അമേരിക്കയിലെ ജോര്‍ജ്ജിയയില്‍ 1964-ല്‍ തെല്‍മ ടിപ്ടണ്‍ എന്ന 24-കാരി ഗര്‍ഭവതി ആയപ്പോള്‍ ചികിത്സയ്ക്കായി സമീപിച്ചത് പ്രഗല്‍ഭനായ ഡോ.ഹിക്ക്‌സിനെയായിരുന്നു. ഹൃദയത്തകരാറുകളോടെ ജനിച്ച തെല്‍മയുടെ കുഞ്ഞിന് ജീവനുണ്ടായിരുന്നില്ലെന്ന് പ്രസവം കഴിഞ്ഞ് ഡോക്ടര്‍ അവരെ അറിയിച്ചു.കുഞ്ഞിന്റെ മരണ സര്‍ട്ടിഫിക്കറ്റും നല്‍കി ഡോ ഹിക്ക്‌സ് അവരെ യാത്രയാക്കി.കുഞ്ഞു മരിച്ച വേദനയോടെ അവര്‍ ജീവിതവുമായി മുന്നോട്ടു പോയി.

അല്പകാലത്തിനുശേഷം അങ്ങകലെ അമേരിക്കയിലെ മറ്റൊരു സംസ്ഥാനമായ ഒഹൈയോവിലുള്ള ഒരു പെണ്‍കുട്ടിയോട് അവളുടെ മാതാപിതാക്കള്‍ അറിയിച്ചു. അവള്‍ തങ്ങളുടെ ദത്തു പുത്രിയാണെന്ന്. അന്നു മുതല്‍ ക്രിസ്റ്റേ ഹ്യൂസ് എന്ന ആ പെണ്‍കുട്ടിയ്ക്ക് തന്നെ പ്രസവിച്ച മാതാവിനെ കുറിച്ച് അറിയണമെന്ന് ആഗ്രഹം തുടങ്ങി. അവളുടെ വളര്‍ത്തച്ഛന്‍ എല്ലാ പിന്തുണയും അറിയിച്ചതോടെ അവള്‍ അതിനുളള ശ്രമങ്ങളാരംഭിച്ചു. എന്നാല്‍ എങ്ങനെ തുടങ്ങണമെന്നോ എവിടെ തുടങ്ങണമെന്നോ അറിയാതെ അവളുടെ ശ്രമങ്ങള്‍ വഴിമുട്ടി നിന്നു.

അങ്ങനെയിരിക്കവെ 1997- ല്‍ അമേരിക്കയെ ഞെട്ടിച്ചു കൊണ്ട് ഡോ.ഹിക്ക്‌സിന്റെ കഥകള്‍ പുറത്തു വന്നു തുടങ്ങി. ജോര്‍ജ്ജിയയിലെ ടൗണ്‍ ഡോക്ടറായി സേവനം അനുഷ്ഠിച്ചിരുന്ന ഹിക്ക്‌സ് അവിടെയുണ്ടായിരുന്ന ഖനിത്തൊഴിലാളികളുടെ ഇടയില്‍ വളരെ ജനപ്രിയനായിരുന്നു. ഗര്‍ഭമലസിപ്പിക്കല്‍ നിയമവിധേയമല്ലാതിരുന്ന ആ കാലത്ത് ഡോ ഹിക്ക്‌സ് രഹസ്യമായി ഗര്‍ഭം അലസിപ്പിച്ചു കൊടുത്തിരുന്നതാണ് അയാളെ ഖനിത്തൊഴിലാളികള്‍ക്കിടയില്‍ പ്രിയങ്കരനാക്കിയത്.

