തമിഴ്‌നാട്ടിലെ പന്തല്ലൂരിലെ ജനങ്ങളെ ഭീതിയിലാഴ്ത്തിയ കൊലയാളി കൊമ്പന്‍ നിലമ്പൂരില്‍ എത്തിയതായി സൂചന. പന്തല്ലൂരില്‍ ഈ ആന അഞ്ചു പേരെയാണ് കൊലപ്പെടുത്തിയത്. ജനവാസ മേഖലകള്‍ തുടര്‍ച്ചയായി ആക്രമിച്ചതിനെ തുടര്‍ന്ന് തമിഴ്‌നാട് വനംവകുപ്പിന്റെ നേതൃത്വത്തില്‍ ഈ ആനയെ പിടികൂടാന്‍ ശ്രമം നടന്നിരുന്നു. ഇതോടെ ജനവാസമേഖലയില്‍ നിന്നും കാട്ടിലേക്ക് കടന്ന ആന ഇപ്പോള്‍ കേരളത്തില്‍ എത്തിയിരിക്കുകയാണ്. നിലമ്പൂരിലെ മുണ്ടേരി ഭാഗത്താണ് ഇപ്പോള്‍ ആനയുള്ളതെന്നാണ് സംശയം.

തമിഴ്‌നാട്ടില്‍ ആനയെ പിടികൂടാനുള്ള ശ്രമത്തിനിടെ മയക്കുവെടി വച്ചെങ്കിലും വെടിയേറ്റ കൊമ്പന്‍ ഉള്‍ക്കാട്ടിലേക്ക് ഓടിരക്ഷപ്പെടുകയായിരുന്നു. മയക്കുവെടിയേറ്റ് രക്ഷപ്പെട്ട കൊമ്പന്‍ ആക്രമണസ്വഭാവം കാണിക്കാനും മനുഷ്യഗന്ധം പിന്തുടര്‍ന്ന് എത്താനും സാധ്യതയുള്ളതിനാല്‍ ആദിവാസികള്‍ അടക്കമുള്ളവര്‍ക്ക് വനംവകുപ്പ് ജാഗ്രതാ നിര്‍ദേശം നല്‍കിയിട്ടുണ്ട്.

അപകടസാധ്യത കണക്കിലെടുത്ത് പ്രത്യേക എലിഫെന്റ് സ്‌ക്വാഡ് രൂപവത്കരിച്ച് വനത്തില്‍ പട്രോളിഗും ശക്തമാക്കിയിട്ടുണ്ട്. കഴിഞ്ഞ ദിവസം കുമ്പളപ്പാറ കോളനിയിലെ ആദിവാസികളില്‍ ചിലര്‍ ഈ ആനയെ കണ്ടതായി പറയുന്നു. കൊലയാളി ആനയുടെ സാന്നിധ്യം ആദിവാസികളെ ഭീതിയിലാക്കിയിട്ടുണ്ട്. നീലഗിരി ഡിഎഫ്ഒ, നിലമ്പൂര്‍ നോര്‍ത്ത് ഡിഎഫ്ഒയുമായി ബന്ധപ്പെട്ട് ആനയെ പിടികൂടുന്നതിന് സഹായം തേടിയിട്ടുണ്ട്. തമിഴ്‌നാടിന്റെ മയക്കുവെടി സംഘവും 4 താപ്പാനകളും 40 ജീവനക്കാരും സ്ഥലത്ത് ക്യാംപ് ചെയ്തിട്ടുണ്ട്.

ഒരു ഇടവേളയ്ക്ക് ശേഷം പന്തല്ലൂര്‍ താലൂക്കിന്റെ വിവിധ പ്രദേശങ്ങള്‍ വീണ്ടും കാട്ടാന ശല്യം. അതിര്‍ത്തി പ്രദേശങ്ങളായ അത്തിക്കുന്ന്, അത്തിമാനഗര്‍, റിച്ച് മൗണ്ട്, കാപ്പിക്കാട്, പുളിയം വയല്‍ പ്രദേശങ്ങളില്‍ കാട്ടാനകള്‍ കൂട്ടമായെത്തുകയാണ്. സന്ധ്യ മയങ്ങിയാല്‍ കാട്ടാനകള്‍ ഗ്രാമത്തിലേക്ക് ഇറങ്ങുന്നതിനാല്‍ പ്രദേശത്തുകാര്‍ നേരത്തെ വീടിനകത്ത് കയറണം. പിന്നീട് പുറത്തിറങ്ങണമെങ്കില്‍ നേരം വെളുക്കണം.

കൊളപ്പള്ളിയിലും, കണ്ണന്‍ വയലിലും മൂന്ന് പേരുടെ മരണത്തിനിടയാക്കിയ കൊലയാളിയായ കാട്ടുകൊമ്പനെ കണ്ടെത്താനുള്ള തീവ്ര പരിശ്രമത്തിലാണ് വനപാലകര്‍. ഈ കാട്ടാന നിലമ്പൂര്‍ ഉള്‍വനത്തിലേക്കു കടന്നതായി ഹെലിക്യാം ദൃശ്യങ്ങള്‍ വ്യക്തമാക്കുന്നുണ്ട്. കാട്ടാനയെ പിടികൂടാനുള്ള ദൗത്യ സംഘം ചപ്പുതോട്, കൊളപ്പള്ളി ഭാഗങ്ങളില്‍ കേന്ദ്രീകരിച്ചതോടെ മറ്റ് ഇടങ്ങളില്‍ കാട്ടാനയിറങ്ങുന്നതു ശ്രദ്ധിക്കാനും കഴിയുന്നില്ല.

നിലമ്പൂര്‍ മുതുമല വനങ്ങളില്‍ നിന്നാണു കാട്ടാനകള്‍ കൂട്ടത്തോടെ ഗ്രാമങ്ങളിലിറങ്ങുന്നത്. കൃഷിയിടങ്ങള്‍ നശിപ്പിച്ച് നേരം പുലരുമ്പോള്‍ കാട്ടില്‍ കയറും. നാടുകാണി മുതല്‍ ചേരമ്പാടി വരെയുള്ള സംസ്ഥാന പാതയില്‍ രാത്രി ആയാല്‍ കാട്ടാന ഇറങ്ങുന്നത് പതിവാണ്. ഇരു ചക്രവാഹനങ്ങളില്‍ സഞ്ചരിക്കുന്നവര്‍ ഇതു വഴി രാത്രി വൈകിയുള്ള സഞ്ചാരം ഒഴിവാക്കണം. കാട്ടാനയിറങ്ങുന്ന പ്രദേശങ്ങളിലുള്ളവര്‍ അതീവ ജാഗ്രത പുലര്‍ത്തണമെന്ന് വനപാലകര്‍ അറിയിച്ചു.