ഏത് ലോകത്ത് ജീവിച്ചാലും മനസില്‍ ഗൃഹാതുരത്വം വിളിച്ചോതി പൊന്നിന്‍ ചിങ്ങമെത്തി. കള്ളക്കര്‍ക്കടകത്തിന്റെ വറുതിയില്‍ നിന്ന് വിടുതി നേടുന്നതിന്റെ തുടക്കം. കാലഗണനയനുസരിച്ച് ചിങ്ങം (സിംഹം) മാസമാണ് മലയാളികളുടെ ഒരു വര്‍ഷത്തിലെ ആദ്യത്തെ മാസം. മലയാളവര്‍ഷം കൊല്ലവര്‍ഷം എന്നും അറിയപ്പെടുന്നു. ഇന്നുമുതല്‍ കൊല്ലവര്‍ഷം 1191നു തുടക്കമാവും. ചിങ്ങമാസം കാര്‍ഷികവിളവെടുപ്പിന്റെ കാലവുമാണ്. സമൃദ്ധമായ ഒരു കാലത്തിന്റെ ഓര്‍മകളെ പുനരാനയിക്കുന്ന ഓണാഘോഷവും ഈ ചിങ്ങത്തില്‍തന്നെ.
മലയാളിയുടെ സ്വന്തം കൊല്ലവര്‍ഷം ഉടലെടുത്തതും കച്ചവടതാല്പര്യവുമായി ബന്ധപ്പെട്ടാവണം. തിരുവിതാംകൂറിലെ കൊല്ലം തുറമുഖനഗരമായി വികസിച്ചിരുന്നതിനാല്‍ വിദേശരാജ്യങ്ങളുമായി കച്ചവടം നടത്തുന്നതിന് ക്ലിപ്തമായ ഒരു കാലഗണന വേണ്ടിവന്നിരിക്കാം. ചരിത്രത്തില്‍ ഇങ്ങനെയും ചില രേഖപ്പെടുത്തലുകളുണ്ട്. മലബാറിലെ കൊല്ലം എന്ന പ്രദേശവുമായി ബന്ധപ്പെട്ടും കൊല്ലവര്‍ഷത്തിനു ബന്ധമുണ്ട്. (തെക്കന്‍ കൊല്ലം വടക്കന്‍ കൊല്ലം എന്ന് സംഘകാലകൃതികളില്‍ പരാമര്‍ശം)
മറ്റൊന്ന് ആലപ്പുഴ ജില്ലയിലെ മാവേലിക്കരയ്ക്കടുത്തുള്ള കണ്ടിയൂരില്‍ രാജാവായ ചേരമാന്‍ പെരുമാള്‍ ശിവക്ഷേത്രം സ്ഥാപിച്ചത് എ.ഡി.825 ല്‍ ആണെന്നാണ്. ഹെര്‍മന്‍ ഗുണ്ടര്‍ട്ടിന്റെ രചനകളില്‍ ഇത് പറയുന്നുണ്ട്. പ്രാദേശികമായ വിശ്വാസങ്ങളും ആചാരങ്ങളും ഇതിനു കാരണമാണത്രേ. വേണാട് രാജാവായ ഉടയ മാര്‍ത്താണ്ഡവര്‍മയാണ് കൊല്ലവര്‍ഷം തുടങ്ങിയതെന്ന് മറ്റു ചിലരും പറയുന്നു. എന്നാല്‍ ചില വൈരുദ്ധ്യങ്ങളും അഇതോടൊപ്പം പ്രചരിക്കുന്നു.
തിരുവിതാംകൂറില്‍ ചിങ്ങം ഒന്നിനും മലബാറില്‍ കന്നി ഒന്നിനുമാണ് വര്‍ഷം തുടങ്ങിയിരുന്നത്. മറ്റു ചിലര്‍ വിശ്വസിക്കുന്നത് ശങ്കരചാര്യരുടെ സമാധിയുമായി ബന്ധപ്പെട്ടാണ് മലയാളവര്‍ഷത്തിന്റെ തീയതികളും മാസങ്ങളും തിഥികളും മറ്റും നിശ്ചയിക്കപ്പെട്ടതാണെന്നാണ്. 
കാലാവസ്ഥയും അതില്‍ പ്രധാനമത്രേ. കേരളം നിലവില്‍വന്നിട്ട് ഏതാനും വര്‍ഷങ്ങളേ ആയിട്ടുള്ളൂ. 1956 നു മുമ്പ് പ്രധാനമായും മൂന്നു രാജ്യങ്ങായിരുന്നു. തിരുവിതാംകൂര്‍, കൊച്ചി, മലബാര്‍. അതിനു മുമ്പ് ചെറു ചെറു രാജ്യങ്ങള്‍. ഈ കൊച്ചുകൊച്ചു രാജ്യങ്ങള്‍ അപ്രത്യക്ഷമാവുകയും കേരളം ഏകീകൃതമായ ഒരു സംസ്‌കാരത്തിലേക്ക് നടന്നടുക്കുകയും ചെയ്തു തുടങ്ങിയ 1112 നൂറ്റാണ്ടിലാണ് കലണ്ടര്‍ എന്ന സമ്പ്രദായം പ്രചാരത്തിലായത്.
അതിനു രാഷ്ര്ടീയവും മതപരവും വാണിജ്യപരവുമായ ബന്ധങ്ങളുമുണ്ടെന്നും പണ്ഡിതര്‍ പറയുന്നു. എ.ഡി. 824 ആണ് കൊല്ലവര്‍ഷത്തിന്റെ തുടക്കമെന്നാണ് ഒരു വാദം. എന്നാല്‍ നാമിന്ന് എ.ഡി. 825 അടിസ്ഥാനമാക്കിയാണ് കൊല്ലവര്‍ഷം കണക്കാക്കുന്നത്.
മലയാളികളെ സംബന്ധിച്ച് കാര്‍ഷിക വിളവെടുപ്പിന്റെ തുടക്കവും ചിങ്ങമാസമാണ്. കര്‍ക്കടത്തിന്റെ മഴക്കാലം (മണ്‍സൂണ്‍) കഴിഞ്ഞ് കാര്‍ഷിവൃത്തിയിലേക്ക് തെളിമാനം. പാടങ്ങളും തൊടികളും വിത്തിറക്കാനും നടാനും പാകപ്പെടുന്ന കാലം. വറുതിയുടെ നാളുകളെ ദൂരെക്കളയുന്ന കാലം. മലകളും കാടുകളും നദികളും കടലും അനുഗ്രഹിക്കുന്ന മലയാളനാട്ടില്‍ കൃഷി ഒരു സംസ്‌കാരമായിരുന്ന കാലത്തെക്കൂടി ഓര്‍മിപ്പിക്കുന്ന ഓണത്തിന്റെ ദിനങ്ങളും ചിങ്ങത്തിലാണ്. സമതയുടെ ഗൃഹാതുരതയാണ് ഓണക്കാലം. എങ്ങും പൂക്കളൊരുക്കി പ്രകൃതി തന്നെ പൂക്കളമൊരുക്കുന്ന അപൂര്‍വ കാലം കൂടിയാണ് പൊന്നിന്‍ ചിങ്ങം.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha