക ബന്ധത്തിനപ്പുറത്തുള്ള ബന്ധങ്ങള്‍ മന്ത്രിക്ക് ഉണ്ടായിരുന്നുവെന്നാണ് അന്വേഷണ സംഘത്തിന്റെ സംശയം.

അതിനിടെ മന്ത്രിയെ സെക്ഷന്‍ 41 എ പ്രകാരം ചോദ്യം ചെയ്യാന്‍ വിളിപ്പിച്ചാന്‍ അത് സാക്ഷി മാത്രമല്ല പ്രതിയുമാകാമെന്ന് നിയമ വിദഗ്ധര്‍ ചൂണ്ടിക്കാട്ടുന്നു. സംശയ നിഴലിലുള്ള ആരെയും എന്‍.ഐ.എ.അടക്കമുള്ള അന്വേഷണ ഏജന്‍സികള്‍ വിളിപ്പിക്കുന്നത് 'ക്രിമിനല്‍ പ്രൊസീജിയര്‍ കോഡ്' (സി.ആര്‍.പി.സി.) സെക്ഷന്‍ 41 എ പ്രകാരമാണ്. സി.ആര്‍.പി.സി. 162 പ്രകാരവും അന്വേഷണ ഏജന്‍സികള്‍ ചോദ്യം ചെയ്യാനായി വിളിപ്പിക്കാറുണ്ട്. ഇങ്ങനെ വിളിപ്പിക്കുന്നതുകൊണ്ട് നോട്ടീസ് ലഭിച്ചയാള്‍ സാക്ഷിയാണോ പ്രതിയാണോ എന്ന് തീരുമാനിക്കേണ്ടത് അന്വേഷണ ഉദ്യോഗസ്ഥരാണ്. സാക്ഷിയെന്ന നിലയിലാണ് എന്‍.ഐ.എ. വിളിപ്പിച്ചതെന്ന മന്ത്രി ജലീലും സി.പി.എം നേതാക്കളും ന്യായികരിച്ചിരുന്നു. ഇത് പൂര്‍ണമായി ശരിയല്ല. സെക്ഷന്‍ 41 എ പ്രകാരം നല്‍കുന്ന നോട്ടീസില്‍ ഏത് കേസുമായി ബന്ധപ്പെട്ടാണ് വിളിപ്പിക്കുന്നതെന്ന് വ്യക്തമാക്കിയിട്ടുണ്ടാകും. വിളിപ്പിച്ചവര്‍ പിന്നീട് പ്രതിയാക്കപ്പെട്ട സംഭവം ഒട്ടേറെയുണ്ട്. ചോദ്യംചെയ്യാനായി വീണ്ടും വിളിപ്പിക്കേണ്ടിവരുമ്പോഴാണ് സി.ആര്‍.പി.സി.162 പ്രകാരം നോട്ടീസ് നല്‍കുന്നത്. നടന്‍ ദിലീപ് പ്രതിയായ, നടിയെ ആക്രമിച്ച കേസില്‍ സി.ഡി.മാറ്റിയ അഭിഭാഷകരെ ചോദ്യംചെയ്യാന്‍ വിളിച്ചത് സി.ആര്‍.പി.സി. സെക്ഷന്‍ 41 എ പ്രകാരം നോട്ടീസ് നല്‍കിയായിരുന്നു. ഇരുവരെയും പിന്നീട് പ്രതികളാക്കിയിരുന്നു.

സംസ്ഥാന പോലീസ് ഒരാളെ ചോദ്യംചെയ്യാന്‍ വിളിപ്പിക്കുന്നതും സി.ആര്‍.പി.സി. സെക്ഷന്‍ 41 എ പ്രകാരമാണ്. എന്‍.ഐ.എ., പോലീസ്, സി.ബി.ഐ. എന്നിവര്‍ക്ക് ഇത്തരത്തില്‍ നല്‍കുന്ന മൊഴി കോടതിയില്‍ തള്ളിപ്പറഞ്ഞാല്‍ പിന്നെ നിലനില്‍ക്കില്ല. ഇനി പ്രതിയാണെന്ന് ബോധ്യമായാലും അന്വേഷണസംഘം വിളിപ്പിക്കുന്നത് സി.ആര്‍.പി.സി. സെക്ഷന്‍ 41 എ പ്രകാരമാണ്. പക്ഷേ, പ്രതിയാണെന്ന് ബോധ്യമായാല്‍ സാധാരണ നിലയില്‍ അന്വേഷണ സംഘം കസ്റ്റഡിയിലെടുക്കുന്നതിലേക്കാണ് നീങ്ങാറുള്ളത്. പ്രതികള്‍ രക്ഷപ്പെടുമോ, തെളിവ് നശിപ്പിക്കുമോ, സാക്ഷികളെ സ്വാധീനിക്കുമോ തുടങ്ങിയ സാഹചര്യത്തിലാണ് ഇതുണ്ടാകുക. പ്രതികള്‍ മുന്‍കൂര്‍ ജാമ്യാപേക്ഷയൊക്കെ നല്‍കുമ്പോള്‍ കോടതി അന്വേഷണ ഉദ്യോഗസ്ഥരോട് നിര്‍ദേശിക്കുന്നത് 41 എ പ്രകാരം നോട്ടീസ് നല്‍കി വിളിപ്പിക്കാനാണ്. ഈ സാഹചര്യത്തില്‍ മന്ത്രിയെ ന്യായികരിക്കാന്‍ സി.പി.എമ്മിന് ലഭിച്ച മറ്റൊരു ക്യാപ്‌സ്യൂള്‍ കൂടി പാഴാകുന്ന കാഴ്ച്ചയാണ് ഇപ്പോള്‍ കാണാന്‍ സാധിക്കുന്നത്.

ഇതിനിടെ ഇന്നും മന്ത്രി കെ.ടി ജലീലിന്റെ രാജി ആവശ്യപ്പെട്ട് പ്രതിപക്ഷ പ്രതിഷേധം ശക്തമാകും. ഇതിനിടെ സി.പി.എം മന്ത്രിയെ ന്യായികരിക്കാന്‍ മതം പച്ചക്ക് പറഞ്ഞ് വര്‍ഗ്ഗീയ വേര്‍തീരിവ് സൃഷ്ടിക്കാന്‍ ശ്രമിച്ചതിലും പ്രതിഷേധം ശക്തമാകുകയാണ്. മുസ്ലിംലീഗ് തങ്ങളുടെ പത്രത്തില്‍ നല്‍കിയ മുഖപ്രസംഗത്തിലൂടെ അതിശക്തമായ ഭാഷയിലാണ് വിഷയത്തില്‍ പ്രതികരിച്ചത്. അതെസമയം ബി.ജെ.പി അധ്യക്ഷന്‍ കെ.സുരേന്ദ്രന്‍ വിഷയത്തില്‍ കോടിയേരി ബാലകൃഷ്ണനെതിരെ കേസ് രജിസ്റ്റര്‍ ചെയ്യണമെന്നും ആവശ്യപ്പെട്ടു.