കോണ്‍ഗ്രസിനെ തോല്‍പ്പിച്ചത് കോണ്‍ഗ്രസ് തന്നെയാണ്. അവര്‍ അവരുടെ വോട്ട് അവരുടെ സ്ഥാനാര്‍ഥികള്‍ക്ക് തന്നെ നല്‍കിയിരുന്നെങ്കില്‍ ഇങ്ങനെയൊരു ഗതികേടില്‍ പാര്‍ട്ടി എത്തുമായിരുന്നില്ല. അത് തെളിയിക്കുന്ന തെളിവുകളാണ് ഓരോ ജില്ലയില്‍ നിന്നും പുറത്ത് വരുന്നത്. കോണ്‍ഗ്രസ് നേതാക്കളുടെ ചതി തുറന്ന് കാട്ടുകയാണ് സാധാരണക്കാരായ പ്രവര്‍ത്തകര്‍. ഇടുക്കിയില്‍ തദ്ദേശ സ്വയംഭരണ തിരഞ്ഞെടുപ്പില്‍ യുഡിഎഫിനെ പരാജയപെടുത്താന്‍ മുതിര്‍ന്ന കോണ്‍ഗ്രസ് നേതാക്കള്‍ പണം വാങ്ങിയതായി പരാതി. പ്രദേശിക കോണ്‍ഗ്രസ് പ്രവര്‍ത്തകരും ആര്‍എസ്പിയും ഇത് സംബന്ധിച്ച് കെപിസിസിക്കു പരാതി നല്‍കി.

ഹൈറേഞ്ചിലുള്ള മൂന്ന് മുതിര്‍ന്ന കോണ്‍ഗ്രസ് നേതാക്കള്‍ പണം കൈപറ്റി, യുഡിഎഫിനെ പരാജയപെടുത്തിയെന്നാണ് മറ്റൊരു പരാതി ഉയര്‍ന്നത്. സിപിഎമ്മില്‍നിന്നും 25 ലക്ഷം രൂപ കൈപറ്റിയതായാണ് ആരോപണം. ഇത് സംബന്ധിച്ച് പ്രാദേശിക കോണ്‍ഗ്രസ് പ്രവര്‍ത്തകരും ആര്‍എസ്പി പ്രവര്‍ത്തകരും കെപിസിസിക്കു പരാതി നല്‍കി.

അതെ സമയം തന്നെ സ്ഥാനാര്‍ഥി നിര്‍ണയം അട്ടിമറിച്ചെന്നാരോപിച്ച് കോണ്‍ഗ്രസ് പ്രവര്‍ത്തകര്‍ ജില്ലാ നേതാക്കന്‍മാരുടെ കോലം കത്തിച്ചു പ്രതിഷേധിച്ചു. തൊടുപുഴ നഗരസഭയിലെ യുഡിഎഫിന്റെ ഉറച്ച കോട്ടകളില്‍ പോലും പാര്‍ട്ടി സ്ഥാനാര്‍ഥികള്‍ ദയനീയമായി പരാജയപ്പെട്ടതോടെ ഇടുക്കി ജില്ലയില്‍ നിന്നുള്ള കെപിസിസി സെക്രട്ടറി റോയ് കെ. പൗലോസിന്റെയും, ബ്ലോക്ക് പ്രസിഡന്റിന്റെയും കോലം കത്തിച്ചാണ് കോണ്‍ഗ്രസ് പ്രവര്‍ത്തകര്‍ പ്രതിഷേധിച്ചത്. വിമതരെയിറക്കി പാര്‍ട്ടി സ്ഥാനാര്‍ഥികളെ പരാജയപ്പെടുത്തിയെന്നാണ് ഇവര്‍ക്കെതിരെയുള്ള ആരോപണം.

