ഫാദർ തോമസ് കോട്ടൂരും സിസ്റ്റർ സെഫിയും കുറ്റക്കാർ, 28 വർഷത്തിന് ശേഷം ഞെട്ടിച്ച് കോടതി... ലോക്കൽ പോലീസ് തേച്ച്മായ്ച്ച കേസ് കൊലപാതകമാണെന്ന് പുറംലോകം അറിഞ്ഞത് അജ്ഞാത ശക്തികളുടെ കരങ്ങളാൽ... കാത്തിരുന്ന വിധിയിൽ ആ മൂന്ന് ആത്മാക്കൾ സന്തോഷിക്കുന്നുമെന്ന് അഭയയുടെ കുടുംബം...
സിസ്റ്റര് അഭയക്കേസില് പ്രതികൾ കുറ്റക്കാർ. ഫാ. തോമസ് എം. കോട്ടൂരും സിസ്റ്റര് സെഫിയുമാണ് പ്രതികൾ. തിരുവനന്തപുരം സി.ബി.ഐ. പ്രത്യേക കോടതിയാണ് 28 വര്ഷത്തിന് ശേഷം കേസില് വിധി പ്രസ്താവിച്ചത്. അഭയ കൊലക്കേസില് ഒരു വര്ഷത്തിലേറെ നീണ്ട വിചാരണ ഡിസംബര് 10-നാണ് പൂര്ത്തിയായത്. പ്രത്യേക സി.ബി.ഐ. കോടതി ജഡ്ജി കെ. സനില്കുമാറാണ് കേസിൽവിധി പറഞ്ഞത്. സി.ബി.ഐക്കുവേണ്ടി പബ്ളിക് പ്രോസിക്യൂട്ടര് എം. നവാസ് ഹാജരായി.
ക്നാനായ കത്തോലിക്കാ സഭയുടെ കീഴിലുള്ള സെന്റ് ജോസഫ് കോണ്ഗ്രിഗേഷനിലെ കന്യാസ്ത്രീയായിരുന്ന സിസ്റ്റര് അഭയ (21) കോട്ടയം ബി. സി. എം കോളേജിലെ രണ്ടാം വര്ഷ പ്രീഡിഗ്രി വിദ്യാര്ത്ഥിനിയായിരുന്നു.
1992 മാര്ച്ച് 27 നാണ് കോട്ടയം പയസ് ടെന്ത് കോണ്വെന്റിലെ കിണറ്റില് ദുരൂഹ സാഹചര്യത്തില് സിസ്റ്റര് അഭയയുടെ മൃതദേഹം കാണപ്പെട്ടത്. ആദ്യം അന്വേഷണം നടത്തിയ ലോക്കല് പൊലീസ് ആത്മഹത്യയെന്ന് ചൂണ്ടിക്കാട്ടി കേസന്വേഷണം അവസാനിപ്പിച്ചിരുന്നു. കോട്ടയം ജില്ലയിലെ അരീക്കരയില് അയിക്കരകുന്നേല് തോമസിന്റെയും ലീലാമ്മയുടെയും ഏക മകളായിരുന്നു അഭയ.
കോട്ടയം കാത്തലിക് ബിഷപ്പ് ഹൗസിലെ ചാൻസലറും കോട്ടയം ബി സി എം കോളേജിലെ സൈക്കോളജി വിഭാഗം ലെക്ചററും സെൻ്റ് ജോർജ് പള്ളി വികാരിയുമായ കിടങ്ങൂർ കോട്ടൂർ ഭവനിൽ ഫാദർ തോമസ് കോട്ടൂർ , കോട്ടയം കുരുമുള്ളൂർ കങ്ങരത്ത്മൂതി ഹൗസിൽ നിന്നും പയസ് ടെൻത് കോൺവെൻ്റ് അന്തേവാസിയും സേക്രഡ് ഹാർട്ട് മൗണ്ട് സെൻ്റ്.ജോസഫ് ജെനറലൈറ്റ് സിസ്റ്റർ സ്റ്റെഫിയും അസാന്മാർഗിക സ്വഭാവങ്ങളുള്ളവരായിരുന്നുവെന്നും ഇവർ തമ്മിൽ അവിശുദ്ധ ബന്ധമുണ്ടായിരുന്നെന്നും സിസ്റ്റർ സ്റ്റെഫിയുമായി ലൈംഗിക ബന്ധത്തിലേർപ്പെടണമെന്ന ഉദ്ദേശ്യത്തോടെ ഒന്നാം പ്രതി 1992 മാർച്ച് 26 ന് അർദ്ധരാത്രി കോൺവെൻ്റ് മതിൽ ചാടി കടക്കുകയും മoത്തിനുള്ളിൽ കുറ്റകരമായി പ്രവേശിച്ച് ആ രാത്രി മുഴുവൻ അവിടെ തങ്ങുകയും ചെയ്തു.
