'ഒരു രാജ്യം, ഒരു തെരഞ്ഞെടുപ്പ്'; മോദിയുടെ ആഹ്വാനം ഏറ്റെടുത്ത് തിരഞ്ഞെടുപ്പ് കമ്മീഷന്; ഒരു ഒറ്റ തെരഞ്ഞെടുപ്പിന് തയ്യാറെന്ന് മുഖ്യ തെരഞ്ഞെടുപ്പ് കമ്മീഷണര് സുനില് അറോറ; ഇനി വേണ്ട നിയമ ഭേദഗതികള് ഇവയാണ്; ബി.ജെ.പിയുടെ രാഷ്ട്രീയ നിലപാട്
'ഒരു രാജ്യം, ഒരു തെരഞ്ഞെടുപ്പ്' എന്ന് പ്രധാനമന്ത്രി നരേന്ദ്രമോദിയുടെ ആഹ്വാനം ഫലം കാണുകയാണ്. കേന്ദ്ര തെരഞ്ഞെടുപ്പ് കമ്മീഷന് അവരുടെ നിലപാട് വ്യക്തമാക്കിയതോടെ രാജ്യം ഒരു ഒറ്റ തെരഞ്ഞെടുപ്പിലേക്ക് നീങ്ങുമെന്ന സൂചനകള് നല്കുകയാണ്. 'ഒരു രാജ്യം ഒരു തെരഞ്ഞെടുപ്പ്' നടത്താന് തയ്യാറാണെന്ന് മുഖ്യ തെരഞ്ഞെടുപ്പ് കമ്മീഷണര് സുനില് അറോറ വ്യക്തമാക്കിയിരിക്കുകയാണ്. പുതിയ സംവിധാനം ഏര്പ്പെടുത്താന് തിരഞ്ഞെടുപ്പ് കമ്മീഷന് എല്ലാവിധത്തിലും തയ്യാറാണെന്ന് മുഖ്യ തെരഞ്ഞെടുപ്പ് കമ്മീഷണര് പറഞ്ഞു.
ഇതിന് വേണ്ട എല്ലാതരത്തിലുള്ള നിയമ ഭേദഗതികള് വരുത്തിയാല് ഒരു രാജ്യം ഒരു തെരഞ്ഞെടുപ്പ് നടപ്പിലാക്കാന് തെരഞ്ഞെടുപ്പ് കമ്മീഷന് ഒരുക്കമാണ് സുനില് അറോറ പറയുന്നു. നവംബര് മാസത്തിലാണ് ഒരു ഇന്ത്യ, ഒരു തെരഞ്ഞെടുപ്പ് എന്ന ആശയം നടപ്പിലാക്കണം എന്ന കാര്യം പ്രധാനമന്ത്രി മുന്നോട്ട് വച്ചത്. വിവിധ തെരഞ്ഞെടുപ്പുകള് വിവിധ കാലങ്ങളില് നടക്കുന്നത് രാജ്യത്തെ വികസന പ്രവര്ത്തനങ്ങളെ ബാധിക്കുന്നു എന്ന കാര്യമാണ് പ്രധാനമന്ത്രി ചൂണ്ടിക്കാട്ടിയത്. അതിനാല് തന്നെ ഒരു രാജ്യം, ഒരു തെരഞ്ഞെടുപ്പ് എന്ന ആശയത്തില് കാര്യമായ പഠനം ആവശ്യമാണ് എന്നാണ് പ്രധാനമന്ത്രി നരേന്ദ്ര മോദി മുന്നോട്ട് വച്ച പ്രസ്താവന.
