തദ്ദേശ തിരഞ്ഞെടുപ്പില്‍ ആകെ മൊത്തം തകര്‍ന്ന് തരിപ്പണമായ അവസ്ഥയിലാണ് കോണ്‍ഗ്രസ്. തെരഞ്ഞെടുപ്പിന് മുമ്പ് സീറ്റ് കച്ചവടം നടത്തി മറ്റു മുന്നണികളെ സഹായിച്ച കോണ്‍ഗ്രസ് തിരഞ്ഞെടുപ്പിന് ശേഷവും അതെ പണി തന്നെ തുടരുകയാണ്. സ്വന്തം നിലനില്‍പ്പുപോലും നോക്കാതെ ആരെയൊക്കെയോ സഹായിക്കുന്നുന്നു. അങ്ങള മരിച്ചാലും വേണ്ടില്ല നാത്തുന്റെ കണ്ണീര്‍ കണ്ടാല്‍ മതിയെന്നതാണ് കോണ്‍ഗ്രസിന്റെ ഇപ്പോഴത്തെ അവസ്ഥ. അതുകൊണ്ടു തന്നെയാണ് പ്രതിപക്ഷ നേതാവിന്റെ വാര്‍ഡില്‍ പോലും കോണ്‍ഗ്രസ് സ്ഥാനാര്‍ത്ഥി പരാജയപ്പെട്ടത് വന്‍ വിമര്‍ശനങ്ങള്‍ ഏറ്റുവാങ്ങുമ്പോഴും രമേശിന്റെ ചെന്നിത്തല ഉള്‍പ്പെടുന്ന പഞ്ചായത്തില്‍ ആ കടുംകൈ കോണ്‍ഗ്രസ് എടുക്കുന്നത്. ബിജെപിയ്ക്ക് മുന്നില്‍ ചെറുതാകാതിരിക്കാന്‍ കോണ്‍ഗ്രസ് സിപിഎമ്മിന്റെ പിന്തുണ തേടിയിരിക്കുകയാണ്. ചെന്നിത്തല തൃപ്പെരുന്തുറ പഞ്ചായത്തിലാണ് സി പി എം കോണ്‍ഗ്രസ് ധാരണയ്ക്ക് നീക്കം നടക്കുന്നത്.

സിപിഎം സ്ഥാനാര്‍ത്ഥിയായി ജയിച്ചയാള്‍ക്ക് അദ്ധ്യക്ഷ പദവി നല്‍കി ദത്തെടുത്ത് പഞ്ചായത്ത് ഭരിക്കാനാണ് തീരുമാനം. കഴിഞ്ഞതവണ എല്‍ ഡി എഫ് ഭരിച്ചിരുന്ന പഞ്ചായത്തില്‍ ഇത്തവണ പ്രസിഡന്റ് വനിതാ സംവരണമാണ്. ഈ സഹാചര്യത്തിലാണ് രഹസ്യധാരണയ്ക്ക് സി പി എമ്മും കോണ്‍ഗ്രസും ശ്രമിക്കുന്നത്. പ്രസിഡന്റ് സ്ഥാനം സി പി എം പ്രതിനിധിയായ പട്ടികജാതി വനിതയ്ക്ക് നല്‍കാനാണ് ആലോചന. വൈസ് പ്രസിഡന്റ് സ്ഥാനം കോണ്‍ഗ്രസിനും ലഭിക്കും.

ഇത്തവണ തെരഞ്ഞെടുപ്പ് ഫലം വന്നപ്പോള്‍ ഒരു മുന്നണിക്കും വ്യക്തമായ ഭൂരിപക്ഷം കിട്ടിയില്ല. കോണ്‍ഗ്രസും ബിജെപിയും ആറു വീതം സീറ്റുകള്‍ പിടിച്ചപ്പോള്‍ സിപിഎമ്മിന് അഞ്ചു സീറ്റാണ് ഉള്ളത്. എല്‍ ഡി എഫിനും ബിജെപിയ്ക്കും പ്രസിഡന്റ് ആകാന്‍ പട്ടികജാതി വനിത പ്രതിനിധികളുണ്ട്. എന്നാല്‍ കോണ്‍ഗ്രസിന് പട്ടികജാതി വനിതയെ ജയിപ്പിച്ചെടുക്കാനായിരുന്നില്ല. ഇതോടെയാണ് സിപിഎമ്മിനെ സമീപിക്കാന്‍ തീരുമാനിച്ചത്.

