ശശി തരൂര്‍ എംപിയുടെ സ്വപ്ന പദ്ധതിയാണ് വിഴിഞ്ഞം തുറമുഖം യാഥാര്‍ത്ഥ്യമാക്കുക എന്നത്. ഒരു കേന്ദ്ര പദ്ധതി നേടിയെടുക്കുന്നതിന്റെ സുപ്രധാന ക്രെഡിറ്റ് ആ നിയോജക മണ്ഡലത്തിലെ എംപിക്കാണുള്ളത്. അത് എവിടെയാണെങ്കിലും ശരി. ഉദാഹരണത്തിന് പാലക്കാട് ഐഐടി കൊണ്ടു വന്നതിന്റെ ക്രഡിറ്റ് സിപിഎമ്മുകാരനായ എംവി രാജേഷിനാണ് നല്‍കിയത്. അതു പോലെ തന്നെയാണ് വിഴിഞ്ഞത്തിന്റെ കാര്യവും. ഇവിടെയാണ് തിരുവനന്തപുരം എംപി കൂടിയായ ശശി തരൂരിന്റെ പ്രസക്തി.
കോണ്‍ഗ്രസുകാര്‍ കേന്ദ്രം ഭരിച്ചിരുന്ന സമയത്തും വിഴിഞ്ഞത്തിന് വേണ്ടി ശശി തരൂര്‍ ആവത് ചെയ്തു. എന്നാല്‍ കേരളത്തിന്റെ സാഹചര്യത്തില്‍ വിഴിഞ്ഞം ആരും ഏറ്റെടുക്കാതെ വന്നു. അതേസമയം ഭരണം മാറി മോഡി വന്നതോടെ വന്‍ സംരംഭങ്ങള്‍ക്ക് തുടക്കം കുറിച്ചു. വന്‍ വ്യവസായികള്‍ക്ക് എല്ലാ സഹായവും മോഡി വാഗ്ദാനം ചെയ്തപ്പോള്‍ ഒരിക്കല്‍ കൂടി വിഴിഞ്ഞം പൊങ്ങി വന്നു. തിരുവനന്തപുരം എംപിയെന്ന നിലയില്‍ ശശി തരൂര്‍ വിഴിഞ്ഞത്തിനായി മോഡിയെ സമീപിച്ചു. ഇതിന് ബിജെപി നേതാക്കളുടെ പിന്തുണ കൂടി ലഭിച്ചു. തുടര്‍ന്ന് മോഡിയുടെ ഉറ്റ സുഹൃത്തും ഗുജറാത്തി വ്യവസായിയുമായ അദാനി വിഴിഞ്ഞത്തെ നോട്ടമിട്ടു. ശശി തരൂരിനാകട്ടെ അദാനിയുമായി നല്ല അടുപ്പവുമുണ്ട്. പണ്ട് ഐപിഎല്ലില്‍ അദാനിയെ തോല്‍പിച്ചാണ് കേരളത്തിന് വേണ്ടി ശശി തരൂര്‍ ടീമിനെ നേടിയത്. കേന്ദ്രമന്ത്രിയായിരുന്ന ശശി തരൂര്‍ അദാനിയുമായി നല്ല ബന്ധത്തിലുമായിരുന്നു.
അദാനിയുടെ തീരുമാനങ്ങള്‍ ശശി തരൂര്‍ മുഖ്യമന്ത്രി ഉമ്മന്‍ ചാണ്ടിയെ അറിയിച്ചതോടെ കാര്യങ്ങള്‍ എളുപ്പമായി. വിഴിഞ്ഞത്തെ ഉയര്‍ത്തിക്കാട്ടി അരുവിക്കരയില്‍ നല്ല വിജയവും നേടി. ഇതിനിടെ കോണ്‍ഗ്രസ് ഹൈക്കമാന്‍ഡ് വിഴിഞ്ഞത്തിന് മേല്‍ കരിനിഴല്‍ വീഴ്ത്തിയപ്പോഴും ശശി തരൂര്‍ ഇടപെട്ടു. തുടര്‍ന്നാണ് ശശി തരൂരിനെ ഹൈക്കമാന്‍ഡ് ശാസിച്ചത്.
വിഴിഞ്ഞം ശശി തരൂരിന്റെ മാത്രമല്ലെന്നും കേരളത്തിലെ വലിയൊരു വോട്ടു ബാങ്കാണെന്നും മനസിലാക്കിയ ഉമ്മന്‍ ചാണ്ടിയും മറ്റ് കോണ്‍ഗ്രസ് മന്ത്രിമാരും വിഴിഞ്ഞം ഈ മന്ത്രിസഭാ കാലത്ത് തന്നെ യാഥാര്‍ത്ഥ്യമാക്കാന്‍ ശ്രമിച്ചു. അതോടെ അദാനി ഗ്രൂപ്പ് കേരളത്തില്‍ പറന്നെത്തി.