27 ന് വെളുപ്പിന് 4.15 മണിയോടെ പരീക്ഷക്ക് പഠിക്കാനായി മുഖം കഴുകി ഫ്രിഡ്ജിൽ നിന്ന് വെള്ളമെടുക്കാനെത്തിയ സിസ്റ്റർ അഭയ കോൺവെൻ്റ് സെല്ലാറിൽ ഇരുവരും ലൈംഗിക ബന്ധത്തിൽ ഏർപ്പെട്ട നിലയിൽ കാണുകയും ചെയ്തു. സംഭവം പുറം ലോകമറിയുമെന്ന ഭയത്താൽ ഒന്നും രണ്ടും പ്രതികൾ അഭയയെ കൊലപ്പെടുത്തണമെന്ന പൊതു ഉദ്ദേശ്യ കാര്യസാധ്യത്തിനായി ആലോചിച്ചുറച്ച് വെളുപ്പിന് 4.15 മണിക്കും 5 മണിക്കും ഇടക്കുള്ള സമയം അപകടകരമായ കോടാലി കൊണ്ട് അഭയയുടെ പുറം തലയിൽ അടിക്കുകയും അടിയുടെ ആഘാതത്തിൽ അഭയ ബോധരഹിതയായി വീണു. മരണം ഉറപ്പാക്കുന്നതിനും കുറ്റക്കാരായ ഒന്നും രണ്ടും പ്രതികളെ നിയമപരമായ ശിക്ഷയിൽ നിന്ന് മറയ്ക്കാനും കൊലപാതകം ആത്മഹത്യയാക്കി മാറ്റാൻ അഭയയുടെ ശരീരം വലിച്ചിഴച്ച് കോംപൗണ്ടിൻ്റെ പുറകുവശത്തുള്ള കിണറ്റിൽ ഇട്ടുവെന്നുമാണ് കോടതി കുറ്റപത്രം.
സംഭവത്തിന് ശേഷം നീണ്ട വര്ഷങ്ങളുടെ നിയമപോരാട്ടത്തിനിടയില് അച്ഛന് തോമസും അമ്മ ലീലാമ്മയും നാലു വര്ഷം മുന്പ് മരിച്ചു. കേസ് അന്വേഷണം അട്ടിമറിച്ച് അഭയയുടെ മരണം ആത്മഹത്യയാക്കാനുള്ള ലോക്കല് പൊലീസിന്റെ ശ്രമത്തിനെതിരെ 1992 മാര്ച്ച് 31ന് കോട്ടയം മുനിസിപ്പല് ചെയര്മാന് പി. സി. ചെറിയാന് മടുക്കാനി പ്രസിഡന്റും, ജോമോന് പുത്തന്പുരയ്ക്കല് കണ്വീനറുമായി ആക്ഷന് കൗണ്സില് രൂപീകരിച്ചതിനെ തുടര്ന്ന് കേസന്വേഷണം ക്രൈംബ്രാഞ്ചിന് വിട്ടു.
1993 ജനുവരി 30 ന് കോട്ടയം ആര്. ഡി. ഒ കോടതിയില് ക്രൈംബ്രാഞ്ച് അന്വേഷണം അവസാനിപ്പിച്ചു കൊണ്ട് റിപ്പോര്ട്ട് നല്കി. 1993 മാര്ച്ച് 29 ന് എറണാകുളം ചീഫ് ജുഡിഷ്യല് മജിസ്ട്രേറ്റ് കോടതിയില് സിബിഐ എഫ് ഐ ആര് രജിസ്റ്റര് ചെയ്തു. അഭയയുടെ മരണം ആത്മഹത്യയാണെന്നുള്ള ക്രൈംബ്രാഞ്ച് അന്വേഷണ റിപ്പോര്ട്ട് കൊച്ചി യൂണിറ്റ് ഡി വൈ എസ് പി വര്ഗീസ് പി തോമസിന്റെ നേതൃത്വത്തിലുള്ള സിബിഐ സംഘം തള്ളി. സിബിഐ സ്പെഷ്യല് ഡയറക്ടര് ആയിരുന്ന എം എല് ശര്മയുടെ നേത്യത്വത്തിലുള്ള സിബിഐ സംഘമാണ് അഭയക്കേസ് പിന്നീട് അന്വേഷിച്ചത്. തുടര്ന്ന് സിബിഐ സംഘം കോട്ടയത്ത് എത്തി പയസ് ടെന്ത്കോണ്വെന്റിലെ കിണറ്റില് ജയ്പൂരിലെ ഫോറന്സിക് വിദഗ്ധരുടെ സാന്നിധ്യത്തില് അഭയയുടെ ഡമ്മി പരീക്ഷണം നടത്തി.
