കോണ്‍ഗ്രസിന്റെ ദേശീയ നേതൃത്വത്തിന് വലിയ മാറ്റങ്ങായിരിക്കും 2021 യില്‍ സംഭവിക്കുക. പുതുവര്‍ഷത്തില്‍ പുതിയ അധ്യക്ഷന്‍ കോണ്‍ഗ്രസിനെ നയിക്കുന്നതിനുള്ള സാധ്യത തെളിയികുകയാണ്. അത് രാഹുല്‍ ഗാന്ധി ആകാനുള്ള സാധ്യയില്ലെന്നാണ് റിപ്പോര്‍ട്ട്. കഴിഞ്ഞ വര്‍ഷം പൊതുതിരഞ്ഞെടുപ്പില്‍ പരാജയം നേരിട്ടതിനു പിന്നാലെ രാഹുല്‍ സ്ഥാനം ഒഴിഞ്ഞതു മുതല്‍ സോണിയാ ഗാന്ധിയാണ് അധ്യക്ഷ സ്ഥാനത്തുള്ളത്. നെഹറു കുടുംബത്തിന് പുറത്ത് നിന്നും ഒരു കോണ്‍ഗ്രസ് അധ്യക്ഷനുണ്ടാകാനുള്ള സാധ്യതയും തള്ളി കളയാന്‍ കഴിയില്ല. കാരണം പാര്‍ട്ടി നേതൃത്വത്തെ വിമര്‍ശിച്ച് കത്തയച്ച കോണ്‍ഗ്രസ് 'വിമതരു'മായി കോണ്‍ഗ്രസ് അധ്യക്ഷ സോണിയാ ഗാന്ധി നാളെ കൂടിക്കാഴ്ച നടത്താന്‍ പോകുകയാണ്. ഈ ചര്‍ച്ചയില്‍ സോണിയാ ഗാന്ധിക്കൊപ്പം രാഹുലും പ്രിയങ്കയും ഉണ്ടാകുമെന്നാണ് റിപ്പോര്‍ട്ട്.

മാസങ്ങളായി തുടരുന്ന പാര്‍ട്ടി ഉള്‍പ്പോര് രമ്യമായി പരിഹരിക്കാനാണു സോണിയ നേരിട്ട് രംഗത്തിറങ്ങിയിരിക്കുന്നത്. വിമതര്‍ മാത്രമല്ല മറ്റു മുതിര്‍ന്ന നേതാക്കളും യോഗത്തില്‍ സന്നിഹിതരായിരിക്കുമെന്നു കോണ്‍ഗ്രസ് വൃത്തങ്ങള്‍ സൂചിപ്പിച്ചു. ഈ ചര്‍ച്ചയില്‍ പുതിയ കോണ്‍ഗ്രസ് അധ്യക്ഷനെ കുറിച്ചുള്ള ചര്‍ച്ചകള്‍ നടന്നേക്കും. നെഹ്‌റു കുടുംബത്തില്‍ നിന്നും തന്നെയാണ് പുതിയ അധ്യക്ഷനെ തീരുമാനിക്കുന്നതെങ്കില്‍ അത് പ്രിയങ്ക ഗാന്ധിയാകാനും സാധ്യതയുണ്ട്. എന്നാല്‍ പകരം സാധ്യത നെഹ്‌റു കുടുംബത്തിന് വിനീത വിധേയനായ, കുടുംബത്തിന് പുറത്തുള്ള നേതാവിലേക്കും പോകാന്‍ സാധ്യതയുണ്ട്. അത് ഒരിക്കലും വിമത സ്വരം ഉയര്‍ത്തിയ 23 പേരില്‍ ഒരാള്‍ ആയിരിക്കില്ലെന്ന കാര്യം ഉറപ്പാണ്.