ഒരു രാജ്യം ഒരു തെരഞ്ഞെടുപ്പ് എന്നത് വെറുമൊരു സംവാദ വിഷയം മാത്രമല്ല, ഇത് രാജ്യത്തിന് ആവശ്യമാണ്. ഏതാനും മാസങ്ങള് കൂടുമ്പോള് രാജ്യത്ത് വിവിധ ഇടങ്ങളില് തെരഞ്ഞെടുപ്പുകള് നടക്കുന്നു. ഇത് വികസന പ്രവര്ത്തനങ്ങള്ക്കുണ്ടാക്കുന്ന തടസ്സങ്ങള് എല്ലാവര്ക്കും അറിയാവുന്നതാണ്. ഈ പ്രശ്നം പഠനവിധേയമാക്കുകയും തെരഞ്ഞെടുപ്പ് ഉദ്യോഗസ്ഥര് ഇക്കാര്യത്തില് മാര്ഗനിര്ദേശങ്ങള് നല്കുകയുമാണ് വേണ്ടതെന്ന് പ്രധാനമന്ത്രി നരേന്ദ്ര മോദി പറഞ്ഞു.
ഭരണഘടനയെക്കുറിച്ച് അവബോധം സൃഷ്ടിക്കുന്നതിന് നൂതനമായ നടപടികള് കൈക്കൊള്ളണമെന്നും പ്രധാനമന്ത്രി പ്രിസൈഡിംഗ് ഉദ്യോഗസ്ഥരോട് ആവശ്യപ്പെട്ടു. ലോക് സഭ, നിയമസഭ, പഞ്ചായത്ത് തെരഞ്ഞടുപ്പുകള്ക്കെല്ലാംകൂടി ഒരു വോട്ടര് പട്ടിക മതിയാകും. വെവ്വേറെ പട്ടിക തയ്യാറാക്കുന്നത് അനാവശ്യ ചെലവാണുണ്ടാക്കുന്നതെന്നും മോദി പറഞ്ഞു.
2014ല് പ്രധാനമന്ത്രിയായി അധികാരമേറ്റതുമുതല് ലോക് സഭയിലേക്കും സംസ്ഥാന അസംബ്ലികളിലേക്കും ഒരേസമയം തെരഞ്ഞെടുപ്പ് നടത്തുക എന്നതിന് അനുകൂലമായ നിലപാട് മോദി സ്വീകരിച്ചിരുന്നു. ചെലവുകള് കുറയ്ക്കുന്നതിന് പുറമേ സര്ക്കാരുകള്ക്ക് കൂടുതല് ക്ഷേമപ്രവര്ത്തനങ്ങള് നടപ്പാക്കാനുള്ള സമയം ലഭിക്കുമെന്നായിരുന്നു അദ്ദേഹത്തിന്റെ വാക്കുകള്.
പുതിയ സംവിധാനം നടപ്പിലാക്കുന്നതില് ഏറ്റവും ഉത്തരവാദിത്വപ്പെട്ട ഏജന്സി തെരഞ്ഞെടുപ്പ് കമ്മീഷന് ആണെന്നതിനാല് തെരഞ്ഞെടുപ്പ് കമ്മീഷന്റെ പ്രസ്താവന നിര്ണ്ണായകമാണ്. തെരഞ്ഞെടുപ്പുകള് ഒന്നിച്ച് നടത്തുക എന്നത് പുതിയ ആശയമല്ല പലപ്പോഴും ചര്ച്ചയില് വന്നിട്ടുള്ള കാര്യമാണ്. 2015ല് ഇഎം സുദര്ശന് നാച്ചിയപ്പന് നേതൃത്വം നല്കിയ പാര്ലമെന്റ് കമ്മിറ്റി ഇത്തരത്തിലുള്ള ഒരു നിര്ദേശം സര്ക്കാറിന് സമര്പ്പിച്ചിരുന്നു. 2018ലെ ലോ കമ്മീഷന് റിപ്പോര്ട്ടും ഒരു രാജ്യം ഒരു തിരഞ്ഞെടുപ്പ് രാജ്യത്ത് നടപ്പിലാക്കാന് നിര്ദേശിച്ചിരുന്നു.
