ടീച്ചർ കുട്ടികൾക്ക് ക്ലാസെടുത്തുകൊണ്ടിരിക്കെ അതാ മൊബൈൽ സ്‌ക്രീനീൽ ഒരു ദിനോസർ..! കൊച്ചു കുട്ടികൾ ഞെട്ടി നിൽക്കെ ടീച്ചർ തിരികെ എത്തി ചിരിച്ചു കാട്ടി. ആപ്പിളെന്നു പറയുമ്പോൾ . ആപ്പിൾ വരുന്നു! കൗ എന്നു പറയുമ്പോൾ പശു വരുന്നു... ഒടുവിൽ ദിനോസറെന്നു പറഞ്ഞപ്പോൾ അതാ വരുന്നു ഒരു ഉശിരൻ ദിനോസർ.

ഓൺലൈൻ ക്ലാസിന്റെ എല്ലാ സാങ്കേതിക വിദ്യയും പ്രയോഗിച്ച് യു.കെ.ജി കുട്ടികൾക്ക് ക്ലാസെടുത്തത് മൗണ്ട് കാർമ്മൽ ഹയർ സെക്കൻഡറി സ്‌കൂളിലെ അദ്ധ്യാപിക കഞ്ഞിക്കുഴി സ്വദേശിയായ റെജി ജോസ് ആണ്. കുഞ്ഞുകുട്ടികളെ നേരിൽ കാണാനാവാത്ത അമ്മയുടെ സങ്കടം മാറ്റാൻ വെർച്വൽ ക്ലാസ് അടിപൊളിയാക്കി വൈറലാക്കി മാറ്റാൻ വീഡിയോ നിർമ്മിച്ചു നൽകിയത് അമ്മയുടെ പൊന്നുമോൻ എം.കോം വിദ്യാർത്ഥിയായ എമിൽ ജോസുമാണ്.

കഞ്ഞിക്കുഴി മൗണ്ട് കാർമ്മൽ എൽ.പി സ്‌കൂളിലെ യു.കെ.ജി കുട്ടികളുടെ ഇംഗ്ലീഷ് ക്ലാസിൽ തിങ്കളാഴ്ച രാവിലെയാണ് രസകരമായ ദിനോസർ കഥ അരങ്ങേറിയത്. യു.കെ.ജി കുട്ടികളെ ഇംഗ്ലീഷ് അക്ഷരമാല പഠിപ്പിക്കുന്നതിനായാണ് റെജി ടീച്ചർ ചില നുറുങ്ങു വിദ്യകൾ പ്രയോഗിച്ചത്.

ഇംഗ്ലീഷ് അക്ഷരമാലയിലെ എ പറയുമ്പോൾ ആപ്പിൾ മുതൽ ഓരോ വസ്തുക്കളെ പരിചയപ്പെടുത്തുന്നതിനിടെയാണ് ദിനോസറും എത്തിയത്. ഭൂമി കുലുക്കി ദിനോസർ കടന്നു വരുന്ന കുലുക്കം! കുലുക്കത്തിനൊടുവിൽ ടീച്ചർ കുട്ടികളോട് പറയുന്നു ആരും പേടിക്കരുതേ... ഇപ്പോ ഡൈനോസർ എത്തുമെന്ന്.. പക്ഷേ, ഡൈനോസർ നേരിട്ട് വേദിയിൽ എത്തിയപ്പോൾ ടീച്ചർ തന്നെ പേടിച്ചോടി.!

കൊവിഡിനെ തുടർന്നു ക്ലാസുകൾ ഓൺലൈനായതോടെ കൊച്ചു കുട്ടികളെ പിടിച്ചിരുത്തുന്നതിനുള്ള ഭാഗങ്ങളാണ് ഇപ്പോൾ അദ്ധ്യാപകർ പുറത്തിറക്കുന്നത്. എൽ.കെ.ജി യു.കെ.ജി ക്ലാസുകളിലെ കുട്ടികൾ ഇതുവരെയും തങ്ങളുടെ അദ്ധ്യാപകരെ നേരിട്ട് കണ്ടിട്ടില്ല. ഫോണിലൂടെ മാത്രമാണ് ഭൂരിഭാഗം കുട്ടികൾക്കും അദ്ധ്യാപകരുമായി അടുപ്പം. ഈ സാഹചര്യത്തിലാണ് കുട്ടികളുടെ മാനസിക സംഘർഷം ലഘൂകരിക്കുക എന്ന ലക്ഷ്യത്തോടെ ഇത്തരം രസകരമായ ഗെയിമുകളുമായി അദ്ധ്യാപകർ രംഗത്ത് എത്തിയിരിക്കുന്നത്. ഇത്തരം കളികളും തമാശകളും കുട്ടികൾ ഏറെ ഇഷ്ടപ്പെടുന്നുണ്ടെന്നാണ് ഈ വീഡിയോകൾ വൈറലാകുന്നതിൽ നിന്നും മനസിലാകുന്നത്.