അത്തരം ആവശ്യവുമായി തന്നെ സമീപിക്കുന്നവരില്‍ ചിലരോട് ഗര്‍ഭം അലസിപ്പിക്കേണ്ട എന്നും, കുഞ്ഞിനെ രഹസ്യമായി പ്രസവിച്ചു നല്‍കിയാല്‍ കുഞ്ഞുങ്ങളുണ്ടാകാനിടയില്ലാത്ത ദമ്പതികള്‍ക്ക് ദത്തു നല്‍കികൊള്ളാം എന്നും അറിയിയ്ക്കാറുണ്ടായിരുന്നു. ഇപ്രകാരം നല്‍കുന്ന കുഞ്ഞുങ്ങള്‍ക്ക് അയാള്‍ 800 $ മുതല്‍ 1000 $ വരെ വില വാങ്ങുകയും ദത്തെടുക്കുന്ന മാതാപിതാക്കളുടെ പേരു രേഖപ്പെടുത്തിയ വ്യാജ ജനന സര്‍ട്ടിഫിക്കറ്റ് നല്‍കുകയും ചെയ്യാറുണ്ടായിരുന്നു എന്നുള്ള കഥകള്‍ അമേരിക്കയെ പിടിച്ചുലച്ചു. അതു കൂടാതെ പ്രസവ ചികിത്സകള്‍ക്കെത്തുന്ന ചിലരുടെ കുഞ്ഞുങ്ങളെ മോഷ്ടിച്ചെടുത്ത് അയാള്‍ വില്‍ക്കാറുമുണ്ടായിരുന്നു എന്ന വിവരങ്ങള്‍ അമേരിക്കന്‍ മനസ്സാക്ഷിയെ ഞെട്ടിച്ചു.

എന്നാല്‍ 1997-ല്‍ ഈ കഥകളെല്ലാം പുറത്തു വരുമ്പോള്‍ ഡോ ഹിക്ക്‌സ് മരിച്ചു കഴിഞ്ഞിരുന്നു. 1972-ല്‍ എണ്‍പത്തിമൂന്നാം വയസ്സിലാണ് ഡോ ഹിക്ക്‌സ് മരിച്ചത്. പക്ഷേ അതിനു മുമ്പ് 1964-ല്‍ നിയമ വിരുദ്ധമായി ഒരു ഗര്‍ഭമലസിപ്പിച്ചത് പുറത്തറിഞ്ഞതിനെ തുടര്‍ന്ന് അയാള്‍ക്ക് തന്റെ മെഡിക്കല്‍ ലൈസന്‍സ് ഉപേക്ഷിക്കേണ്ടി വന്നിരുന്നു.

ഡോ ഹിക്ക്‌സിന്റെ ചെയ്തികള്‍ പുറത്തു വന്നതോടെ അമേരിക്കന്‍ ബ്രോഡ്കാസ്റ്റിംഗ് കമ്പനിയിലെ നൈറ്റ്‌ലൈന്‍ പരിപാടിയുടെ പ്രവര്‍ത്തകര്‍ വംശാവലി സംബന്ധമായ വെബ്‌സൈറ്റായ ആന്‍സെസ്ട്രി.കോമുമായി ബന്ധപ്പെട്ടു. ആന്‍സെസ്ട്രി.കോമിന് ദശലക്ഷത്തിലധികം ആളുകളുടെ ഡിഎന്‍എ ശേഖരമുള്ള ഡേറ്റാബേസാണുള്ളത്. അപ്രകാരം മാതാപിതാക്കളുടെ അറിവോ സമ്മതമോ ഇല്ലാതെ ഡോ ഹിക്ക്‌സ് വിറ്റുകളഞ്ഞ കുഞ്ഞുങ്ങള്‍ ഹിക്ക്‌സിന്റെ കുട്ടികള്‍ എന്ന് പരാമര്‍ശിക്കപ്പെട്ടു തുടങ്ങി. ഇപ്രകാരം ദത്തെടുക്കപ്പെട്ട കുട്ടികളുടെ ഡിഎന്‍എ പരിശോധനയില്‍ സ്വന്തം മാതാപിതാക്കളുടെ രണ്ടാമത്തെയോ മൂന്നാമത്തേയോ തലമുറയിലുള്ളവരെ കണ്ടെത്താന്‍ ഇടയാകാറുണ്ട്. ഇതറിഞ്ഞ ക്രിസ്റ്റ്യഹ്യൂസ് നൈറ്റ്‌ലൈന്‍ പ്രവര്‍ത്തകരുമായി ബന്ധപ്പെട്ടു.