എന്നാല് പ്രതിപക്ഷ കക്ഷികള് ഇതിനെതിരാണ്. കോണ്ഗ്രസ് അടക്കമുള്ള പ്രതിപക്ഷ പാര്ട്ടികള് ഇത് പ്രയോഗികമായ ഒരു ആശയമല്ല എന്ന നിലപാടാണ് എടുത്തിട്ടുള്ളത്. അതേ സമയം പ്രധാനമന്ത്രി ഈ ആശയം മുന്നോട്ട് വയ്ക്കുകയും തെരഞ്ഞെടുപ്പ് കമ്മീഷന് അതിന് അനുകൂലമായി പ്രതികരിക്കുകയും ചെയ്തതോടെ ഒരു രാജ്യം ഒരു തെരഞ്ഞെടുപ്പ് സമീപ ദിവസങ്ങളില് സജീവ രാഷ്ട്രീയ ചര്ച്ചയായി മാറിയേക്കാം.
അതെ സമയം തന്നെ ഒറ്റ തെരഞ്ഞെടുപ്പിനു വഴിയൊരുക്കാന് നിലവിലുള്ള പാര്ലമെന്റിന്റെയോ നിയമസഭകളുടെയോ കാലാവധി വെട്ടിച്ചുരുക്കുകയോ നീട്ടുകയോ വേണം. ഇതിനായി താഴെപ്പറയുന്ന ഭരണഘടനാവകുപ്പുകളും നിയമങ്ങളും ഭേദഗതി ചെയ്യണം. ഇത് രാജ്യത്തിന്റെ ഫെഡറല് സ്വഭാവം അട്ടിമറിക്കാനും പരമാവധി അധികാരം കേന്ദ്രസര്ക്കാരില് ഉറപ്പിക്കാനുമുള്ള ബിജെപി പദ്ധതിയാണ് പ്രധാനമന്ത്രിയുടെ പ്രഖ്യാപനത്തിന് പിന്നിലെന്നാണ് പ്രതിപക്ഷ കക്ഷികള് ആരോപിക്കുന്നത്.
പാര്ലമെന്റിന്റെ കാലാവധി വ്യവസ്ഥ ചെയ്യുന്ന ഭരണഘടനയുടെ 83-ാം വകുപ്പ്, ലോക്സഭ പിരിച്ചുവിടാനുള്ള വ്യവസ്ഥകളുള്ള 85-ാം വകുപ്പ്, നിയമസഭകളുടെ കാലാവധി സംബന്ധിച്ചുള്ള 172-ാം വകുപ്പ്, നിയമസഭകളെ പിരിച്ചുവിടാനുള്ള 174-ാം വകുപ്പ്, സംസ്ഥാനങ്ങളില് രാഷ്ട്രപതി ഭരണം ഏര്പ്പെടുത്താനുള്ള 356-ാം വകുപ്പ്, തെരഞ്ഞെടുപ്പ് കമ്മീഷന്റെ അധികാരങ്ങള് സംബന്ധിച്ച 324-ാം വകുപ്പ്, ജനപ്രാതിനിധ്യനിയമം(1951) എന്നി നിയമങ്ങളില് ഭേദഗതി വരുത്തി.ാല് മാത്രമേ ഒു രാജ്യം ഒരു തെരഞ്ഞെടുപ്പ് നടപ്പിലാക്കാന് സാധിക്കുകയുള്ളു. ക്രമസമാധാനപാലനം മുന്നിര്ത്തി നിലവില് രണ്ട് മാസമായാണ് പൊതുതെരഞ്ഞെടുപ്പ് നടക്കുന്നത്. ഒരേസമയം തെരഞ്ഞെടുപ്പിന് സുരക്ഷയൊരുക്കല് കൂടുതല് ശ്രമകരമാകും എന്നിങ്ങനെയുള്ള വെല്ലുവിളിയും കേന്ദ്ര സര്ക്കാരിന് മുന്നിലുണ്ട്. ലോക്സഭയിലും രാജ്യസഭയിലും ഭൂരിപക്ഷമുള്ളതിനാല് നിയമങ്ങള് ഭേദഗതി ചെയ്യുന്നത് സര്ക്കാരിനെ സംബന്ധിച്ച് അത്ര വലിയ വെല്ലുവിളിയല്ല.
https://www.facebook.com/Malayalivartha