കോണ്‍ഗ്രസില്‍ വെട്ടിനിരത്തല്‍; മൂന്നു ജില്ലാ കമ്മിറ്റികള്‍ക്കെതിരെ നടപടി; കെ.പി.സി.സിയില്‍ അഴിച്ചു പണിയില്ല; ഹൈക്കമാന്‍ഡിന്റെ തിരുത്തലുകള്‍ ഇങ്ങനെ; മുസ്ലിംലീഗിന്റെ നേതൃത്വമാറ്റമെന്ന ആവശ്യം മുഖ്യമന്ത്രി ചര്‍ച്ചയാക്കിയത് മുല്ലപ്പള്ളിക്ക് ഗുണമായി
കോണ്‍ഗ്രസിനുള്ളില്‍ വെട്ടിത്തിരുത്തല്‍ വരുത്താന്‍ ഹൈക്കമാന്‍ഡ് നടപടി തുടങ്ങി. തദ്ദേശ തിരഞ്ഞെടുപ്പിലെ തോല്‍വിയുടെ ഉത്തരവാദിത്വം കെ.പി.സിസിക്കും ഡി.സി.സിക്കുമുണ്ടെങ്കിലും തിരുന്നത് ഡി.സി.സികളെ മാത്രമാണ്. പരസ്യപ്രസ്താവനകള്‍ വിലക്കിയതിന് പിന്നാലെ, കനത്ത പരാജയം നേരിട്ട കോണ്‍ഗ്രസ് ജില്ലാകമ്മിറ്റികള്‍ക്കെതിരെയും നടപടി വന്നേക്കും.
അതേസമയം, നേതൃമാറ്റം വേണമെന്ന മുസ്ലിം ലീഗ് അടക്കമുള്ള ഘടകകക്ഷികളുടെ ആവശ്യം, ഇടതുപക്ഷം ആയുധമാക്കിയതോടെ കോണ്‍ഗ്രസ് പ്രതിരോധത്തിലായി. എന്നാല്‍ മുല്ലപ്പള്ളിയെ കെപിസിസി പ്രസിഡന്റ് സ്ഥാനത്ത് നിന്ന് ഇനി മാറ്റിയാല്‍ അത് മുസ്ലിം ലീഗ് പറഞ്ഞിട്ടാണന്നും വരും. അതേസമയം തന്നെ വര്‍ഗീയ പാര്‍ട്ടിയുമായി കൂട്ട് വേണ്ടെന്നു പറഞ്ഞതിന്റ പേരില്‍ മുല്ലപ്പള്ളിയെ നേതൃസ്ഥാനത്ത് നിന്ന് ഒഴിവാക്കിയെന്നു ഇടതുപക്ഷം പ്രചരിപ്പിക്കും. മാറ്റാതെ മുന്നോട്ടുപോയാല്‍ നിയമസഭ തിരഞ്ഞെടുപ്പ് അടുത്തിരിക്കെ പാര്‍ട്ടിയിലും മുന്നണിയിലും അതൃപ്തി അതേപടി നിലനില്‍ക്കുമെന്ന ആശങ്കയുമുണ്ട്.
മുസ്ലിം ലീഗാണ് കോണ്‍ഗ്രസിന്റ കാര്യങ്ങള്‍ തീരുമാനിക്കുന്നതെന്ന മുഖ്യമന്തി പിണറായി വിജയന്റെ സമൂഹമാധ്യമത്തിലെ കുറിപ്പും ഇരുതലമൂര്‍ച്ചയുള്ള വാള്‍പോലെയായി. നേതൃമാറ്റം വേണമെന്ന് പാര്‍ട്ടിയിലെ ചില നേതാക്കള്‍ നേരിട്ടും മുസ്ലിം ലീഗ് അടക്കമുള്ള ഘടകകക്ഷികള്‍ പരോക്ഷമായും ആവശ്യപ്പെട്ടിരുന്നു.
