നിക്ഷേപ തട്ടിപ്പിന് പുറമേ നികുതി വെട്ടിപ്പും; എം.സി കമറുദ്ദീന് എം.എല്.എക്കുള്ള കുരുക്ക് മറുകുന്നു: 1.41 കോടി രൂപയുടെ നികുതി വെട്ടിപ്പ്; നിക്ഷേപ തട്ടിപ്പ് കേസുകളുടെ എണ്ണം 54 ആയി; മുസ്ലിംലീഗിന്റെ നീക്കങ്ങള്ക്കും തിരിച്ചടി
തട്ടിപ്പിന് പിന്നാലെ വെട്ടിപ്പ് പുറത്ത് വന്നതോടെ മുസ്ലിംലീഗ് എം.എല്.എ എം.സി കമറുദ്ദീനുള്ള കുരുക്ക് മറുകുകയാണ്. നിക്ഷേപകര്ക്ക് പണം തിരികെ നല്കി കാര്യങ്ങള് സെറ്റില് ചെയ്യാന് മുസ്ലിംലീഗ് നേതൃത്വം ഇടപെട്ട് സാവകാശം നേടിയെടുക്കുന്നതിടെയാണ് എം.എല്.എക്കെതിരെ നികുതി വെട്ടിപ്പ് കൂടി കണ്ടെത്തിയിരിക്കുന്നത്. എം.സി കമറുദ്ദീന് എം.എല്.എ ചെയര്മാനായ ഫാഷന്ഗോള്ഡ് ജൂവലറിയില് നിക്ഷേപ തട്ടിപ്പുകള്ക്ക് പുറമേ നികുതി വെട്ടിപ്പും കണ്ടെത്തിയത്. 1.41 കോടി രൂപയുടെ നികുതി വെട്ടിപ്പാണ് ജി.എസ്.ടി ഇന്റലിജന്സ് വിഭാഗം ഫാഷന്ഗോള്ഡ് ജൂവലറി ശാഖകളില് നടത്തിയ പരിശോധനയില് കണ്ടെത്തിയത്. പിഴയും പലിശയുമടക്കം ജി.എസ്.ടി വകുപ്പ് ചുമത്തിയ തുക ഇതുവരെയും അടച്ചിട്ടില്ല.
എം.സി കമറുദ്ദീന് എം.എല്.എ ചെയര്മാനായ കാസര്കോട് കമര് ഫാഷന് ഗോള്ഡ്, ചെറുവത്തൂരിലെ ന്യൂ ഫാഷന് ഗോള്ഡ് ജൂവലറി ശാഖകളില് കഴിഞ്ഞ വര്ഷം ഡിസംബറിലാണ് ജി.എസ്.ടി വകുപ്പ് റെയ്ഡ് നടത്തിയത്. 2019 ജൂലായ്ക്ക് ശേഷം നികുതി അടയ്ക്കാത്തതിനെ തുടര്ന്നായിരുന്നു റെയ്ഡ്. ആസ്തി സംബന്ധിച്ച കണക്ക് പ്രകാരം കാസര്കോട് ജൂവലറി ശാഖയില് വേണ്ട 46 കിലോ സ്വര്ണവും ചെറുവത്തൂരിലെ ജൂവലറിയില് ഉണ്ടാകേണ്ട 34 കിലോ സ്വര്ണവും കാണാനില്ലെന്ന് പരിശോധനയില് കണ്ടെത്തി. സ്വര്ണം നിക്ഷേപകര് പിന്വലിച്ചു എന്നാണ് എം.എല്.എ നല്കുന്ന വിശദീകരണം. എന്നാല് ഇത് സംബന്ധിച്ച് രേഖകളൊന്നും ഉണ്ടായിരുന്നില്ല. ഇത്തരം ഇടപാടുകള് നിയമവിരുദ്ധമാണെന്നും നികുതി വെട്ടിപ്പാണെന്നും കണ്ടെത്തിയ ജി.എസ്.ടി വകുപ്പ് നികുതിയും പിഴയും പലിശയുമടക്കം 2020 ഓഗ്സ്റ്റ് 30 നകം അടക്കേണ്ട തുക വ്യക്തമാക്കി നോട്ടീസ് നല്കി. കാസര്കോട് ജൂവലറി 84,82744 രൂപയും ചെറുവത്തൂരിലെ ജൂവലറി 5,43087 രൂപയുമാണ് അടക്കേണ്ടിയിരുന്നത്.
എന്നാല് ഈ തുക അടയ്ക്കാത്തതിനെ തുടര്ന്ന് നികുതിയുടെ അന്പത് ശതമാനം കൂടി കൂട്ടിചേര്ത്ത് തുക പുതുക്കി നിശ്ചയിച്ച് നല്കാന് ഒരുങ്ങുകയാണ് അധികൃതര്. അതേസമയം ജ്വല്ലറി നിക്ഷേപ തട്ടിപ്പ് കേസുകളില് ക്രൈംബ്രാഞ്ച് തെളിവെടുപ്പ് തുടങ്ങി. പരാതിക്കാരായ അഞ്ച് പേരുടെ മൊഴി ഇന്നലെ രേഖപ്പെടുത്തി. ഇന്ന് കൂടുതല് നിക്ഷേപകരുടെ മൊഴിയെടുക്കും. അതിനിടെ നിക്ഷേപമായി വാങ്ങിയ 28 പവന് സ്വര്ണം തട്ടിയെന്ന വലിയപറമ്പ് സ്വദേശിയുടെ പരാതിയില് എംഎല്എക്കെതിരെ ഒരു വഞ്ചന കേസ് കൂടി രജിസ്റ്റര് ചെയ്തു. ഇതോടെ എം എല് എ ക്കെതിരെ 54 വഞ്ചന കേസുകളായി. ഇതിനിടെ മുസ്ലിംലീഗ് എം.എല്.എക്കെതിരെ കൂടുതല് അച്ചടക്ക നടപടിക്ക് ഒരുങ്ങുന്നതായും സൂചനയുണ്ട്. പാണക്കാട് എത്തി എം.എല്.എയും സംഘവും വിശദീകരണം നല്കാന് ഒരുങ്ങിയെങ്കിലും അത് നടന്നിരുന്നില്ല.
https://www.facebook.com/Malayalivartha