തിരുവനന്തപുരത്തെത്തിയ അദാനി ഗ്രൂപ്പ് ശശി തരൂരിനോടുള്ള പ്രത്യേക താല്‍പ്പര്യം വ്യക്തമാക്കുകയും ചെയ്തു. മുഖ്യമന്ത്രിയുമായി ചര്‍ച്ചയ്ക്ക് എത്തിയ ഗൗതം അദാനിയുടെ മകന്‍ കരണ്‍ അദാനി നേരെ പോയത് തരൂരിന്റെ ഫഌറ്റിലാണ്. അവിടെയായിരുന്നു പ്രഭാത ഭക്ഷണം. അതിന് ശേഷം മുഖ്യമന്ത്രിയെ കാണാന്‍ നിയമസഭയിലേക്ക് പോയത് തരൂരുമൊത്താണ്. അങ്ങനെ കേരളത്തിന്റെ സ്വപ്‌നം യാഥാര്‍ത്ഥ്യമാക്കാന്‍ മുന്നില്‍ നിന്ന തരൂരിനെ മലയാളികള്‍ തിരിച്ചറിഞ്ഞു. മാധ്യമങ്ങള്‍ ആവോളം വാഴ്ത്തുകയും ചെയ്തു.
എന്നും വിവാദങ്ങളില്‍പ്പെട്ട തരൂരിനെ കോണ്‍ഗ്രസുകാര്‍ക്കും ജനങ്ങള്‍ക്കും വേണ്ടാതായി തുടങ്ങിയിരുന്നു. അവിടെ നിന്നായിരുന്നു തരൂരിന്റെ ഈ ഉയര്‍ത്തെഴുന്നേല്‍പ്പ്. എന്നാല്‍ വിഴിഞ്ഞം കരാര്‍ ഒപ്പിടുന്ന സമയത്ത് ശശി തരൂരിനെ മാത്രം കണ്ടില്ല. വിഴിഞ്ഞത്തിന് വേണ്ടി ഒന്നും ചെയ്യാത്ത മന്ത്രിമാര്‍ പോലും സദസില്‍ ഞെളിഞ്ഞിരുന്നപ്പോള്‍ ശശി തരൂരൂരിനെ കാണാനില്ല. അന്വേഷിച്ചപ്പോഴാണറിയുന്നത് ശശി തരൂര്‍ അമേരിക്കയിലാണ്. മകന്റെ വിവാഹ കാര്യങ്ങള്‍ക്കാണ് ശശി തരൂര്‍ പോയതെന്ന്. ആദ്യ ഭാര്യ തിലോത്തമ മുഖര്‍ജിയിലുള്ള മകന്‍ കനിഷ്‌ക് തരൂരിന്റെ വിവാഹത്തിനായാണ് തരൂര്‍ ന്യൂയോര്‍ക്കില്‍ പോയത്. 

സംഗതി ശരിതന്നെയെങ്കിലും ശശി തരൂര്‍ മനം നൊന്താണ് കേരളം വിട്ടത്. ചിങ്ങം ഒന്നിന് വിഴിഞ്ഞം കരാര്‍ ഒപ്പിടുമെന്ന് വളരെ നേരെത്തേ പ്രഖ്യാപിച്ചതാണ്. അത് കൊണ്ട് തന്നെ തനിക്ക് ഏറെ രാഷ്ട്രീയ നേട്ടങ്ങള്‍ ഉണ്ടാക്കുന്ന ഈ ദിനത്തില്‍ മകന്റെ കല്യാണത്തിന്റെ പേര് പറഞ്ഞ് തരൂര്‍ ഒരിക്കലും കേരളം വിടില്ല.
കഴിഞ്ഞ ദിവസം തിരുവനന്തപുരത്ത് പ്രത്യക്ഷപ്പെട്ട പോസ്റ്ററും ഫ്‌ളക്‌സുകളും കണ്ടാല്‍ എല്ലാം വ്യക്തമാകും. തിരുവനന്തപുരം ജില്ലാ കോണ്‍ഗ്രസ് കമ്മിറ്റി ഇറക്കിയ പോസ്റ്ററില്‍ ശശി തരൂര്‍ മാത്രം ഇല്ല. ഉമ്മന്‍ ചാണ്ടി, രമേശ് ചെന്നിത്തല, മന്ത്രി കെ. ബാബു, വി.എസ്. ശിവകുമാര്‍ എന്തിന് വിഴിഞ്ഞത്തിന് വേണ്ടി ഒന്നും ചെയ്യാത്ത ഡിസിസി പ്രസിഡന്റ് കരകുളം കൃഷ്ണ പിള്ളയുടെ ഫോട്ടോ പോലുമുണ്ട്. വിഞ്ഞത്തിന് ചിങ്ങം ഒന്നിന് നങ്കൂരം എന്നാണ് പോസ്റ്ററിന്റെ തലവാചകം.
ശശി തരൂര്‍ മാത്രം കോണ്‍ഗ്രസുകാരനല്ലേ എന്നാണ് പലരുടേയും സംശയം. രാവന്തിയോളം അദാനിയുമായി ചര്‍ച്ച നടത്തി എല്ലാം ശരിയായപ്പോള്‍ ശശി തരൂരിന് ഒരു സീറ്റ് പോലും വേദിയില്‍ നല്‍കിയില്ല. മുന്നില്‍ നിന്നും പടനയിച്ച തരൂരിനെ മൂലയ്ക്കിരുത്തി. ഇനി എല്ലാ ക്രെഡിറ്റും തരൂര്‍ കൊണ്ട് പോയെങ്കിലോ…