സൗരവ് ഗാംഗുലി ബി.ജെ.പിലേക്ക്; ഗവര്ണറെ സന്ദര്ശിച്ചതിന് പിന്നിലെ രാഷ്ട്രീയം; ഓഫര് മുഖ്യമന്ത്രി സ്ഥാനം വരെ; ബി.ജെ.പിലേക്ക് എന്ന വാര്ത്തകള്ക്ക് വര്ഷങ്ങളുടെ പഴക്കം; ഗാംഗുലി മാറി ചിന്തിച്ചാല് ബംഗാളില് ദിദി -ദാദ പോരാട്ടം
ഗാംഗുലി ബി.ജെ.പിലേക്കെന്ന അഭ്യൂഹങ്ങള്ക്ക് വര്ഷങ്ങളുടെ പഴക്കമുണ്ട്. ബി.ജെ.പി നേതാക്കളുമായി ഗാംഗുലി എപ്പോഴെല്ലാം കൂടിക്കാഴ്ച്ച നടത്തിട്ടുണ്ടോ അപ്പോഴെല്ലാം ഈ വാര്ത്തയും ഉയര്ന്നുവരും. ബി.ജെ.പി ഗാംഗുലിയെ തങ്ങളുടെ പാര്ട്ടിയിലേക്ക് സ്വാഗതം ചെയ്തിട്ട് നാള് ഏറെയായി. എന്നാല് ദാദ ഇതുവരെ കൈകൊടുത്തില്ലെന്ന് മാത്രം. കഴിഞ്ഞ ബംഗാല് നിയമസഭാ തിരഞ്ഞെടുപ്പില് ഗാംഗുലിയെ ഇറക്കി ഒരു ദാദ-ദിദി പോരാട്ടം നടത്താന് ബി.ജെ.പി ശ്രമിച്ചിരുന്നുവെങ്കിലും അതും വിജയം കണ്ടില്ല.
എന്നാല് ഇപ്പോള് പശ്ചിമബംഗാളിലെ സാഹചര്യങ്ങല് ആകെ മാറിയിരിക്കുകയാണ്. തൃണമൂല് കോണ്ഗ്രസില് നിന്നു പോലും ബി.ജെ.പിലേക്്ക നേതാക്കള് ഒഴുകിയെത്തുകയാണ്. കഴിഞ്ഞ ലോക്സഭാ തിരഞ്ഞെടുപ്പില് ബി.ജെ.പി പശ്ചിമബംഗാളില് നിന്നും മികച്ച വിജയം നേടി. മേയില് നടക്കാനിരിക്കുന്ന നിയമസഭാ തിരഞ്ഞെടുപ്പില് മമതയുടെ കൈയില് നിന്നും അധികാരം പിടിച്ചെടുക്കാന് സാക്ഷാന് അമിത്ഷാ തന്നെ രംഗത്തുണ്ട്. ഈ ഒരു സാഹചര്യത്തില് ദാദയുടെ നിലാപാട് മാറിയേക്കുമെന്നു തന്നെയാണ് ഇപ്പോള് പുറത്ത് വരുന്ന വാര്ത്തകള് പരിശോധിക്കുമ്പോള് മനസിലാക്കാന് സാധിക്കുന്നത്.
ബിസിസിഐ അധ്യക്ഷനും മുന് ഇന്ത്യന് ക്രിക്കറ്റ് ക്യാപ്റ്റനുമായ സൗരവ് ഗാംഗുലി പശ്ചിമ ബംഗാള് ഗവര്ണര് ജഗ്ദീപ് ധന്കറിനെ സന്ദര്ശിച്ചതോടെയാണ് അഭ്യൂഹങ്ങള് വീണ്ടും സജീവമാകുന്നത്. ബിസിസിഐ പ്രസിഡന്റിന്റെ രാജ്ഭവന് സന്ദര്ശനം 'ഉപചാരപൂര്വ്വമുള്ള ക്ഷണം' എന്നാണ് സൗരവ് ഗാംഗുലി വിശേഷിപ്പിച്ചത്. വ്യത്യസ്തമായ വിഷയങ്ങള് കൂടിക്കാഴ്ചയില് ചര്ച്ച ചെയ്തുവെന്ന് ഗവര്ണര് ധന്കര് അവകാശപ്പെട്ടു. അതേ സമയം മാധ്യമങ്ങളോട് പ്രതികരിക്കാന് ഗാംഗുലി തയ്യാറായില്ല.