എല്‍.ഡി.എഫിന്റെയും യു.ഡി.എഫിന്റെയും പിന്തുണ വേണ്ടെന്ന് പറയുന്ന ബി ജെ പി സ്വതന്ത്രന്റെ പിന്തുണയോടെ ഭരണം പിടിക്കുന്നതിനുളള ആലോചനകള്‍ ശക്തമാക്കിയിട്ടുണ്ട്. പതിനഞ്ചാം വാര്‍ഡില്‍ നിന്ന് കോണ്‍ഗ്രസ് റിബലായി ജയിച്ച ദീപുവിന്റെ നിലപാടും അദ്ധ്യക്ഷ സ്ഥാനത്തേക്ക് നിര്‍ണ്ണായകമാണ്.

അതെ സമയം പരാജയം യു.ഡി.എഫില്‍ വലിയ പൊട്ടിത്തെറിക്ക് വഴിമരുന്ന് ഇട്ടിരിക്കുകയാണ്. യുഡിഎഫിന്റെ തോല്‍വിക്ക് കാരണം കോണ്‍ഗ്രസിന്റെ ദുര്‍ബലമായ സംഘടനാ സംവിധാനമാണെന്ന് കുറ്റപ്പെടുത്തി മുസ്ലിംലീഗ് രംഗത്ത് വന്നു. തോല്‍വിയുടെ ഉത്തരവാദിത്വം കോണ്‍ഗ്രസിനാണെന്ന നിലപാടില്‍ മുന്നണിയിലെ മറ്റുഘടക കക്ഷികളും രംഗത്തെത്തിയതിന് പിന്നാലെയാണ് ലീഗിന്റെ അതൃപ്തി പരസ്യമാക്കുന്നത്.

മുസ്ലിം ലീഗിന് തങ്ങളുടെ ശക്തികേന്ദ്രങ്ങളില്‍ വലിയ മുന്നേറ്റം കാഴ്ചവെക്കാനായെങ്കിലും കോണ്‍ഗ്രസിന് അവരുടെ ശക്തികേന്ദ്രങ്ങളില്‍ കാര്യമായ വോട്ടുചോര്‍ച്ചയാണ് ഉണ്ടായിട്ടുള്ളത്. ഇത് തടഞ്ഞുനിര്‍ത്താനുള്ള സംഘനാസംവിധാനം കോണ്‍ഗ്രസിനില്ല. തിരഞ്ഞെടുപ്പ് ഘട്ടത്തിലും കോണ്‍ഗ്രസ് നേതാക്കള്‍ തമ്മിലുള്ള അഭിപ്രായ ഭിന്നതയും തിരച്ചടിയായെന്നും ലീഗ് വിലയിരുത്തുന്നു. തിരഞ്ഞെടുപ്പ് അവലോകനത്തിനായി തിരുവനന്തപുരത്ത് മുസ്ലിംലീഗ് നേതാക്കള്‍ യോഗം ചേര്‍ന്ന്കൊണ്ടിരിക്കുകയാണ്. പി.കെ.കുഞ്ഞാലിക്കുട്ടി, ഇ.ടി.മുഹമ്മദ് ബഷീര്‍, എം.കെ.മുനീര്‍, പി.വി.അബ്ദുള്‍ വഹാബ് തുടങ്ങിയ നേതാക്കള്‍ യോഗത്തില്‍ പങ്കെടുക്കുന്നുണ്ട്.