കഴിഞ്ഞ രണ്ട് തവണയായി മൃഗീയ ഭൂരിപക്ഷത്തില്‍ യുഡിഎഫ് ഭരിച്ച പഞ്ചായത്ത് ഇത്തവണ എല്‍ഡിഎഫ് പിടിച്ചെടുത്തു. കോണ്‍ഗ്രസിന്റെ ശക്തി കേന്ദ്രങ്ങളില്‍ പോലും വന്‍ പരാജയമാണ് നേരിട്ടത്. ജില്ലാ കോണ്‍ഗ്രസ് നേതൃത്വം പരാജയം ഏറ്റെടുത്ത് രാജി വച്ചൊഴിയണമെന്നും ആവശ്യമുയരുന്നുണ്ട്.

ഇതെ ആവശ്യം തന്നെയാണ് കൊല്ലത്തും ഉയരുന്നത്. ജില്ലയിലെ യു.ഡി.എഫിന്റെ കനത്ത പരാജയത്തിന് പിന്നില്‍ കൊല്ലം ഡിസിസി പ്രസിഡന്റ് ബിന്ദു കൃഷ്ണയാണെന്നാണ് ആക്ഷേപം. ഇവര്‍ക്കെതികെ ഡി.സി.സി ഓഫീസിന് മുന്നില്‍ പോസ്റ്റര്‍ പ്രതിഷേധം തുടങ്ങിട്ടുണ്ട്. ബിന്ദു കൃഷ്ണ ബിജെപിയുടെ ഏജന്റ് ആണെന്നാണ് വിര്‍ശനം. സേവ് കോണ്‍ഗ്രസ് എന്ന പേരിലാണ് പോസ്റ്റര്‍ പ്രത്യക്ഷപ്പെട്ടിരിക്കുന്നത്.

ബിന്ദുകൃഷ്ണ ബിജെപിയുടെ ഏജന്റാണ്, പേയ്‌മെന്റ് റാണിയായ ബിന്ദുകൃഷ്ണ കോണ്‍ഗ്രസിന്റെ ശത്രുവാണെന്നും പാര്‍ട്ടിയില്‍ നിന്ന് പുറത്താക്കണമെന്നും പോസ്റ്ററില്‍ ആവശ്യപ്പെടുന്നു. കൊല്ലം ഡിസിസി ഓഫീസിനും ആര്‍.എസ്.പി ഓഫീസിനും മുന്നിലാണ് പോസ്റ്റര്‍ പ്രത്യക്ഷപ്പെട്ടിരിക്കുന്നത്. ബിന്ദുകൃഷ്ണയെ ഡിസിസി പ്രസിഡന്റ് സ്ഥാനത്ത് നിന്നും പുറത്താക്കി പാര്‍ട്ടിയെ രക്ഷിക്കണമെന്നാണ് സേവ് കോണ്‍ഗ്രസ് എന്ന പേരില്‍ പ്രത്യക്ഷപ്പെട്ട പോസ്റ്ററില്‍ ആവശ്യപ്പെടുന്നത്.

നേരത്തെ തിരുവനന്തപുരം ഡി.സി.സിക്ക് എതിരെയും ഇത്തരത്തില്‍ പ്രതിഷേധം ഉയര്‍ന്നിയിരുന്നു. വി.എസ് ശിവകുമര്‍, തമ്പാനൂര്‍ രവി. ഡി.സി.സി പ്രസിഡന്റ് നെയ്യാറ്റിന്‍കര സനല്‍ എന്നിവര്‍ക്കെതിരെയാണ് ആരോപണം ഉയര്‍ന്നത്. ഇവര്‍ സീറ്റു കച്ചവടം നടത്തി സ്വന്തം ഇഷ്ടക്കാര്‍ക്ക് സീറ്റു നല്‍കി എന്നായിരുന്നു ആരോപണം. ഇതാണ് തിരുവനന്തപുരം ജില്ലയില്‍ കനത്ത പരാജയത്തിന് കാരണമെന്ന് പ്രവര്‍ത്തകര്‍ ആരോപിച്ചിയിരുന്നു. മറ്റു ജില്ലകളില്‍ നിന്നും ഇത്തരത്തില്‍ വ്യാപകമായി സീറ്റു കച്ചവട ആരോപണമാണ് ഉയരുന്നത്.