എന്ഐഎ സംഘം അറസ്റ്റ് ചെയ്ത അല്ഖായിദ പ്രവര്ത്തകന് മുസാഫര് 7 വര്ഷമായി തുണിക്കടയില്... സംശയങ്ങളൊന്നും തോന്നിയിരുന്നില്ലെന്ന് കടയുടമ
എന്ഐഎ സംഘം അറസ്റ്റ് ചെയ്ത അല്ഖായിദ പ്രവര്ത്തകര്ക്ക് വീട് നല്കിയ ക്വാര്ട്ടേഴ്സ് ഉടമ പി.എ.അന്വര് പറഞ്ഞത് സാധാരണയായി അതിഥിത്തൊഴിലാളികള്ക്ക് വീട് കൊടുക്കാറില്ലെന്നും എന്നാല് മുന്പ് ഇവരുടെ അയല്ക്കാരിയായിരുന്ന വീട്ടമ്മ ക്വാര്ട്ടേഴ്സില് താമസിക്കാനെത്തിയപ്പോള് അവരുടെ ശുപാര്ശ പ്രകാരമാണു വീട് നല്കിയതെന്നുമാണ്. തിരിച്ചറിയല് രേഖയും കരാറും ഉണ്ട്. സംശയകരമായ ഒന്നും തോന്നിയിരുന്നില്ലെന്ന് അദ്ദേഹം പറഞ്ഞു. 10 വര്ഷം മുന്പാണ് മുസറഫ് ആദ്യം വന്നത്. 3 വര്ഷത്തിനു ശേഷം പോയി. വീണ്ടും എത്തിയിട്ട് 7 വര്ഷമായി. 5 വര്ഷം മുന്പാണു നാട്ടില്നിന്നു ഭാര്യയെയും മക്കളെയും കൊണ്ടുവന്നത്. നാലാം ക്ലാസില് പഠിക്കുന്ന കുട്ടിയും 4 വയസ്സുള്ള കുട്ടിയുമുണ്ട്.
പെരുമ്പാവൂരിലെ തുണിക്കടയില് 7 വര്ഷമായി ജോലി ചെയ്യുന്ന മുസറഫ് ഹുസൈനെക്കുറിച്ചു സംശയങ്ങളൊന്നും തോന്നിയിരുന്നില്ലെന്ന് കടയുടമ കളമശേരി സ്വദേശി വി.എം. അബുബക്കര് പറഞ്ഞു. കടയിലുള്ളപ്പോള് ഫോണില് സംസാരിക്കാറുണ്ട്. വിഡിയോ കാണാറുണ്ട്. ബംഗാളിക്കു പുറമേ മലയാളവും സംസാരിക്കാനറിയാം. 3 വര്ഷം മുന്പ് എല്ലാ രേഖകളും പൊലീസിന് കൈമാറിയിരുന്നെന്നും അബൂബക്കര് പറഞ്ഞു.
മുസറഫ് ഹുസൈന് രാവിലെ പോയാല് രാത്രിയാണ് വരുന്നത്. ഭാര്യ വല്ലപ്പോഴും സംസാരിക്കാറുണ്ട്. സമീപത്തെ മലയാളി വീടുകളുമായി ഇവര്ക്ക് അടുപ്പം കുറവായിരുന്നെന്നു സമീപത്തു താമസിക്കുന്ന വീട്ടമ്മ പറഞ്ഞു. രാവിലെ ചാനലുകളിലൂടെയാണ് വിവരം അറിഞ്ഞതെന്നും അവര് പറഞ്ഞു.
ഭര്ത്താവിന് ഭീകര ബന്ധമുണ്ടെന്നു വിശ്വസിക്കുന്നില്ലെന്നു മുസറഫിന്റെ ഭാര്യ പറഞ്ഞതായി വാര്ഡ് അംഗം വി.സി.ചന്ദ്രന് പറഞ്ഞു. ഭര്ത്താവിനെ കൊണ്ടുപോയതിനു ശേഷം വീട് അടച്ചു കുട്ടികളുമായി അകത്തിരിക്കുകയാണിവര്. മാധ്യമ പ്രവര്ത്തകര് എത്തിയെങ്കിലും തുറക്കാന് തയാറായില്ല.
മൂന്നാം ക്ലാസ് വരെ പഠിച്ചിട്ടുള്ള യാക്കൂബ് ബിശ്വാസിന് എഴുതാനും വായിക്കാനും അറിയില്ലെന്ന് കൂടെ താമസിക്കുന്ന മൈനുള് സര്ക്കാരും ടൈറ്റന് മണ്ഡലും പറഞ്ഞു. എല്ലാവരും ബംഗാളില് മൂര്ഷിദാബാദ് ജില്ലക്കാരാണെങ്കിലും കേരളത്തിലെത്തിയപ്പോഴാണു തമ്മില് പരിചയം. നാട്ടില് ഭാര്യയും മകളുമുണ്ട്. ജോലി സ്ഥലത്തു ഫോണ് ഉപയോഗിക്കുന്നതു കണ്ടിട്ടില്ല. ജോലി കഴിഞ്ഞെത്തിയാല് ശബ്ദ സന്ദേശത്തിലൂടെയാണു ഫോണില് ആശയവിനിമയം നടത്തിയിരുന്നത്. സംശയകരമായ ഒന്നും അതിലുണ്ടായിരുന്നില്ല. വീട്ടുകാരുമായി ഏറെ നേരം സംസാരിച്ചിരുന്നതായും സുഹൃത്തുക്കള് പറഞ്ഞു. യാക്കൂബ് ബിശ്വാസിന്റെ പെരുമാറ്റത്തില് സംശയങ്ങളൊന്നുമുണ്ടായിരുന്നില്ലെന്ന് അയല്വാസിയായ കണ്ടന്തറ കരിമ്പനയ്ക്കല് മൊയ്തീന് പറഞ്ഞു.
മുര്ഷിദ് ഹസനെക്കുറിച്ചു പാതാളത്തെ സമീപവാസികള്ക്കുള്ള അഭിപ്രായം ശാന്തന്, സൗമ്യന്, അധികം സംസാരിക്കാത്തവന് എന്നാണ്. തുടര്ച്ചയായി ജോലിക്കു പോകുന്ന സ്വഭാവക്കാരനല്ല. 2 മാസം മുന്പാണ് മുര്ഷിദ് ഹസന് (26) പാതാളം പാലത്തിനു സമീപം പച്ചക്കറിക്കട നടത്തുന്ന കാഞ്ഞിരത്തിങ്കല് നാസറിന്റെ ഉടമസ്ഥതയിലുള്ള വാടകവീട്ടില് താമസത്തിനെത്തിയത്. എടയാര് വ്യവസായ മേഖലയിലെ കമ്പനിയിലേക്ക് തൊഴിലാളികളെ നല്കുന്ന അസീസ് മുല്ലയാണ് ഈ വീട് വാടകക്കെടുത്തിട്ടുള്ളത്.
https://www.facebook.com/Malayalivartha