മധ്യപ്രദേശ് മുന്‍ മുഖ്യമന്ത്രി കമല്‍നാഥ് ഇടപ്പെട്ടതോടെയാണ് വിമതരുമായി സോണിയ ചര്‍ച്ചയ്ക്കു സമ്മതിപ്പിച്ചതെന്നാണ് റിപ്പോര്‍ട്ട്. 23 അംഗസംഘമാണ് കോണ്‍ഗ്രസ് നേതൃത്വത്തെ വിമര്‍ശിച്ച് അധ്യക്ഷ സോണിയ ഗാന്ധിക്ക് കത്തയച്ചത്. ഇവര്‍ ചൂണ്ടിക്കാട്ടിയ വിഷയങ്ങളുടെ പ്രധാന്യം കണക്കിലെടുക്കണമെന്ന് കമല്‍നാഥ് നേതൃത്വത്തെ ധരിപ്പിച്ചു. മുതിര്‍ന്ന നേതാക്കള്‍ ഉള്‍പ്പെടെ കത്തയച്ചത് നേതൃത്വത്തെ ഞെട്ടിപ്പിച്ചിരുന്നു. വിമതരുമായി ആദ്യം അകലം പാലിച്ചിരുന്ന കമല്‍നാഥ് പിന്നീട് മധ്യസ്ഥന്റെ റോളിലേക്ക് എത്തുകയായിരുന്നു.

കര്‍ണാടക, മധ്യപ്രദേശ് തിരഞ്ഞെടുപ്പുകളിലും പാര്‍ട്ടിക്കു തിരിച്ചടി നേരിട്ടിയിരുന്നു. രാജസ്ഥാനില്‍ സച്ചിന്‍ പൈലറ്റ് അവസാനനിമിഷം തിരിച്ചെത്തിയതു മൂലം അശോക് ഗലോട്ട് സര്‍ക്കാര്‍ മുടി നാഴിഴക്ക് രക്ഷപ്പെടുകയായിരുന്നു. വിമത ശല്യം അവസാനിച്ചിട്ടില്ലെന്ന് ഗലോട്ട് കഴിഞ്ഞ ദിവസം പറഞ്ഞിരുന്നു. ഗലോട്ടും യോഗത്തില്‍ പങ്കെടുക്കുമെന്നാണു സൂചന. ബിഹാര്‍ തിരഞ്ഞെടുപ്പിലെ വന്‍ വീഴ്ചയ്ക്കു പിന്നാലെ കപില്‍ സിബല്‍ ഉള്‍പ്പെടെ, നേതൃത്വം ആത്മപരിശോധനയ്ക്കു തയാറാകണമെന്ന് ആവശ്യപ്പെട്ട് രംഗത്തെത്തിയിരുന്നു. പി. ചിദംബരവും വിശകലനം അനിവാര്യമാണെന്നു ചൂണ്ടിക്കാട്ടി.

നേതൃത്വത്തിനു കത്തയച്ച സംഘത്തിലെ അഞ്ചോ ആറോ പേര്‍ മാത്രമാകും ചര്‍ച്ചയില്‍ പങ്കെടുക്കുകയെന്നാണു സൂചന. ഈ വര്‍ഷം ഓഗസ്റ്റിലാണ് കോണ്‍ഗ്രസില്‍ സമ്പൂര്‍ണ മാറ്റം ആവശ്യപ്പെട്ട് അഞ്ചു മുന്‍ മുഖ്യമന്ത്രിമാരും മുന്‍ കേന്ദ്രമന്ത്രിമാരും ഉള്‍പ്പെടെ 23 പേര്‍ ഒപ്പിട്ട കത്ത് സോണിയ ഗാന്ധിക്ക് അയച്ചത്. ഗുലാം നബി ആസാദ്, കബില്‍ സിബല്‍, മനീഷ് തിവാരി, പി.ജെ. കുര്യന്‍, ശശി തരൂര്‍ എന്നിവരും കത്തില്‍ ഒപ്പിട്ടവരില്‍ ഉള്‍പ്പെട്ടിരുന്നു. തിരുച്ചുവരവിനു വഴിയൊരുക്കാന്‍ കൃത്യമായ നേതൃത്വം വേണമെന്നും എഐസിസിയിലും പിസിസികളിലും മുഴുവന്‍ സമയ അധ്യക്ഷന്മാര്‍ വേണമെന്നുമുള്ള ആവശ്യമായിരുന്നു കത്തില്‍ ഉണ്ടായിരുന്നത്. അതുകൊണ്ടു തന്നെ സോണിയയുടെ ചര്‍ച്ചയും പുതിയ കോണ്‍ഗ്രസ് പ്രസിഡന്റിനെ സംബന്ധിച്ചായിരിക്കുമെന്ന കാര്യത്തില്‍ തര്‍ക്കമില്ല.