തുടര്‍ന്നുള്ള ഡിഎന്‍എ പരിശോധനയില്‍ ജാക്കി ഫ്‌ലവേഴ്‌സ് എന്ന ഒരു വനിത ക്രിസ്റ്റ്യേ ഹ്യൂസിന്റെ കസിനാണെന്നു കണ്ടെത്തി. ജാക്കിയോടു ഫോണില്‍ സംസാരിക്കവേ അവളുടെ രണ്ട് ആന്റിമാര്‍ ഡോ ഹിക്ക്‌സിന്റെ ക്ലിനിക്കില്‍ പ്രസവിച്ചിട്ടുണ്ടെന്നും അതിലൊരാള്‍ ക്രിസ്റ്റേയുടെ അമ്മയായിരിക്കാനാണ് സാധ്യതയെന്നും ജാക്കി പറഞ്ഞു. ഈ രണ്ട് ആന്റിമാരില്‍ ജീവിച്ചിരിക്കുന്ന ആന്റിക്ക് റോജര്‍ ടിപ്ടണ്‍ എന്ന 52 വയസ്സായ ഒരു മകന്‍ മാത്രമേ ഉള്ളൂ എന്നും അറിഞ്ഞു. അറിഞ്ഞ വിവരങ്ങള്‍ സത്യമാണെങ്കില്‍ ക്രിസ്റ്റ്യേ തന്റെ സഹോദരിയായിരിക്കാനാണു സാധ്യത എന്നു മനസ്സിലാക്കിയ റോജര്‍ ഡിഎന്‍ എ പരിശോധനയ്ക്കു തയ്യാറായി.

അതോടെ ക്രിസ്റ്റ്യേ ഹ്യൂസിന്റെ അന്വേഷണങ്ങള്‍ക്ക് പരിസമാപ്തിയാവുകയായിരുന്നു. റോജര്‍ ടിപ്ടണ്‍ അവളുടെ സ്വന്തം സഹോദരനായിരുന്നു. ഭാഗ്യത്തിന് അവരുടെ അമ്മ 75 കാരിയായ തെല്‍മ ടിപ്ടണ്‍ അപ്പോഴും ജീവിച്ചിരിക്കുന്നുണ്ടായിരുന്നു, തുടര്‍ന്ന് വളരെ പെട്ടെന്നു തന്നെ കുടുംബാംഗങ്ങള്‍ക്ക് വികാരനിര്‍ഭരമായ ഒരു ഒത്തുചേരല്‍ ഉണ്ടായി.

മരിച്ചു പോയി എന്ന് തന്നെ അറിയിച്ചിരുന്ന കുഞ്ഞ് ക്രിസ്റ്റ്യേ ഹ്യൂസ് എന്ന 51 -കാരിയായി മുന്നിലെത്തിയപ്പോള്‍ വിറകൊള്ളുന്ന ഹൃദയത്തോടെ അവളെ ചേര്‍ത്തു പിടിച്ച് ആ 75-കാരി മാതാവ് വിതുമ്പി. കെട്ടിപ്പുണര്‍ന്നു വിതുമ്പുന്നതിനിടയില്‍ ക്രിസ്റ്റ്യേ ചോദിച്ചു അമ്മയ്ക്കിരിക്കണോ എന്ന്. അവര്‍ പറഞ്ഞു; വേണ്ട എനിക്കു നിന്നെ ഇങ്ങനെ കൈകള്‍ക്കുള്ളില്‍ ചേര്‍ത്തു പിടിച്ചു നിന്നാല്‍ മതിയെന്ന്! ഇത്രകാലവും അവര്‍ക്കു നഷ്ടമായ സ്‌നേഹസന്ദര്‍ഭങ്ങളെ കുറിച്ച് ഓര്‍ക്കുമ്പോഴെല്ലാം അവര്‍ ഡോ ഹിക്ക്‌സിനെ ശപിച്ചുകൊണ്ടേയിരിക്കുന്നു. എങ്കിലും മകളേയും മരുമകനേയും കൊച്ചുമക്കളേയും ഒന്നിച്ച് കിട്ടിയതിന്റെ സന്തോഷം ചില്ലറയൊന്നുമല്ല തെല്‍മക്കുള്ളത്!

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha