കോഴികളെ വളര്ത്തി വരുമാനം കണ്ടെത്തുന്നതിനിടയിലും അബൂബക്കറിന് നീറ്റില് ഉന്നത റാങ്ക്, ഇരുന്നു പഠിക്കാന് കസേര പോലുമില്ല!
മടവൂര് 13-ാം വാര്ഡിലെ മേലാഞ്ഞിക്കോത്ത് ഇല്യാസിന്റെയും റഹ്മത്തിന്റെയും മകനായ അബൂബക്കര് സിദ്ദിഖും സഹോദരനും സഹോദരിയും ചേര്ന്നു കോഴികളെ വളര്ത്തിയാണ് ജീവിതം മുന്നോട്ട് കൊണ്ടുപോകാനുള്ള വരുമാനം കണ്ടെത്തുന്നത്. മാനസിക വെല്ലുവിളി നേരിടുന്ന പിതാവിനു കാര്യമായ ജോലികള്ക്കൊന്നും പോകാന് കഴിയില്ല. മണ്കട്ടകള് കൊണ്ടു നിര്മിച്ച വീട് ബലക്ഷയം മൂലം നിലംപൊത്താറായി.
എന്നാല് ഈ പ്രതിബന്ധങ്ങള്ക്കൊന്നും തന്റെ ലക്ഷ്യത്തിലെത്തുന്നതില് നിന്നും അബൂബക്കറിനെ തടയാന് കഴിഞ്ഞില്ല. ഈ മിടുക്കന് നീറ്റ് പരീക്ഷയില് ഉന്നത റാങ്ക് കരസ്ഥമാക്കിയാണ് വിജയിച്ചത്. ഒബിസി വിഭാഗത്തില് 1208 ആണ് റാങ്ക്. ചക്കാലക്കല് ഹയര് സെക്കന്ഡറി സ്കൂളിലാണ് എസ്എസ്എല്സിയും പ്ലസ്ടുവും പഠിച്ചത്.
ഓരോ പരീക്ഷയിലും ഉന്നത വിജയം നേടുമ്പോള് ലഭിക്കുന്ന ഉപഹാരങ്ങള് സൂക്ഷിക്കാന് സ്ഥലമില്ലാത്തതിനാല് പെട്ടിയിലാക്കി വച്ചിരിക്കുന്നു. മേല്ക്കൂരയിലെ ഓടുകള് തകര്ന്നതിനാല് ടാര്പോളിന് വലിച്ചു കെട്ടിയിരിക്കുകയാണ്. നീറ്റ് പരീക്ഷയുടെ തലേന്നും വീട് ചോര്ന്നൊലിക്കുകയായിരുന്നു. സ്വിച്ചുകള്ക്കുള്ളില് വെള്ളം കയറിയതിനാല് വിളക്കിന്റെ വെട്ടത്തിലായിരുന്നു പഠനം.
പഠനവും എന്ട്രന്സ് പരിശീലനവും പൂര്ത്തിയാക്കാന് ഒട്ടേറെപ്പേര് സഹായിച്ചു. സാഹചര്യങ്ങളറിഞ്ഞ് യാത്ര സൗജന്യമാക്കിക്കൊടുത്തുകൊണ്ട് ബസ് ജീവനക്കാര് വരെ പിന്തുണച്ചു. പിതാവിനു മരുന്നും ചികിത്സയും ലഭ്യമാക്കാനും പലരും സഹായിക്കുന്നുണ്ട്.
വീടിനായി മടവൂര് പഞ്ചായത്തില് പലതവണ അപേക്ഷ നല്കിയെങ്കിലും പരിഗണിച്ചില്ലെന്നു കുടുംബാംഗങ്ങള് പറയുന്നു. മക്കള്ക്ക് ഇരുന്നു പഠിക്കാന് സൗകര്യമുള്ള ഒരു വീടാണ് ഇപ്പോള് റഹ്മത്തിന്റെ സ്വപ്നം.
https://www.facebook.com/Malayalivartha