കേരളത്തിന്റ ചുമതലയുള്ള താരിഖ് അന്‍വര്‍ 27ന് സംസ്ഥാനത്തെത്തി നേതാക്കളുമായി ചര്‍ച്ച നടത്തിയശേഷം നടപടികളില്‍ തീരുമാനിക്കും. താരിഖ് അന്‍വര്‍ കൂടി പങ്കെടുക്കുന്ന രാഷ്ട്രീയ സമിതി യോഗം ചേരും. അന്ന് ഉച്ചക്ക് എംഎല്‍എമാര്‍ എംപിമാര്‍ ഡിസിപ്രസിഡന്റുമാര്‍ എന്നിവരുടെ യോഗത്തിലും താരിഖ് അന്‍വര്‍ പങ്കെടുക്കും. എഐസിസി ജനറല്‍ സെക്രട്ടറി ഹൈക്കമാന്‍ഡിന് നല്‍കുന്ന റിപ്പോര്‍ട്ട് കൂടി പരിശോധിച്ചാണ് സംഘടനാതലത്തിലും മറ്റും വരുത്തേണ്ട മാറ്റങ്ങള്‍ സംബന്ധിച്ച് നിര്‍ണ്ണായക തീരുമാനമെടുക്കുക.
നിലവിലെ സാഹചര്യമനുസരിച്ച് കെപിസിസി അധ്യക്ഷനോ യുഡിഎഫ് കണ്‍വീനര്‍ അടക്കമുള്ള നിര്‍ണ്ണായക സ്ഥാനങ്ങള്‍ക്കോ മാറ്റമൊന്നുമുണ്ടാവില്ല. ഡിസിസി തലത്തിലുള്ള അഴിച്ചു പണിയാണ് ഹൈക്കമാന്‍ഡിന്റെ പരിഗണനയിലുള്ളത്. തിരഞ്ഞെടുപ്പില്‍ കനത്ത തോല്‍വി നേരിട്ട ജില്ലകളില്‍ അധ്യക്ഷന്‍മാരെ മാറ്റുന്നത് പരിഗണനയിലുണ്ട്.
നേതൃമാറ്റമില്ലെങ്കിലും കനത്ത തോല്‍വിയുണ്ടായ ഡിസിസികള്‍ക്കെതിരെ നടപടി വരാനിടയുണ്ട്. തിരുവനന്തപുരം, കൊല്ലം, പാലക്കാട് എന്നിവയാണ് പട്ടികയിലുള്ളത്. മധ്യകേരളത്തില്‍ നഷ്ടപ്പെട്ട മതന്യൂനപക്ഷ വോട്ടുകള്‍ തിരികെ കിട്ടാന്‍ മുന്‍ മുഖ്യമന്ത്രി ഉമ്മന്‍ചാണ്ടിയെ നേതൃനിരയിലേക്ക് കൊണ്ടുവരണമെന്ന ആവശ്യവും ശക്തമാണ്.
സാമുദായിക സംഘടനകളുമായി ചര്‍ച്ച നടത്തി അവരുടെ വിശ്വാസം വീണ്ടെടുക്കാന്‍ കെ.മുരളീധരന്‍ എംപി അധ്യക്ഷനായ കമ്മിറ്റിയെ കെപിസിസി നിയോഗിച്ചു. കെ.സുധാകരന്‍, കെ.വി തോമസ്, കെ.സി ജോസഫ്, പി.സി.ചാക്കോ തുടങ്ങിയവരാണ് കമ്മിറ്റിയിലെ മറ്റ് അംഗങ്ങള്‍.
ഇതിനിടെ തദ്ദേശ തിരഞ്ഞെടുപ്പു പരാജയത്തെത്തുടര്‍ന്ന് കോണ്‍ഗ്രസില്‍ വീണ്ടും പോസ്റ്റര്‍ പ്രതിഷേധം. തൃശൂര്‍ നഗരത്തില്‍ കെ.മുരളീധരന്‍ എംപിയെ അനുകൂലിച്ച് രാവിലെ പോസ്റ്ററുകള്‍ പ്രത്യക്ഷപ്പെട്ടു. 'മുരളീധരനെ വിളിക്കൂ കോണ്‍ഗ്രസിനെ രക്ഷിക്കൂ' എന്നാണ് പോസ്റ്ററുകളില്‍ എഴുതിയിരിക്കുന്നത്. കെഎസ്യു-യൂത്ത് കോണ്‍ഗ്രസ് കമ്മിറ്റിയുടെ പേരിലാണ് പോസ്റ്ററുകള്‍.
https://www.facebook.com/Malayalivartha
