മൂന്ന് മലയാളികളുടെ വേഗത്തിലും കുതിപ്പിലുമാണ് ഇന്ത്യന്‍ പുരുഷ റിലേ ടീം പാരിസ് ഒളിമ്പിക്സിന് യോഗ്യത നേടി്. കൊല്ലം നിലമേല്‍ സ്വദേശിയായ മുഹമ്മദ് അനസ് യഹിയ, പാലക്കാട് ചെര്‍പ്പുളശേരിക്കാരന്‍ വി മുഹമ്മദ് അജ്മല്‍, ഡല്‍ഹി മലയാളി അമോജ് ജേക്കബ് എന്നിവര്‍ ട്രാക്കിലിറങ്ങി.

ഒപ്പം തമിഴ്നാട്ടുകാരന്‍ ആരോക്യ രാജീവും. പാല രാമപുരം സ്വദേശിയായ അമോജ് രണ്ടുപതിറ്റാണ്ടായി ഡല്‍ഹിയിലാണ്. ഈ മൂന്നു മലയാളി അത്ലീറ്റുകളും കഴിഞ്ഞവര്‍ഷം ബുഡാപെസ്റ്റില്‍ നടന്ന ലോക ചാമ്പ്യന്‍ഷിപ്പില്‍ ഏഷ്യന്‍ റെക്കോഡിട്ടിരുന്നു. അന്ന് കുറിച്ചത് രണ്ട് മിനിറ്റ് 59.05 സെക്കന്‍ഡാണ്. ഫൈനലില്‍ ഇന്ത്യ അഞ്ചാമതായി. നാലാംതവണയാണ് പുരുഷ ടീം ഒളിമ്പിക്സിന് യോഗ്യത നേടുന്നത്.

2000 സിഡ്നി ഒളിമ്പിക്സിലാണ് ആദ്യം. കഴിഞ്ഞതവണ ടോക്യോ ഒളിമ്പിക്സില്‍ അനസ്, അമോജ്, നോഹ നിര്‍മല്‍ ടോം, ആരോക്യ രാജീവ് എന്നിവര്‍ ഉള്‍പ്പെട്ട ടീം ഹീറ്റ്സില്‍ നാലാമതായി. ഫൈനലില്‍ എത്താനായില്ലെങ്കിലും ടീം ഏഷ്യന്‍ റെക്കോഡിട്ടു (3:00.25). ഈ സമയമാണ് ലോകചാമ്പ്യന്‍ഷിപ്പില്‍ തിരുത്തിയത്.

ലോക റിലേ ചാമ്പ്യഷിപ്പിനുള്ള ഇന്ത്യന്‍ ടീമില്‍ 15 അത്ലീറ്റുകളായിരുന്നു. അതില്‍ എട്ടുപേര്‍ പുരുഷന്മാരാണ്. മലയാളിയായ നോഹ നിര്‍മല്‍ ടോമിന് ട്രാക്കിലിറങ്ങാന്‍ അവസരം ലഭിച്ചില്ല.