'ഇന്ന് വൈകുന്നേരം ബിസിസിഐ അധ്യക്ഷന് സൗരവ് ഗാംഗുലിയുമായി വിവിധ വിഷയങ്ങളില് ആശയവിനിമയം നടത്തി. 1864-ല് സ്ഥാപിതമായ രാജ്യത്തെ ഏറ്റവും പഴയ ക്രിക്കറ്റ് മൈതാനമായ ഈഡന് ഗാര്ഡന് സന്ദര്ശിക്കാനുള്ള അദ്ദേഹത്തിന്റെ ക്ഷണം സ്വീകരിച്ചു', ഗാംഗുലിക്കൊപ്പമുള്ള ഫോട്ടോയോടൊപ്പം ഗവര്ണര് ട്വീറ്റ് ചെയ്തു.
തൃണമൂല് കോണ്ഗ്രസിനും മമത ബാനര്ജിക്കും കടുത്ത വെല്ലുവിളി ഉയര്ത്തി കൊണ്ടാണ് ബി.ജെ.പി ഇത്തവണ ബംഗാളില് നിയമസഭ തിരെഞ്ഞെടുപ്പില് മത്സരിക്കുക. അതിന്റെ മുന്നോടിയായി തൃണമൂല് നേതാക്കളെ തന്നെ സ്വന്തം പാളയത്തില് എത്തിക്കുന്നതില് ആഭ്യന്തര മന്ത്രി അമിത് ഷാ വിജയിക്കുകയും ചെയ്തു.
മുതിര്ന്ന നേതാവ് സുവേന്ദു അധികാരിക്ക് പുറമെ നിരവധി തൃണമൂല് എം.എല്.എമാര് ബി.ജെ.പിയില് ചേര്ന്നു. രണ്ട് ദിവസത്തെ സന്ദര്ശനത്തിന് ബംഗാളില് എത്തിയ അമിത് ഷാ ബംഗാളിനെ ഇളക്കി മറിച്ചാണ് മടങ്ങിയത്. തൃണമൂല് കോണ്ഗ്രസിന് പുറമെ സി.പി.എമ്മില് നിന്നും നേതാക്കള് ബി.ജെ. പിയിലേക്ക് ചേക്കേറുകയാണ്. എന്നാല് മറ്റ് പാര്ട്ടികളില് നിന്ന് നേതാക്കള് വ്യാപകമായി ബി.ജെ.പിയില് ചേക്കേറുന്നതിനെതിരെ നേതാക്കള് രംഗത്തു വന്നു.
ബി.ജെ.പി ബംഗാളില് മത്സരിക്കുന്നത് പ്രധാനമന്ത്രി നരേന്ദ്രമോദിയുടെ മുഖം ഉയര്ത്തികാട്ടിയാണ്. ശക്തമായൊരു സംസ്ഥാന നേതൃത്വം ബി.ജെ.പി ബംഗാളില് ഇല്ല. ഗാംഗുലി ബി.ജെ.പിലേക്ക് വരുകയാണെങ്കില് അദ്ദേഹത്തിന് മുഖ്യമന്ത്രി സ്ഥാനം പോലും നല്കാന് ബി.ജെ.പി തയ്യാറായേക്കുമെന്നാണ് സൂചന. പുതിയ സാഹചര്യങ്ങളുടെ അടിസ്ഥാനത്തില് ഈ ഓഫര് ഗാംഗുലിക്ക് സ്വീകരിക്കാതിരിക്കാന് സാധിക്കില്ലെന്നാണ് വിലയിരുത്തപ്പെടുന്നത്.
https://www.facebook.com/Malayalivartha