ഇന്ന് ലോക അവയവദാന ദിനം
ഓര്മ്മിക്കാം ഈയൊരു ദിനം കൂടി. ഇന്ന് ആഗസ്റ്റ് 13 ലോക അവയവദാന ദിനം. അവയവ ദാനത്തിന്റെ മഹത്വവുമായി അവയവദാനം മഹാദാനം എന്ന മുദ്രാവാക്യമുയര്ത്തിയാണ് ഇത്തവണത്തെ ലോക അവയവദാനദിനം കടന്ന് പോകുന്നത്. ശരീരത്തിലെ ഏതെങ്കിലും ഒരു പ്രധാന അവയവത്തിന്റെ പ്രവര്ത്തനം നിലയ്ക്കുന്നത് മൂലം പ്രതിവര്ഷം 5 ലക്ഷം പേരെങ്കിലും രാജ്യത്ത് മരിക്കുന്നുണെന്നാണ് കണക്കുകള് സൂചിപ്പിക്കുന്നത്. മസ്തിഷ്ക മരണം സംഭവിക്കുന്ന ഒരു മനുഷ്യന് 8 പേരുടെ ജീവന് രക്ഷിക്കാമെന്നിരിക്കെയാണ് ഇത്രയും പേരെ മരണത്തിന് വിട്ടു കൊടുക്കേണ്ടി വരുന്നത്.
ഇവിടെയാണ് ലോക അവയവ ദാന ദിനത്തിന്റെ പ്രധാന്യം. മുന്കാലങ്ങളെ അപേക്ഷിച്ച് മസ്തിഷ്ക മരണം സംഭവിച്ചവരുടെ ബന്ധുക്കള് അവയവദാനത്തിന് മുന്കൈയെടുക്കുന്ന അവസ്ഥ ഉണ്ടായിട്ടുണ്ടെങ്കിലും ഈ ദിനം കൊണ്ടുദ്ദേശിക്കുന്ന പോലെ വലിയ ഒരു മാറ്റം കൊണ്ടുവരാന് ഇനിയും ഒരുപാട് യാത്ര ചെയേണ്ടിയിരിക്കുന്നു.
അതിനുള്ള ഓര്മ്മപ്പെടുത്തലായാണ് ലോകം ഇന്ന് അവയവദാന ദിനമായി ആചരിക്കുന്നത്. മാറ്റിവെക്കാന് അവയവം ലഭ്യമല്ലാത്തതിനാല് മാത്രം ഓരോ മിനിട്ടിലും പതിനെട്ടു പേര് വീതമാണ് ഈ ഭൂമിയില് നിന്നും വിടവാങ്ങുന്നത്. രാജ്യത്ത് വര്ഷം ഏതാണ്ട് 5000 വൃക്കകളും 400 കരളുകളും കൈമാറ്റം ചെയ്യപ്പെടുന്നുണ്ടെന്നാണ് കണക്ക്. എന്നാല് ഇവയെല്ലാം തന്നെ കൈമാറ്റം ചെയ്യപ്പെടുന്നത് അടുത്ത ബന്ധുക്കള് തമ്മില് മാത്രമാണ്.
തിരുവനന്തപുരത്തു നിന്നു കൊച്ചിയിലേക്കും കൊച്ചിയില് നിന്നു ചെന്നൈയിലേക്കും ജീവന്റെ തുടിപ്പുമായി ഹൃദയം പറക്കുന്നുവെന്ന വാര്ത്തകളാണ് സമീപദിവസങ്ങളില് നമ്മെ ഏറെ സ്പര്ശിച്ചത്. ജാതിയും മതവുമെല്ലാം മഹത്തായ മാനവസ്നേഹത്തിനു മുന്നില് വഴിമാറുന്നതും നാം കണ്ടു. മൂന്നു വര്ഷം മുന്പ് അവയവദാനത്തിന്റെ മഹത്വത്തെക്കുറിച്ചു ഞാന് പറഞ്ഞുതുടങ്ങുമ്പോള് ഒരു പരിധിവരെ ഇക്കാര്യത്തില് അജ്ഞരായിരുന്നു നമ്മുടെ സമൂഹം. എന്നാലിപ്പോള് ആളുകള് ഉള്ക്കൊണ്ടുതുടങ്ങിയിരിക്കുന്നു മഹത്തായ ജീവദാനത്തിന്റെ പ്രാധാന്യം.
ഒരാളുടെ മരണശഷം അവയവങ്ങള് ദാനം ചെയ്യുന്നതിനെക്കുറിച്ചു ബന്ധുക്കള്ക്കിടയിലെ തര്ക്കത്തില് അര്ഥമില്ല. മറ്റുള്ളവര്ക്കു സന്തോഷം നല്കുന്ന, മറ്റൊരാളുടെ ജീവിതത്തിനു വെളിച്ചമാവാന് കഴിയുന്ന ഒരു തീരുമാനം അനാവശ്യ ന്യായങ്ങള് പറഞ്ഞ് തള്ളിക്കളയുന്നതു ഖേദകരമാണ്. സംസ്ഥാനത്തു തന്നെ ആകെയുണ്ടാവുന്ന 200ഓളം മരണങ്ങളില് ഒരു കേസില് മാത്രമാകും മസ്തിഷ്ക മരണം. പലപ്പോഴും ഇങ്ങനെ സംഭവിച്ചവരുടെ ബന്ധുക്കള് അവയവങ്ങള് ദാനം ചെയ്യാന് തയാറാവുന്നില്ലെന്നതാണു ഖേദകരം.
മസ്തിഷ്ക മരണമെന്നതു ശാസ്ത്രീയമായി മരണം തന്നെയെന്ന തിരിച്ചറിവാണ് ആദ്യം ഉണ്ടാവേണ്ടത്. ശരീരത്തിലെ മറ്റെല്ലാ അവയവങ്ങളുടെയും പ്രവര്ത്തനം നിലയ്ക്കലാണു മസ്തിഷ്ക മരണത്തോടെ സംഭവിക്കുന്നത്. കൃത്രിമ ഉപകരണങ്ങളുടെ സഹായത്തോടെയുള്ള തുടര്പ്രവര്ത്തനവും ഈ ഉപകരണങ്ങള് നീക്കുന്നതോടെ നിലയ്ക്കുന്നു. അവയവ ദാനമെന്നത് ഒരു മതാചാരങ്ങള്ക്കും എതിരല്ലെന്നതാണു യാഥാര്ഥ്യം.
ഏതൊരു മതത്തെ അടിസ്ഥാനപ്പെടുത്തി നോക്കിയാലും മരണശേഷം ശരീരം ചിതയില് വയ്ക്കാനോ, അല്ലെങ്കില് അടക്കം ചെയ്യാനോ ആണ് ആഹ്വാനം ചെയ്യുന്നത്. നശിക്കേണ്ടവയില് നിന്നു മറ്റൊരാള്ക്കു ജീവിതം നല്കുന്നതില് മടിക്കേണ്ട കാര്യമില്ല. നമ്മുടെ ഒരു നിമിഷത്തെ തീരുമാനം കൊണ്ട് ഒന്നോ അതിലധികമോ ആളുകളുടെ ജീവനാണു തിരിച്ചു കിട്ടുന്നത്.
മറ്റുള്ളവര്ക്കു വേണ്ടി നഷ്ടപ്പെടുന്നതിന്റെ സന്തോഷവും നാം തിരിച്ചറിയണം.
അപ്പപ്പോഴുള്ള വാര്ത്തയറിയാന് ഞങ്ങളുടെഫേസ് ബുക്ക്Likeചെയ്യുക
https://www.facebook.com/Malayalivartha