അഭയയുടെ മരണം കൊലപാതകമാണെങ്കിലും പ്രതികളെ പിടിക്കുവാന് എത്ര ശ്രമിച്ചിട്ടും കഴിയുന്നില്ലന്ന് കാണിച്ചു കൊണ്ട് അന്വേഷണം അവസാനിപ്പിക്കുവാന് അനുമതി ചോദിച്ചു കൊണ്ട് സിബിഐ എറണാകുളം ചീഫ് ജുഡീഷ്യല് മജിസ്ട്രേറ്റ് കോടതിയില് 1996ലും 1999ലും 2005ലും റിപ്പോര്ട്ട് സമര്പ്പിച്ചിരുന്നു. എന്നാല് റിപ്പോര്ട്ട് തള്ളിക്കൊണ്ട് തുടരന്വേഷണത്തിന് ഈ സമയങ്ങളിലെല്ലാം കോടതി ഉത്തരവിടുകയായിരുന്നു.
പിന്നീട് ഫാ തോമസ് കോട്ടൂര്, ഫാ ജോസ് പൃതൃക്കയില്, സിസ്റ്റര് സെഫി എന്നിവരെ കുറ്റക്കാരെന്ന് കണ്ടെത്തി ബാംഗ്ലൂരില് നാര്കോ അനാലിസിസ് ടെസ്റ്റ് നടത്തി. സിബിഐ സംഘം ഇവരെ 2008 നവംബര് 18 ന് അറസ്റ്റ് ചെയ്തു. സംഭവം നടന്ന് 16 വര്ഷങ്ങള്ക്ക് ശേഷമാണ് മൂന്നു പ്രതികളെ അറസ്റ്റ് ചെയ്തത്. തുടര്ന്ന് പ്രതികള്ക്കെതിരെ 2009 ജൂലൈ 17 ന് സിബിഐ എറണാകുളം ചീഫ് ജുഡീഷ്യല് മജിസ്ട്രേറ്റ് കോടതിയില് കുറ്റപത്രം നല്കി.മൂന്നു പ്രതികളും വിചാരണ കൂടതെ കുറ്റവിമുക്തരാക്കണം എന്ന് ആവശ്യപ്പെട്ട് 2011 മാര്ച്ച് 16 ന് എറണാകുളം ചീഫ് ജുഡീഷ്യല് മജിസ്ട്രേറ്റ് കോടതിയില് പ്രതികള് വിടുതല് ഹര്ജി നല്കി.
ഫാ. ജോസ് പുതുക്കിയലിനെ കോടതി വെറുതെ വിട്ടു. ഒന്നാം പ്രതി ഫാ. തോമസ് കോട്ടൂരും, മൂന്നാം പ്രതി സെഫിയും വിചാരണ നേരിടണമെന്ന് കോടതി ഉത്തരവിട്ടു. സിബിഐയുടെ കുറ്റപത്രത്തില് 133 പ്രോസിക്യൂഷന് സാക്ഷികളാണ് ആകെയുള്ളത്. 28 വര്ഷം കാലപ്പഴക്കംചെന്ന കേസ് ആയതിനാല് പല സാക്ഷികളും മരിച്ചു പോയത് കൊണ്ട് പ്രോസിക്യൂഷന് 49 സാക്ഷികളെ കോടതിയില് വിസ്തരിക്കാന് കഴിഞ്ഞുള്ളു. പ്രതിഭാഗത്തിന് ഒരു സാക്ഷിയെ പോലും വിസ്തരിക്കുവാന് കഴിഞ്ഞില്ല. ഡിസംബര് 10 ന് കേസില് വാദം പൂര്ത്തിയാക്കിയിരുന്നു.
https://www.facebook.com/Malayalivartha