ബി.ജെ.പി കേന്ദ്രനേതൃത്വം വിവരങ്ങള്‍ തേടി; ലക്ഷ്യം വിഭാഗീയത ഒഴിവാക്കുക; വിദ്യഭ്യാസം, കുറഞ്ഞ പ്രായം, സാമുദായിക സന്തുലനം എന്നിവയ്ക്ക് മുന്‍ഗണന നല്‍കി അധ്യക്ഷ, ഉപാധ്യക്ഷ തിരഞ്ഞെടുപ്പു നടത്തമെന്ന് കേന്ദ്ര നിര്‍ദേശം
ബി.ജെ.പിയിലെ വിഭാഗീയത ഒഴിവാക്കാന്‍ കര്‍ശന നിലപാടുമായി കേന്ദ്ര നേതൃത്വം. പാര്‍ട്ടിക്ക് ഭരണം കിട്ടിയ തദ്ദേശ സ്ഥാപനങ്ങളില്‍ തമ്മിലടിയൊഴുവാക്കാനാണ് നടപടി. പാര്‍ട്ടി ഭൂരിപക്ഷം നേടിയ തദ്ദേശസ്ഥാപനങ്ങളില്‍ അധ്യക്ഷ, ഉപാധ്യക്ഷ സ്ഥാനത്തേക്ക് തിരഞ്ഞെടുക്കുന്നവരുടെ ഔദ്യോഗിക, വ്യക്തി വിവരങ്ങള്‍ ആവശ്യപ്പെട്ടിരിക്കുകയാണ് ബിജെപി കേന്ദ്രനേതൃത്വം. മറ്റുള്ളവരുടെ സഹായത്തോടെ പാര്‍ട്ടി ഭരണത്തിലേറുന്ന സ്ഥാപനങ്ങളുടെ പട്ടികയും നല്‍കണം.
ഇതിലൂടെ നിയമനങ്ങളില്‍ മാനദണ്ഡം ഉറപ്പുവരുത്താനും വിഭാഗീയ പ്രശ്‌നങ്ങള്‍ ഒഴിവാക്കാനും വേണ്ടിയാണ് ഈ നടപടി. അധ്യക്ഷന്മാരുടെ തിരഞ്ഞെടുപ്പില്‍ ഇരുമുന്നണികളെയും പിന്തുണയ്‌ക്കേണ്ടെന്നാണ് സംഘടനാ തീരുമാനമെങ്കിലും ഏതെങ്കിലും പ്രധാന സ്ഥാനം ലഭിക്കുന്ന പക്ഷം നിലപാടില്‍ വിട്ടുവീഴ്ചയാകാമെന്നാണ് കീഴ്ഘടകങ്ങള്‍ക്കുള്ള നിര്‍ദേശം. പന്തളം, പാലക്കാട് നഗരസഭകള്‍ അടക്കം 30 തദ്ദേശസ്ഥാപനങ്ങളില്‍ എന്‍ഡിഎ ഇത്തവണ ഭൂരിപക്ഷം നേടി.
കേരളത്തില്‍ പാര്‍ട്ടി മുന്നേറ്റം നടത്തിയതായി ദേശീയഅധ്യക്ഷനും മറ്റു പ്രധാന നേതാക്കളും ട്വീറ്റ് ചെയ്തു. പിന്നാലെ, വിവിധ സ്ഥാനങ്ങളിലേക്കു തിരുമാനിച്ചവരുടെ വിവരങ്ങള്‍ കൈമാറാന്‍ ആവശ്യപ്പെട്ടത് സംസ്ഥാനനേതൃത്വത്തെ അമ്പരിപ്പിച്ചിട്ടുണ്ട്. വിദ്യഭ്യാസം, കുറഞ്ഞ പ്രായം, സാമുദായിക സന്തുലനം എന്നിവയ്ക്ക് മുന്‍ഗണന നല്‍കിവേണം അധ്യക്ഷ, ഉപാധ്യക്ഷ തിരഞ്ഞെടുപ്പെന്നാണു കേന്ദ്ര നിര്‍ദേശം. പ്രത്യേക സാഹചര്യങ്ങളില്‍ ഇളവ് ആകാമെങ്കിലും അത് നേതൃത്വത്തെയും അണികളെയും ബോധ്യപ്പെടുത്തണം.
സംസ്ഥാന നേതാക്കള്‍ തദ്ദേശ അംഗങ്ങളില്‍ നിന്ന് നേരിട്ട് അഭിപ്രായം തേടിയാണു സ്ഥാനങ്ങളിലേക്കുള്ള പരിഗണനാപട്ടിക തയാറാക്കിയത്. ആര്‍എസ്എസ് നിര്‍ദ്ദേശവും പരിഗണിച്ചശേഷം പട്ടിക പാര്‍ട്ടി സംസ്ഥാന പ്രസിഡന്റിന് നല്‍കി പദവിയിലേക്കു തിരഞ്ഞെടുക്കപ്പെട്ടവരുടെ പേരുകള്‍ അടക്കം ചെയ്ത കവര്‍ പ്രത്യേക ദൂതന്‍ മുഖേന ജില്ലാകമ്മിറ്റികളിലെത്തിക്കും.
ആര്‍എസ്എസ് നേതൃത്വത്തിന്റെ സാന്നിധ്യത്തിലായിരിക്കും നഗരസഭകളുടെ അധ്യക്ഷ, ഉപാധ്യക്ഷ സ്ഥാനത്തേക്കുള്ളവരുടെ പേരുകള്‍ പുറത്തുവിടുക. പാലക്കാട് നഗരസഭാ ഭരണനേതൃത്വത്തിലേക്കു തയാറാക്കിയ പട്ടികയ്ക്കു നീളം കൂടിയെന്ന വിലയിരുത്തലിനെ തുടര്‍ന്ന് ബിജെപി സംസ്ഥാന സംഘടനാസെക്രട്ടറി വീണ്ടും സ്ഥലത്തെത്തി പട്ടിക തയാറാക്കി.
തദ്ദേശ തിരഞ്ഞെടുപ്പില്‍ ഗ്രൂപ്പ് കളിച്ചത് ബി.ജെ.പിക്ക് പ്രതീക്ഷിച്ച വിജയം ലഭിച്ചില്ലെന്നാണ് വിലയിരുത്തുന്നത്. പാര്‍ട്ടിയുമായി ശോഭാ സുരേന്ദ്രന്‍ ഇപ്പോഴും ഉടക്കി നില്‍ക്കുകയാണ്. തദ്ദേശ തിരഞ്ഞെടുപ്പ് പ്രചാരണങ്ങളില്‍ ശോഭാ സുരേന്ദ്രന്‍ പങ്കെടുത്തിയിരുന്നില്ല. തൃശ്ശൂരില്‍ പാര്‍ട്ടി സ്ഥാനിര്‍ഥിയെ തോല്‍പ്പിക്കാന്‍ ശ്രമിച്ചു എന്നതിന്റെ പേരില്‍ ഒന്‍പത് പേരെയാണ് പാര്‍ട്ടിയില്‍ നിന്നും പുറത്താക്കിയത്. കെ. സുരേന്ദ്രന്റെ നേതൃത്വത്തിനെതിരെയും വിമര്‍ശനം ഉയര്‍ന്നിയിരുന്നു. ഈ സാഹചര്യങ്ങള്‍ എല്ലാം പരിഗണിച്ചാണ് കേന്ദ്ര നേതൃത്വത്തിന്റെ ഇടപെടല്‍.
https://www.facebook.com/Malayalivartha
